ടോക്കിയോ: ലോകത്തിന് ഏതൊരുകാലത്തും പിന്തുടരാൻ കഴിയുന്ന ഏറ്റവും മികച്ച മാതൃകയാണ് ഇന്ത്യയുടെ രാഷ്‌ട്രപിതാവ് മഹാത്മ ഗാന്ധിയെന്ന് വിദേശകാര്യമന്ത്രി എസ് ജയശങ്കര്‍. ടോക്കിയോ എഡോഗാവയിലെ ഫ്രീഡം പ്ലാസയിൽ മഹാത്മാഗാന്ധിയുടെ പ്രതിമ അനാച്ഛാദനം ചെയ്‌ത ശേഷം സംസാരിക്കവെയാണ് അദ്ദേഹത്തിന്‍റെ പ്രതികരണം. ഗാന്ധിജിയുടെ ജീവിതത്തിലൂടെയുള്ള സന്ദേശങ്ങൾ കാലാതീതമായവയാണെന്നും അദ്ദേഹം കൂട്ടിച്ചേര്‍ത്തു.
ക്വാഡ് വിദേശകാര്യമന്ത്രിമാരുടെ യോഗത്തോട് അനുബന്ധിച്ചായിരുന്നു ജയശങ്കര്‍ ടോക്കിയോയിലേക്ക് എത്തിയത്. എഡോഗാവ മേയര്‍ തകേഷി സൈറ്റോ, ജപ്പാനിലെ ഇന്ത്യൻ അംബാസഡർ സിബി ജോര്‍ജ്, മറ്റ് ജാപ്പനീസ് മന്ത്രിമാര്‍ എന്നിവരെല്ലാം ഗാന്ധി പ്രതിമയുടെ അനാച്ഛാദന ചടങ്ങില്‍ പങ്കെടുത്തു. ജപ്പാനിലെ സ്‌കൂള്‍ വിദ്യാര്‍ഥികള്‍ ഗാന്ധിയുടെ പ്രിയപ്പെട്ട ഭജനയായ 'രഘുപതി രാഘവ രാജാറാം' ആലപിക്കവെയാണ് പ്രതിമയുടെ അനാച്ഛാദനം നടന്നത്.
ഈ പ്രവര്‍ത്തിയിലൂടെ ജപ്പാൻ ഇന്ത്യയുമായുള്ള ബന്ധം കൂടുതൽ ദൃഢമാക്കാൻ ആഗ്രഹിക്കുന്നുവെന്ന് ജയശങ്കർ പറഞ്ഞു. മഹാത്മ ഗാന്ധിയുടെ പ്രതിമ സ്ഥാപിച്ചിരിക്കുന്ന ഇടത്തിനും പാര്‍ക്കിനും അദ്ദേഹത്തിന്‍റെ പേര് നല്‍കുമെന്ന് എഡോഗാവ മേയർ നേരത്തെ വ്യക്തമാക്കിയിരുന്നുവെന്നും കൂട്ടിച്ചേര്‍ത്തു.
യുദ്ധക്കളത്തിൽ നിന്ന് ഒരു പരിഹാരവും വരുന്നില്ലെന്നും ഒരു യുഗവും യുദ്ധമാകരുതെന്നുമുള്ള ഗാന്ധിയുടെ സന്ദേശം 80 വർഷം മുമ്പത്തെപ്പോലെ ഇന്നും ബാധകമാണെന്നും ജയശങ്കർ പറഞ്ഞു. ഗാന്ധിയുടെ സന്ദേശം പ്രായോഗികമാക്കേണ്ടത് പ്രധാനമാണ്. സുസ്ഥിരത, കാലാവസ്ഥ സൗഹൃദം, ഹരിത വളർച്ച, നയങ്ങൾ എന്നിവയെക്കുറിച്ചാണ് നാമെല്ലാവരും ചിന്തിക്കുന്നത്.
പ്രകൃതിയുമായി ഇണങ്ങി ജീവിക്കാനുള്ള ഏറ്റവും വലിയ വക്താവായിരുന്നു ഗാന്ധി. ഇത് കേവലം സർക്കാർ ചെയ്യേണ്ട കാര്യമല്ല, വ്യക്തിപരമായ ജീവിതത്തിൽ എല്ലാവരും ചെയ്യേണ്ടതാണെന്നായിരുന്നു ഗാന്ധിയുടെ സന്ദേശമെന്നും അദ്ദേഹം പറഞ്ഞു. ജപ്പാൻ തന്‍റെ രണ്ടാമത്തെ വീട് പോലെയല്ല, മറിച്ച് ഒന്നാണെന്നും, എല്ലാ ജാപ്പനീസ് സുഹൃത്തുക്കൾക്കും നന്ദി അറിയിച്ചുകൊണ്ട്‌ ജയശങ്കർ പറഞ്ഞു.
ALSO READ: ജോ ബൈഡനെ ഭീഷണിപ്പെടുത്തിയാണ് സ്ഥാനാര്‍ഥിത്വത്തില്‍ നിന്ന് ഒഴിപ്പിച്ചത് : ഡൊണാള്‍ഡ് ട്രംപ്
