റാഫ: സഹായത്തിനായി കാത്ത് നിന്ന പലസ്‌തീനികള്‍ക്ക് നേരെയുണ്ടായ ആക്രമണത്തില്‍ 70 പേര്‍ കൊല്ലപ്പെട്ടതായി ഗാസയിലെ ആരോഗ്യമന്ത്രാലയം. ഗാസ നഗരത്തില്‍ ഇന്ന് രാവിലെയുണ്ടായ ആക്രമണത്തില്‍ 280 പേര്‍ക്ക് പരിക്കേറ്റതായും ആരോഗ്യമന്ത്രാലയ വക്താവ് അഷറഫ് അല്‍ഖ്വിദ്ര അറിയിച്ചു(Gaza's Health Ministry).
പരിക്കേറ്റ നിരവധി പേരെ ആശുപത്രിയിലേക്ക് കഴുത വണ്ടിയിലും മറ്റും എത്തിക്കുന്നതിന്‍റെ ദൃശ്യങ്ങള്‍ അല്‍ജസീറ സംപ്രേഷണം ചെയ്‌തു . ഒക്‌ടോബര്‍ ഏഴിന് ഇസ്രയേല്‍ ആരംഭിച്ച കര-വ്യോമ-കടല്‍ ആക്രമണങ്ങളില്‍ വടക്കന്‍ ഗാസയായിരുന്നു അവരുടെ ആദ്യ ലക്ഷ്യം. കനത്ത നാശനഷ്‌ടങ്ങളാണ് മേഖലയില്‍ ഉണ്ടായിരിക്കുന്നത്. മാസങ്ങളായി ഇവര്‍ക്ക് രാജ്യത്തെ മറ്റിടങ്ങളുമായി യാതൊരു ബന്ധവുമില്ല. സഹായങ്ങളും എങ്ങുനിന്നും ലഭിക്കുന്നുമില്ല(Palestinians Waiting For Aid).
ഗാസയുടെ പല ഭാഗത്തും സഹായമെത്തിക്കാനാകുന്നില്ലെന്ന് സന്നദ്ധ സംഘടനകളും പറയുന്നു. സഹായവുമായി എത്തുന്ന വാഹനങ്ങള്‍ക്ക് നേരെ വലിയ ജനക്കൂട്ടങ്ങള്‍ പാഞ്ഞടുക്കുകയാണ്. ഗാസയിലെ 23 ലക്ഷം ജനതയുടെ മുക്കാല്‍ പങ്കും കൊടുംപട്ടിണിയിലാണെന്ന് ഐക്യരാഷ്‌ട്രസഭ പറയുന്നു. ഇന്ന് നടന്ന ആക്രമണത്തില്‍ അന്‍പത് പേര്‍ മരിച്ചതായി ഷിഫ ആശുപത്രിയിലെ നഴ്‌സിംഗ് വിഭാഗം മേധാവി ഡോ ജദല്ല ഷഫായി പറഞ്ഞു. 250 പേര്‍ക്ക് പരിക്കുണ്ടെന്നും അദ്ദേഹം അറിയിച്ചു. എന്നാല്‍ കൃത്യമായ കണക്കുകള്‍ നല്‍കാന്‍ അദ്ദേഹം തയാറായില്ല(70 Killed In Strike).
കമല്‍ അഡ്വാന്‍ ആശുപത്രിയില്‍ പത്ത് മൃതദേഹങ്ങളും 160 പരിക്കേറ്റവരെയും കൊണ്ടുവന്നതായി മേധാവി ഡോ. ഹുസാം അബു സാഫിയ പറഞ്ഞു. നൂറ് കണക്കിന് പേര്‍ നിലത്ത് കിടക്കുന്ന കാഴ്ചയാണ് അവിടെയെന്ന് ആശുപത്രിയിലെ ആംബുലന്‍സ് ഡ്രൈവര്‍ ഫറേസ് അഫാന പറഞ്ഞു. മൃതദേഹങ്ങളും പരിക്കേറ്റവരെയും കൊണ്ടു പോകുന്നതിന് മതിയായ ആംബുലന്‍സ് സൗകര്യം ലഭിക്കുന്നില്ലെന്നും അദ്ദേഹം ചൂണ്ടിക്കാട്ടി. പലരെയും കഴുത വണ്ടിയിലാണ് ആശുപത്രിയില്‍ എത്തിക്കുന്നത്.
അല്‍ അവ്ദ ആശുപത്രിയില്‍ 90 പരിക്കേറ്റവരെ പ്രവേശിപ്പിച്ചിട്ടുണ്ടെന്ന് ആശുപത്രി മേധാവി ഡോ.മുഹമ്മദ് സാല്‍ഹ പറഞ്ഞു. മൂന്ന് മൃതദേഹങ്ങളും ആശുപത്രിയില്‍ എത്തിച്ചിട്ടുണ്ട്. ഇവരെ കമല്‍ അദ്വാനിലേക്ക് മാറ്റി. മരിച്ചവരുടെ എണ്ണം വര്‍ദ്ധിക്കാമെന്നാം അദ്ദേഹം കൂട്ടിച്ചേര്‍ത്തു. പരിക്കേറ്റ നിരവധി പേര്‍ ഇപ്പോഴും റിസപ്ഷനിലും എമര്‍ജന്‍സി മുറിയിലുമുണ്ടെന്നും അദ്ദേഹം വ്യക്തമാക്കി. അല്‍ അവ്ദ ഏതാണ് പൂര്‍ണമായും തന്നെ പ്രവര്‍ത്തിക്കുന്നില്ല. ആശുപത്രിയിലെ വൈദ്യുതി പൂര്‍ണമായും നിലച്ചിരിക്കുകയാണ്. ബാറ്ററിയിലാണ് ശസ്‌ത്രക്രിയ മുറി പ്രവര്‍ത്തിക്കുന്നത്. മണിക്കൂറുകള്‍ മാത്രം പ്രവര്‍ത്തിക്കാനാവശ്യമായ ചാര്‍ജ് മാത്രമാണ് ഇനി അവശേഷിക്കുന്നതെന്നും അദ്ദേഹം വ്യക്തമാക്കി. ഇസ്രയേല്‍ -ഹമാസ് യുദ്ധം മൂലം ഗാസയിലെ ആരോഗ്യരംഗം അഞ്ച് മാസമായി കടുത്ത സമ്മര്‍ദ്ദത്തിലാണ്.
റിപ്പോര്‍ട്ടുകള്‍ തങ്ങള്‍ പരിശോധിച്ച് വരികയാണെന്ന് ഇസ്രയേല്‍ സൈന്യം അറിയിച്ചു. മരണസംഖ്യ സംബന്ധിച്ച് കൃത്യമായ കണക്കുകള്‍ ഗാസയിലെ ആരോഗ്യമന്ത്രാലയം നല്‍കിയിട്ടില്ല. യുദ്ധം തുടങ്ങിയ ശേഷം ഇതുവരെ മുപ്പതിനായിരം പലസ്‌തീനികള്‍ കൊല്ലപ്പെട്ടെന്നാണ് റിപ്പോര്‍ട്ട്. ഇതില്‍ മൂന്നിലൊന്നും സ്‌ത്രീകളും കുട്ടികളുമാണ്. സൈനികരും സാധാരണക്കാരും എത്രവീതമാണ് മരിച്ചതെന്ന് വ്യക്തമാക്കിയിട്ടില്ല.
ഹമാസ് നടത്തിയ പ്രത്യാക്രമണത്തില്‍ 12000 ഇസ്രയേലികള്‍ മരിച്ചെന്നാണ് റിപ്പോര്‍ട്ട്. ഇവരിലേറെയും നാട്ടുകാരാണ്. 250 പേരെ ഹമാസ് ബന്ദികളാക്കിയിട്ടുണ്ട്. 130 പേര്‍ ഇപ്പോഴും ഇവരുടെ പിടിയിലാണ്. ഇതില്‍ കുറേ പേര്‍ക്ക് ജീവന്‍ നഷ്‌ടമായിട്ടുണ്ടെന്നും റിപ്പോര്‍ട്ടുണ്ട്. നവംബറില്‍ ഒരാഴ്‌ച നീണ്ട വെടിനിര്‍ത്തലിനിടെ കുറേ പേരെ വിട്ടയച്ചിരുന്നു.
Also Read: ഗാസയിലെ ബന്ദികളെ മോചിപ്പിക്കണം, ഇസ്രയേല്‍ സര്‍ക്കാരിനോട് നടപടി ആവശ്യപ്പെട്ട് കൂറ്റന്‍ റാലി
