കരൾ ശരീരത്തിലെ ഏറ്റവും പ്രധാനപ്പെട്ട അവയവങ്ങളിൽ ഒന്നാണ്. ശരീരത്തിലെ മാലിന്യങ്ങൾ നീക്കം ചെയ്യുന്നതിൽ സുപ്രധാന പങ്കുവഹിക്കുന്നത് കരളാണ്. ദഹനത്തെ പിന്തുണയ്ക്കുക, പിത്തരസം ഉത്പാദിപ്പിക്കുക, രക്തത്തിലെ പഞ്ചസാരയുടെ അളവ് നിയന്ത്രിക്കുക തുടങ്ങിയ പ്രവർത്തനങ്ങൾ നിർവഹിക്കുന്നത് കരളാണ്. അതിനാൽ കരളിന്‍റെ ആരോഗ്യം സംരക്ഷിക്കേണ്ടത് വളരെ പ്രധാനമാണ്.
ഇന്ന് സമൂഹത്തിൽ കരൾ രോഗികളുടെ എണ്ണം ഗണ്യമായി വധിച്ചു വരികയാണ്. ലോകത്തുടനീളം ഉണ്ടാകുന്ന മരണങ്ങളുടെ അഞ്ചാമത്തെ കാരണം കരൾ രോഗങ്ങളാണെന്നാണ് കണക്കുകൾ സൂചിപ്പിക്കുന്നത്. അനാരോഗ്യകരമായ ഭക്ഷണശൈലി, വ്യായാമക്കുറവ്, മദ്യപാനം എന്നിവ കരളിന്‍റെ ആരോഗ്യം നശിപ്പിക്കുന്ന ഘടകങ്ങളാണ്. ഇതിനിന് പുറമെ ചില പാനീയങ്ങളുടെ ഉപയോഗവും കരളിന്‍റെ ആരോഗ്യത്തെ ദോഷമായി ബാധിക്കുന്നു. അത്തരത്തിൽ കരളിനെ ബാധിക്കുന്ന 4 പാനീയങ്ങൾ എന്തൊക്കെയെന്ന് അറിഞ്ഞിരിക്കാം.
സോഡ
കരളിന്‍റെ ആരോഗ്യം നശിപ്പിക്കുന്ന പാനീയങ്ങളിൽ ഒന്നാണ് സോഡ. പതിവായി സോഡ ഉൾപ്പെടെയുള്ള ശീതളപാനീയങ്ങൾ കുടിക്കുന്നത് കരളിൽ കൊഴുപ്പ് അടിഞ്ഞുകൂടാൻ കാരണമാകുമെന്ന് കനേഡിയൻ ജേണൽ ഓഫ് ഗ്യാസ്‌ട്രോഎൻട്രോളജി ആൻഡ് ഹെപ്പറ്റോളജിയിൽ പ്രസിദ്ധീകരിച്ച ഒരു പഠനം കണ്ടെത്തി. നോൺ-ആൽക്കഹോളിക് ഫാറ്റി ലിവർ ഡിസീസ് (NAFLD) എന്നറിയപ്പെടുന്ന ഈ രോഗം കരളിന്‍റെ പ്രവർത്തനത്തെ തകരാറിലാക്കുകയും വീക്കം വർദ്ധിപ്പിക്കുകയും ചെയ്യും.
എനർജി ഡ്രിങ്ക്സ്
എനർജി ഡ്രിങ്കുകളുടെ ഉപയോഗം ഗുണത്തേക്കാൾ കൂടുതൽ ദോഷം ചെയ്യും. അമിതമായി എനർജി ഡ്രിങ്ക് കുടിക്കുന്നത് കരളിന് ഗുരുതരമായ പ്രശ്‌നങ്ങൾ ഉണ്ടാകാൻ കാരണമാകുമെന്ന് യുഎസ് നാഷണൽ ഇൻസ്റ്റിറ്റ്യൂട്ട് ഓഫ് മെഡിസിൻ നടത്തിയ പഠനം വ്യക്തമാക്കുന്നു. ഉയർന്ന അളവിലെ ടോറിൻ, കഫീൻ, മറ്റ് ഉത്തേജകങ്ങൾ എന്നിവ ദഹിപ്പിക്കുന്നതിനായി കരൾ കഠിനമായി പ്രവർത്തിക്കേണ്ടി വരും. ഇത് കരളിന്‍റെ ആരോഗ്യത്തെ ബാധിക്കും. എനർജി ഡ്രിങ്കുകളുടെ അമിത ഉപയോഗം കരൾ പ്രവർത്തനരഹിതമാകാനും ഇടയാക്കും. ഇത്തരം സാഹചര്യങ്ങളിൽ കരൾ മാറ്റിവയ്ക്കൽ ശസ്ത്രക്രിയ വരെ ആവശ്യമായി വന്നേക്കും.
മദ്യം
കരൾ തകരാറിലാകുന്നതിന്‍റെ ഏറ്റവും പ്രധാനമായ കാരണങ്ങളിലൊന്നാണ് മദ്യത്തിന്‍റെ ഉപയോഗം. അമിതമായ മദ്യപാനം മദ്യം സംസ്‌കരിക്കാനുള്ള കരളിൻ്റെ ശേഷി ഇല്ലാതാക്കുമെന്ന് ജോൺ ഹോപ്‌കിൻസ് മെഡിസിൻ ചൂണ്ടിക്കാട്ടുന്നു. കൂടാതെ വീക്കത്തിനും കരളിന്‍റെ പ്രവർത്തനം പരാജയപ്പെടാനും കാരണമാകും. ഇതിന് പുറമെ അമിതമായ മദ്യപാനം മൂലം ഫാറ്റി ലിവർ, നോൺ-ആൽക്കഹോളിക് ഫാറ്റി ലിവർ ഡിസീസ്, ആൽക്കഹോൾ ഹെപ്പറ്റൈറ്റിസ്, സിറോസിസ് തുടങ്ങിയ അവസ്ഥകൾക്കും കാരണമാകും.
പഞ്ചസാര അടങ്ങിയ പാനീയങ്ങൾ
ചില പ്രകൃതിദത്ത പാനീയങ്ങളിൽ അടങ്ങിയിട്ടുള്ള പഞ്ചസാര പോലും ആരോഗ്യത്തെ ബാധിക്കുന്നവയാണ്. അതിനാൽ ഉയർന്ന അളവിൽ പഞ്ചസാര അടങ്ങിയ പാനീയങ്ങൾ കുടിക്കുന്നത് രക്തത്തിലെ പഞ്ചാരയുടെ അളവ് വർധിപ്പിക്കുക മാത്രമല്ല കരളിന്‍റെ ആരോഗ്യത്തെ ബാധിക്കുകയും ചെയ്യും. ഇത് കരളിൽ കൊഴുപ്പ് അടിഞ്ഞു കൂടാനും കരൾ വീക്കം, ഫൈബ്രോസിസ്, സിറോസിസ് തുടങ്ങിയ അസുഖങ്ങൾക്ക് കാരണമാകുകയും ചെയ്യും. അതിനാൽ പഞ്ചസാര അടങ്ങിയ പാനീയങ്ങളുടെ ഉപയോഗം കുറയ്ക്കുന്നതാണ് നല്ലത്. ഇത് കരൾ സംബന്ധമായ പ്രശ്‌നങ്ങൾ തടയാനും കരളിന്‍റെ ആരോഗ്യം നിലനിർത്താനും സഹായിക്കും.
ശ്രദ്ധിക്കുക: ഇവിടെ കൊടുത്തിരിക്കുന്ന എല്ലാ ആരോഗ്യ വിവരങ്ങളും നിർദ്ദേശങ്ങളും നിങ്ങളുടെ അറിവിലേക്കായി മാത്രമുള്ളതാണ്. ശാസ്ത്രീയ ഗവേഷണം, പഠനങ്ങൾ, ആരോഗ്യ പ്രൊഫഷണലുകൾ നൽകുന്ന ഉപദേശങ്ങൾ എന്നിവയുടെ അടിസ്ഥാനത്തിലാണ് ഈ വിവരങ്ങൾ നൽകുന്നത്. എന്നാൽ, ഇവ പിന്തുടരുന്നതിന് മുമ്പ് ഒരു ഡോക്‌ടറുടെ നിർദേശം തേടേണ്ടതാണ്.
Also Read : ഫാറ്റി ലിവർ സാധ്യത തടയാം; ഇ 6 കാര്യങ്ങൾ ശ്രദ്ധിക്കൂ
