കഴിഞ്ഞ ദിവസമാണ് കുവൈറ്റിലെ ഒരു കെട്ടിടത്തിലുണ്ടായ വന്‍ തീപിടിത്തത്തില്‍ നാല്‍പത്തഞ്ചോളം ഇന്ത്യക്കാര്‍ക്ക് ജീവന്‍ നഷ്‌ടമായത്. ആകെ 49 വിദേശ തൊഴിലാളികളാണ് ഈ ദുരന്തത്തില്‍ മരിച്ചത്. ഇന്ത്യയെ സംബന്ധിച്ചിടത്തോളം വലിയ നയതന്ത്ര പങ്കാളിയാണ് ഗള്‍ഫ്. 87 ലക്ഷം ഇന്ത്യാക്കാരാണ് ഗള്‍ഫ് മേഖലയില്‍ താമസിച്ച് പണിയെടുക്കുന്നത്. ഇവരില്‍ ഏറ്റവും കൂടുതല്‍ പേര്‍ അധിവസിക്കുന്നത് യുഎഇയിലുമാണ്.
35 ലക്ഷം ഇന്ത്യാക്കാര്‍ യുഎഇയില്‍ ജീവിക്കുന്നു. കഴിഞ്ഞ ഒരു പതിറ്റാണ്ടിനിടെ ആറ് ഗള്‍ഫ് രാജ്യങ്ങളിലുമായി 63,000 ത്തിലേറെ ഇന്ത്യന്‍ കുടിയേറ്റക്കാര്‍ക്ക് ജീവന്‍ നഷ്‌ടമായി. ഇതില്‍ 29,000 പേര്‍ മരിച്ചത് കഴിഞ്ഞ നാല് വര്‍ഷത്തിനിടെയാണ്.
ഗള്‍ഫ് രാജ്യങ്ങളിലെ ഇന്ത്യന്‍ ജനത
87,51,086 ഇന്ത്യാക്കാര്‍ ഗള്‍ഫ് രാജ്യങ്ങളില്‍ കഴിയുന്നുവെന്നാണ് 2022 ഡിസംബര്‍ ഒന്‍പതിന് ലോക്‌സഭയില്‍ ഉന്നയിക്കപ്പെട്ട ഒരു ചോദ്യത്തിന് ലഭിച്ച മറുപടി. ഇതില്‍ യുഎഇയില്‍ മാത്രം 35,54,274 ഇന്ത്യാക്കാരുണ്ട്. ഇന്ത്യന്‍ പ്രവാസികളുടെ എണ്ണത്തില്‍ തൊട്ടുപിന്നിലുള്ളത് സൗദി അറേബ്യയാണ്. 24,65,464 ഇന്ത്യാക്കാരാണ് സൗദിയിലുള്ളത്. ഖത്തറില്‍ 8,44,499 ഇന്ത്യാക്കാരുണ്ട്. കുവൈറ്റില്‍ 9,24,687, പേരും ഒമാനില്‍ 6,53,500 ഇന്ത്യാക്കാരും ജീവിക്കുന്നു. ബഹ്റൈനിലാണ് ഇന്ത്യന്‍ പ്രവാസികളുെട എണ്ണം ഏറ്റവും കുറവ്. ഇവിടെ കേവലം 3,08,662 ഇന്ത്യാക്കാര്‍ മാത്രമാണ് ഉള്ളത്.
1970 ല്‍ എണ്ണ വ്യവസായ രംഗത്തുണ്ടായ കുതിപ്പോടെയാണ് ഇന്ത്യന്‍ തൊഴിലാളികളുടെ ഗള്‍ഫ് കുടിയേറ്റത്തില്‍ വന്‍ വര്‍ദ്ധനയുണ്ടായത്. സാമ്പത്തിക പുരോഗതി വര്‍ദ്ധിക്കുന്നത് അനുസരിച്ച് അങ്ങോട്ടുള്ള കുടിയേറ്റത്തിലും വര്‍ദ്ധനയുണ്ടായി. ദക്ഷിണേഷ്യന്‍ രാജ്യങ്ങളില്‍ നിന്നുള്ള തൊഴിലാളികള്‍ക്കായിരുന്നു ഗള്‍ഫ് രാജ്യങ്ങളില്‍ ഏറെ പ്രിയം. നൈപുണ്യം ആവശ്യമില്ലാത്ത തൊഴിലുകളില്‍ വളരെ തുച്‌ഛമായ വേതനത്തില്‍ ഇവര്‍ ജോലി ചെയ്യും എന്നതായിരുന്നു ഇതിന് കാരണം.
നിലവില്‍ അവിടെ ജോലി ചെയ്യുന്ന 70 ശതമാനം ഇന്ത്യാക്കാരും നിര്‍മ്മാണ മേഖലയില്‍ തൊഴിലാളികളോ സാങ്കേതിക വിദഗ്‌ധരോ വീട്ടുജോലിക്കാരോ ഡ്രൈവര്‍മാരോ ആണ്. കഴിഞ്ഞ പതിറ്റാണ്ട് മുതല്‍ നൈപുണ്യവും ഉയര്‍ന്ന നൈപുണ്യവുമുള്ളവരുടെ ഗള്‍ഫ് കുടിയേറ്റത്തിലും വന്‍ വര്‍ദ്ധന ഉണ്ടായിട്ടുണ്ട്.
