സിംഗപ്പൂര്‍സിറ്റി: സിംഗപ്പൂരില്‍ ഇന്ത്യയുടെ നിക്ഷേപം നടത്താനുള്ള ഒരു ഓഫിസ് സ്ഥാപിക്കുമെന്ന് പ്രധാനമന്ത്രി നരേന്ദ്ര മോദി. സിംഗപ്പൂരിലെ നിക്ഷേപകര്‍ക്ക് ഇന്ത്യയിലെ വിവിധ മേഖലകളില്‍ നിക്ഷേപം നടത്താനുള്ള സാധ്യതകള്‍ക്കും സഹായങ്ങള്‍ക്കുമായാണ് ഇത്തരമൊരു ഓഫിസ് വിഭാവന ചെയ്യുന്നതെന്നും പ്രധാനമന്ത്രി വ്യക്തമാക്കിയെന്ന് വിദേശകാര്യമന്ത്രാലയം അറിയിച്ചു.
ഇത് അവസരങ്ങളുടെ സമയമാണ്. വന്‍തോതിലുള്ള അവസരങ്ങള്‍ വളരെ വേഗത്തില്‍ സൃഷ്‌ടിക്കപ്പെടുന്നുവെന്നും വിദേശകാര്യമന്ത്രാലയ സെക്രട്ടറി ജയ്‌ദീപ് മജുംദാര്‍ ചൂണ്ടിക്കാട്ടി. ഇന്ത്യ എന്താണ് വാഗ്‌ദാനം ചെയ്യുന്നതെന്ന് പ്രധാനമന്ത്രിയില്‍ നിന്ന് തന്നെ നേരിട്ടറിയൂവെന്നും സിംഗപ്പൂരിലെ പ്രമുഖ കമ്പനികളുടെ മേധാവികളോട് അദ്ദേഹം നിര്‍ദ്ദേശിച്ചു.
പ്രധാനമന്ത്രിയുടെ രണ്ട് ദിവസത്തെ സന്ദര്‍ശനത്തിനിടയിലെ വിവിധ യോഗങ്ങളും ആശയവിനിമയങ്ങളും സംബന്ധിച്ച വിവരങ്ങളെക്കുറിച്ചും അദ്ദേഹം വിശദീകരിച്ചു. നാല് ധാരണപത്രങ്ങളില്‍ ഇരുരാജ്യങ്ങളും ഒപ്പ് വയ്ക്കും. ഡിജിറ്റല്‍ സാങ്കേതികത, നൈപുണ്യ വികസനം, വിദ്യാഭ്യാസം, ആരോഗ്യ പരിപാലനം തുടങ്ങിയ മേഖലകളിലെ സഹകരണത്തിന് വേണ്ട പരിസ്ഥിതികള്‍ ഒരുക്കാന്‍ ലക്ഷ്യമിട്ടുള്ള ധാരണപത്രങ്ങളിലാണ് ഒപ്പുവയ്ക്കുന്നത്.
ഇന്ത്യയും സിംഗപ്പൂരും തമ്മില്‍ ഭാവിയിലേക്കുള്ള ബന്ധത്തിന് തയാറായിക്കഴിഞ്ഞു. ഇന്ത്യയുടെ രാഷ്‌ട്രീയ സുസ്ഥിരത, നയ പ്രവചനാത്മകത, പുത്തന്‍ പരിഷ്‌കാരങ്ങളിലൂന്നിയ സാമ്പത്തിക അജണ്ടകള്‍ എന്നിവയാണ് ഇന്ത്യ മുന്നോട്ട് വയ്ക്കുന്നതെന്നും മജുംദാര്‍ ചൂണ്ടിക്കാട്ടി. പ്രധാനമന്ത്രി നരേന്ദ്ര മോദി സിംഗപ്പൂരിലെ പ്രമുഖ കമ്പനിയായ എഇഎം സന്ദര്‍ശിക്കുന്നുണ്ട്. ഇലക്‌ട്രോണിക്‌സ്, സെമികണ്ടക്‌ടര്‍ മേഖലയിലെ പ്രമുഖ കമ്പനിയാണിത്. ആഗോള തലത്തില്‍ സെമികണ്ടക്‌ടര്‍ മൂല്യ ശൃംഖലയില്‍ എഇഎമ്മിന്‍റെ പങ്കിനെക്കുറിച്ചും അദ്ദേഹം ചൂണ്ടിക്കാട്ടി.
ഇന്ത്യയില്‍ നിന്നും സിംഗപ്പൂരില്‍ നിന്നുമുള്ള ഒരു സംഘം പരിശീലകരുമായി ഇരുരാജ്യത്തെയും പ്രധാനമന്ത്രിമാര്‍ സംവാദം നടത്തും. സെമികണ്ടക്‌ടര്‍ മേഖലയില്‍ പ്രവര്‍ത്തിക്കുന്ന കമ്പനികളുടെ മേധാവിമാരെ പ്രധാനമന്ത്രി മോദി ഈ മാസം 11 മുതല്‍ 13 വരെ നടക്കുന്ന സെമികോണ്‍ ഇന്ത്യ എക്‌സിബിഷന്‍ ആന്‍ഡ് കോണ്‍ഫറന്‍സിലേക്ക് ക്ഷണിച്ചിട്ടുണ്ട്.
ഇരുരാജ്യങ്ങളും തമ്മിലുള്ള ബന്ധം കൂടുതല്‍ വര്‍ധിപ്പിക്കും. സിംഗപ്പൂരില്‍ ഇതാദ്യമായി തിരുവള്ളുവര്‍ സാംസ്‌കാരിക കേന്ദ്രം സ്ഥാപിക്കുന്നതിനെക്കുറിച്ചും പ്രധാനമന്ത്രി പ്രഖ്യാപിച്ചു. ഇരുരാജ്യങ്ങളും തമ്മിലുള്ള ഉഭയകക്ഷി ബന്ധത്തിലെ സമഗ്രമായ തന്ത്രപര പങ്കാളിത്തത്തെക്കുറിച്ചും പ്രഖ്യാപനമുണ്ടാകും.
ഇടിവി ഭാരത് കേരളം ഇനി വാട്‌സ്‌ആപ്പിലും
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
നേരത്തെ സിംഗപ്പൂര്‍ പ്രസിഡന്‍റ് തര്‍മാന്‍ ഷണ്‍മുഗര്‍ത്തനുമായി നടന്ന കൂടിക്കാഴ്‌ചയില്‍ ഇരുരാജ്യങ്ങളുടെയും സഹകരണം ശക്തിപ്പെടുത്തേണ്ട മേഖലകളെക്കുറിച്ചും ചര്‍ച്ച ചെയ്‌തു. മുതിര്‍ന്ന മന്ത്രി ലീ ഹസിയന്‍ ലൂങ് നടത്തിയ ഉച്ചവിരുന്നിലും മോദി പങ്കെടുത്തു. ഇന്ത്യ-സിംഗപ്പൂര്‍ ഉഭയകക്ഷി ബന്ധത്തെക്കുറിച്ച് ഇരുവരും ചര്‍ച്ച ചെയ്‌തു. സിംഗപ്പൂര്‍ പ്രധാനമന്ത്രി ലോറന്‍സ് വോങിനെ ഇന്ത്യ സന്ദര്‍ശിക്കാന്‍ പ്രധാനമന്ത്രി മോദി ക്ഷണിച്ചു. ക്ഷണം അദ്ദേഹം സ്വീകരിച്ചിട്ടുമുണ്ട്.
Also Read: പ്രധാനമന്ത്രി നരേന്ദ്ര മോദി സിംഗപ്പൂരിൽ; ലോറൻസ് വോങ്ങുമായി ചർച്ച
