മഗാരാക്: തുര്‍ക്കിയിലെ വീട്ടില്‍ രണ്ട് പതിറ്റാണ്ടുകള്‍ക്ക് ശേഷം തിരിച്ചെത്തിയ മെഹ്‌മത് എര്‍ടര്‍ക്കിന് ഭാര്യ, അയാള്‍ക്ക് വേണ്ടി തയാറാക്കിയ ഭക്ഷണം കഴിക്കാന്‍ സാധിച്ചില്ല. കാരണം മറ്റൊന്നുമല്ല, ഇരുപത് വര്‍ഷമായി സിറിയയിലെ ജയിലില്‍ കഴിഞ്ഞ അദ്ദേഹത്തിന്‍റെ പകുതിയിലേറെ പല്ലുകളും കൊഴിഞ്ഞിരുന്നു. ബാക്കിയുള്ള പല്ലുകള്‍ എപ്പോള്‍ വേണമെങ്കിലും കൊഴിയാവുന്ന അവസ്ഥയിലും ആണ്.
സിറിയന്‍ ജയിലില്‍ താന്‍ അനുഭവിച്ച കൊടുംയാതനകള്‍ അദ്ദേഹം എഎഫ്‌പിയുമായി പങ്കുവച്ചു. പീഡനങ്ങള്‍ക്ക് മേല്‍ പീഡനങ്ങള്‍ നിറഞ്ഞ ദിനരാത്രങ്ങള്‍. 2004ല്‍ കള്ളക്കടത്തിന്‍റെ പേര് പറഞ്ഞാണ് എര്‍ടര്‍ക്കിനെ അറസ്റ്റ് ചെയ്യുന്നത്. കഴിഞ്ഞ തിങ്കളാഴ്‌ച വൈകിട്ട് അദ്ദേഹം തന്‍റെ വീട്ടിലേക്ക് മടങ്ങി എത്തിയിരിക്കുന്നു. സിറിയന്‍ അതിര്‍ത്തിയില്‍ നിന്ന് കേവലം പത്ത് മിനിറ്റ് മാത്രം യാത്രയുള്ള ഗ്രാമത്തിലാണ് അദ്ദേഹത്തിന്‍റെ വീട്. ഒലിവ് മരങ്ങള്‍ നിറഞ്ഞ അതിമനോഹരമായ ഗ്രാമം.
തന്‍റെ കുടുംബാംഗങ്ങള്‍ കരുതിയിരുന്നത് താന്‍ മരിച്ചു പോയി എന്നാണെന്ന് അദ്ദേഹം വ്യക്തമാക്കുന്നു. 53കാരനായ എര്‍ടര്‍ക്കിന്‍റെ വാക്കുകളും നടപ്പുമെല്ലാം അദ്ദേഹത്തിന് ഒരു ഇരുപത് വയസ് കൂടിയ പോലെ തോന്നിപ്പിച്ചു. 'താന്‍ പുറത്തിറങ്ങിയ രാത്രി വെടിയൊച്ചകള്‍ കേട്ടയുടന്‍ പ്രാര്‍ഥിക്കാന്‍ തുടങ്ങി. എന്താണ് പുറത്ത് സംഭവിക്കുന്നതെന്ന് മനസിലായിരുന്നില്ല. താന്‍ തീര്‍ന്നെന്ന് തന്നെ ആണ് കരുതിയത്. മിനിറ്റുകള്‍ക്കകം വലിയ ചുറ്റികകളുടെ ഒച്ചകള്‍ മുഴങ്ങി. ജയിലിന്‍റെ കവാടങ്ങള്‍ വിമതര്‍ തുറന്നു.' സിറിയന്‍ ഭരണാധികാരി ബാഷര്‍ അല്‍ അസദിനെ അധികാര ഭ്രഷ്‌ടനാക്കിയ ശേഷം സിറിയയില്‍ അരങ്ങേറിയ നാടകീയ സംഭവങ്ങള്‍ വിവരിക്കുകയായിരുന്നു അദ്ദേഹം.
ശവപ്പെട്ടിയിലെന്ന പോലെ കഴിഞ്ഞ കാലം
പതിനൊന്ന് വര്‍ഷമായി അദ്ദേഹത്തെ തങ്ങള്‍ കണ്ടിട്ടേയില്ല. യാതൊരു പ്രതീക്ഷയും ഉണ്ടായിരുന്നില്ല-അദ്ദേഹത്തിന്‍റെ ഭാര്യ ഹതീസ് സമ്മതിക്കുന്നു. പിതാവ് അറസ്റ്റിലാകുമ്പോള്‍ കേവലം ആറ് മാസം മാത്രം പ്രായമുണ്ടായിരുന്ന ഇളയ മകള്‍ക്കൊപ്പം വീടിന് പുറത്ത് ഭക്ഷണം ഉണ്ടാക്കിക്കൊണ്ടിരുന്നാണ് അവർ ഇത് പറഞ്ഞത്. പതിനഞ്ച് കൊല്ലത്ത തടവിന് ശിക്ഷിച്ച ഇദ്ദേഹത്തെ ജയില്‍ അധികൃതര്‍ തുരങ്ക ജയിലില്‍ അടച്ചു. നാല് മക്കളാണ് ഇദ്ദേഹത്തിന് ഉണ്ടായിരുന്നത്.
തങ്ങളുടെ കൈക്കുഴകളില്‍ ചുറ്റിക കൊണ്ട് അടിക്കുമ്പോള്‍ എല്ലുകള്‍ പുറത്ത് വന്നിരുന്നുവെന്നും അദ്ദേഹം ഓർത്തെടുക്കുന്നു. ഒരു തടവുകാരന്‍റെ കഴുത്തിന് താഴേക്ക് തിളച്ച വെള്ളം ഒഴിച്ചായിരുന്നു ക്രൂരത. കഴുത്ത് മുതല്‍ താഴേക്കുള്ള മാംസം പൊള്ളിയടര്‍ന്നു. തങ്ങള്‍ക്ക് കഴിക്കാന്‍ തന്നിരുന്ന ഭക്ഷണത്തില്‍ കൂറകളുണ്ടായിരുന്നു.
ഭക്ഷണവും വസ്‌ത്രവും വെള്ളവും ഇല്ലാതെ കഴിഞ്ഞ് പോയ ആ ദിനങ്ങളെ അയാള്‍ ഓര്‍ത്തെടുക്കുന്നു. ശവപ്പെട്ടിക്കുള്ളില്‍ കഴിയുന്ന പോലെ ആയിരുന്നു അത്. ജയില്‍ നിറയെ അന്തേവാസികളായിരുന്നു. 20 പേര്‍ക്കുള്ള ഇടങ്ങളില്‍ 115 മുതല്‍ 120 പേര് വരെ ആയിരുന്നു. പലരും പട്ടിണി കിടന്ന് മരണത്തിന് കീഴടങ്ങി. ആ മൃതദേഹങ്ങള്‍ അവര്‍ വലിച്ചെറിഞ്ഞു.
തുര്‍ക്കികളായ തങ്ങള്‍ക്ക് ഏറെ വെല്ലുവിളികള്‍ നേരിടേണ്ടി വന്നു. തന്‍റെ രാജ്യത്തിന്‍റെ പേരില്‍ മരുന്നുകള്‍ പോലും നിഷേധിക്കപ്പെട്ടു. തന്നെ അവര്‍ തൂക്കിക്കൊല്ലുമെന്ന് ഭയന്നു. തങ്ങളെ മറ്റൊരു ജയില്‍ ബ്ലോക്കിലേക്ക് പിന്നീട് മാറ്റി. അവിടെ മേല്‍ക്കൂരയില്‍ നിന്നൊരു കയര്‍ തൂങ്ങിക്കിടന്നിരുന്നു.
തന്നോടൊപ്പം ജയിലിലുണ്ടായിരുന്ന പട്ടിണി കൊണ്ട് മരിച്ച ഒരാളുടെ ചിത്രവും അദ്ദേഹം കാട്ടിത്തന്നു. താന്‍ രക്ഷപ്പെട്ടതിന് അദ്ദേഹം ദൈവത്തിന് നന്ദി പറഞ്ഞു. ലണ്ടന്‍ ആസ്ഥാനമാക്കി പ്രവര്‍ത്തിക്കുന്ന സിറിയന്‍ ഒബ്‌സര്‍വേറ്ററി ഫോര്‍ ഹ്യൂമന്‍ റൈറ്റ്‌സിന്‍റെ കണക്കുകള്‍ പ്രകാരം 2011ല്‍ യുദ്ധം ആരംഭിച്ച ശേഷം 105,000 പേര് തടവിലാക്കപ്പെട്ടിരുന്നു.
