ചർമ്മത്തിലെ സകല പ്രശ്‌നങ്ങളും പരിഹരിക്കാം; തേൻ ഈ രീതിയിൽ ഉപയോഗിക്കൂ

ആരോഗ്യത്തിനും സൗന്ദര്യത്തിനും വളരെയധികം ഗുണം ചെയ്യുന്ന ഒന്നാണ് തേൻ. ചർമ്മ സംരക്ഷണത്തിനായി തേൻ ഉപയോഗിക്കേണ്ടത് എങ്ങനെയെന്ന് നോക്കാം.

ചർമ്മ സംരക്ഷണത്തിന് പണ്ടുമുതലേ ഉപയോഗിച്ചു വരുന്ന ഒന്നാണ് തേൻ. ആൻ്റി ഓക്‌സിഡൻ്റ്, ആൻ്റി ബാക്‌ടീരിയൽ, ആൻ്റി-ഇൻഫ്ലമേറ്ററി എന്നീ ഗുണങ്ങൾ തേനിൽ അടങ്ങിയിട്ടുള്ളതിനാൽ വിവിധ ചർമ്മ പ്രശ്‌നങ്ങൾ തടയാൻ ഇത് സഹായിക്കും. തേൻ ഒരു പ്രകൃതിദത്തമായ മോയ്‌സ്‌ചറൈസറായതിനാൽ ചർമ്മത്തിൽ ജലാംശം നിലനിർത്താനും മൃദുവും മിനാസമുള്ളതാക്കാനും ഇത് ഗുണം ചെയ്യും. വീക്കം, പ്രകോപനം, മുറിവുകൾ, പൊള്ളൽ തുടങ്ങിയ ചർമ്മ പ്രശ്‌നങ്ങൾ പരിഹരിക്കാനും തേൻ സഹായിക്കും. തേനിലെ ആൻ്റി ഓക്‌സിഡൻ്റുകൾ ഫ്രീ റാഡിക്കലുകളെ നിർവീര്യമാക്കാൻ സഹായിക്കുകയും പ്രായമായാൽ പ്രക്രിയ കുറയ്ക്കുകയും ചെയ്യും. ചർമ്മ സംരക്ഷണത്തിനായി തേൻ ഉപയോഗിക്കേണ്ടത് എങ്ങനെയെന്ന് നോക്കാം.
ഒന്ന്...
ഒരു സ്‌പൂൺ തേനിലേക്ക് രണ്ട് ടീസ്‌പൂൺ തൈര്, ഒരു ടീസ്‌പൂൺ കടലമാവ് എന്നിവ ചേർത്ത് ഇളക്കി യോജിപ്പിക്കാം. ഇത് മുഖത്തും കഴുത്തിലും പുരട്ടി 20 മിനിട്ടിന് ശേഷം കഴുകി കളയാം. ചർമ്മത്തിലെ കറുത്ത പാടുകൾ ഇല്ലാതാക്കാൻ ഇത് ഗുണകരമാണ്.
രണ്ട്...
ഒരു ടീസ്‌പൂൺ അരിപ്പൊടിയും രണ്ട് ടീസ്‌പൂൺ തൈരും ഒരു നുള്ള് മഞ്ഞൾപ്പൊടിയും മിക്‌സ് ചെയ്യുക. ഇതിലേക്ക് ഒരു സ്‌പൂൺ തേനും കൂടി ചേർത്ത് നല്ലപോലെ ഇളക്കി യോജിപ്പിക്കുക. ഈ മിശ്രിതം ചർമ്മത്തിൽ പുരട്ടി മസാജ് ചെയ്യുക. 15 മുതൽ 20 മിനിറ്റ് കഴിഞ്ഞ് കഴുകി കളയാം. ചർമ്മത്തിലെ ചുളിവുകളും പാടുകളും തടയാൻ ഇങ്ങനെ ചെയ്യുന്നത് നല്ലതാണ്.
മൂന്ന്...
ഒരു പഴം നന്നായി ഉടച്ച ശേഷം ഇതിലേക്ക് രണ്ട് ടേബിൾ സ്‌പൂൺ തേൻ ഒഴിച്ച് മിക്‌സ് ചെയ്യുക. ഈ മിശ്രിതം മുഖത്തും കഴുത്തിലും പുരട്ടുക. 20 മിനിറ്റ് കഴിഞ്ഞ് കഴുകി കളയാം.
നാല്...
രണ്ട് ടേബിൾ സ്‌പൂൺ തേനും ഒരു ടീസ്‌പൂൺ കറുവപ്പട്ട പൊടിച്ചതും മിക്‌സ് ചെയ്യുക. ഈ മിശ്രിതം മുഖത്ത് പുരട്ടി 10 മിനിറ്റ് കഴിഞ്ഞ് കഴുകി കളയാം. ഈ പാക്ക് മുഖത്ത് പ്രയോഗിക്കുമ്പോൾ കണ്ണിനു ചുറ്റുമുള്ള ഭാഗം ഒഴിവാക്കാൻ പ്രത്യേകം ശ്രദ്ധിക്കുക.
അഞ്ച്...
ഒരു കഷ്‌ണം പഴുത്ത പപ്പായ നന്നായി ഉടച്ചെടുത്ത ശേഷം ഇതിലേക്ക് ഒരു ടേബിൾ സ്‌പൂൺ തേൻ ഒഴിച്ച് മിക്‌സ് ചെയ്യുക. മുഖം നന്നായി കഴുകി വൃത്തിയാക്കിയതിന് ശേഷം ഈ മിശ്രിതം ചർമ്മത്തിൽ പുരട്ടുക. 15 മിനിറ്റ് കഴിഞ്ഞ് കഴുകി കളയാം.
ആറ്...
ഒരു ടേബിൾ സ്‌പൂൺ തേനും അൽപം മഞ്ഞൾപ്പൊടിയും ചേർത്ത് ഇളക്കി യോജിപ്പിക്കുക. ഇത് മുഖത്തും കഴുത്തിലും പുരട്ടി 15 മിനിറ്റിന് ശേഷം കഴുകി കളയാം. ചർമ്മത്തിലെ പാടുകൾ, മുഖക്കുരു എന്നിവ തടയാൻ ഇത് സഹായിക്കും.
ഏഴ്...

ഒരു ടേബിൾ സ്‌പൂൺ തേനും രണ്ട് ടേബിൾസ്‌പൂൺ വെളിച്ചെണ്ണയും നന്നായി മിക്‌സ് ചെയ്യുക. ഇത് മുഖത്ത് പുരട്ടി വൃത്താകൃതിയിൽ പതിയെ മസാജ് ചെയ്യുക. 10 മിനിട്ടിന് ശേഷം ഇളം ചൂടുവെള്ളത്തിൽ കഴുകി കളയാം. ചർമ്മത്തിലെ അഴുക്ക് നീക്കം ചെയ്യാനും ബാക്‌ടീരിയകളുടെ വളർച്ച തടയാനും ഈ പാക്ക് ഗുണം ചെയ്യും.
എട്ട്...
ഒരു മുട്ടയുടെ വെള്ളയിലേക്ക് ഒരു ടേബിൾ സ്‌പൂൺ തേൻ ചേർത്ത് ഇളക്കി യോജിപ്പിക്കുക. ഇത് ചർമ്മത്തിൽ പുരട്ടി 15 മിനിട്ടിന് ശേഷം ചെറു ചൂടുവെള്ളത്തിൽ കഴുകി കളയുക. പ്രകമാകുന്നത്തിന്‍റെ ലക്ഷണങ്ങൾ കുറയ്ക്കാൻ ഇത് സഹായിക്കും.

ശ്രദ്ധിക്കുക: ഇവിടെ കൊടുത്തിരിക്കുന്ന എല്ലാ ആരോഗ്യ വിവരങ്ങളും നിർദ്ദേശങ്ങളും നിങ്ങളുടെ അറിവിലേക്കായി മാത്രമുള്ളതാണ്. ശാസ്ത്രീയ ഗവേഷണം, പഠനങ്ങൾ, ആരോഗ്യ പ്രൊഫഷണലുകൾ നൽകുന്ന ഉപദേശങ്ങൾ എന്നിവയുടെ അടിസ്ഥാനത്തിലാണ് ഈ വിവരങ്ങൾ നൽകുന്നത്. എന്നാൽ, ഇവ പിന്തുടരുന്നതിന് മുമ്പ് ഒരു ഡോക്‌ടറുടെ നിർദേശം തേടേണ്ടതാണ്.