വാഷിങ്ടൺ : ജോർജിയയിലെ സ്‌കൂളിലുണ്ടായ വെടിവയ്പ്പിൽ അനുശോചനം രേഖപ്പെടുത്തി പ്രസിഡന്‍റ് ജോ ബൈഡൻ. തോക്ക് സുരക്ഷ നിയമം പാസാക്കുന്നതിന് യുഎസ് കോൺഗ്രസിൽ ഡെമോക്രാറ്റുകളുമായി ചേർന്ന് പ്രവർത്തിക്കാൻ റിപ്പബ്ലിക്കൻസിനോട് ബൈഡൻ ആഹ്വാനം ചെയ്‌തു.
ഇത്തരം ആക്രമണങ്ങള്‍ ഇനിയും സാധരണമായി കണക്കാക്കാനാകില്ലെന്ന് ബൈഡന്‍ പറഞ്ഞു. ഇത് സാധാരണമായി അംഗീകരിക്കാൻ കഴിയില്ല. വിഷയത്തില്‍ ഫെഡറൽ, സംസ്ഥാന, പ്രാദേശിക തലങ്ങളിലെ ഉദ്യോഗസ്ഥരുമായി സഹകരിച്ച് പ്രവർത്തിക്കുകയാണെന്നും ബൈഡന്‍ ആഹ്വാനം ചെയ്‌തു.
'ബുദ്ധിശൂന്യമായ അക്രമം മൂലം ജീവന്‍ പൊലിഞ്ഞവരെ ഓര്‍ത്ത് ഞാനും ജില്ലും വിലപിക്കുന്നു, അതിജീവിച്ച എല്ലാവരുടെയും ജീവിതം എന്നെന്നേക്കുമായി മാറിമറിഞ്ഞിരിക്കുകയാണ്. ആഹ്ലാദകരമായ ബാക്ക്-ടു-സ്‌കൂൾ സീസൺ ആയിരിക്കേണ്ട വിന്‍ഡര്‍, അക്രമം നമ്മുടെ കമ്മ്യൂണിറ്റികളെ എങ്ങനെ കീറിമുറിക്കുന്നു എന്നതിന്‍റെ ഭയാനകമായ മറ്റൊരു ഓർമ്മപ്പെടുത്തലായി മാറിയിരിക്കുന്നു.'- ബൈഡന്‍ പ്രതികരിച്ചു.
എഴുതാനും വായിക്കാനും പഠിക്കേണ്ട വിദ്യാര്‍ഥികള്‍ ഒഴിഞ്ഞുമാറാനും ഓടിയൊളിക്കാനും പഠിക്കേണ്ടി വരുന്നത് ഗതികേടാണെന്നും ബൈഡന്‍ വിലപിച്ചു. ബൈപാർട്ടിസൻ സേഫർ കമ്മ്യൂണിറ്റീസ് ആക്‌ടിൽ ഒപ്പിടുന്നത് ഉൾപ്പെടെയുള്ള പരിഹാര മാര്‍ഗങ്ങള്‍ തേടുമെന്നും യുഎസ് പ്രസിഡന്‍റ് വ്യക്തമാക്കി.
ജോർജിയ വിൻഡറിലെ അപാലാച്ചി ഹൈസ്‌കൂളില്‍ ബുധനാഴ്‌ച രാവിലെയാണ് 14 കാരനായ വിദ്യാർഥി വെടിയുതിര്‍ത്തത്. ആക്രമണത്തില്‍ രണ്ട് വിദ്യാര്‍ഥികളും രണ്ട് അധ്യാപകരും കൊല്ലപ്പെട്ടു. 9 പേര്‍ പരിക്കുകളോടെ ചികിത്സയിലാണ്. വെടിയുതിര്‍ത്ത കോൾട്ട് ക്രേ എന്ന വിദ്യാര്‍ഥിയെ പൊലീസ് ജീവനോടെ പിടികൂടിയിട്ടുണ്ട്. വെടിവയ്പ്പിന് പിന്നിലെ കാരണം ഏജൻസികൾ അന്വേഷിച്ച് വരികയാണ്.
Also Read: അമേരിക്കയിലെ വെടിവയ്പ്പ്; തോക്ക് നിയമങ്ങൾ കർശനമാക്കണമെന്ന് വൈറ്റ് ഹൗസ്
