വാഴ്‌സ : ഇത് യുദ്ധത്തിന്‍റെ കാലമല്ലെന്ന് ഉറക്കെ ആവര്‍ത്തിച്ച് പ്രധാനമന്ത്രി നരേന്ദ്ര മോദി. ഏതൊരു സംഘര്‍ഷവും നയതന്ത്രത്തിലൂടെയും ചര്‍ച്ചകളിലൂടെയും പരിഹരിക്കണമെന്നും അദ്ദേഹം. യുക്രെയ്‌നിലെ സമാധാനത്തിന് വേണ്ടി ഇന്ത്യയുടെ പിന്തുണയുണ്ടെന്നും അദ്ദേഹം ഉറപ്പ് നല്‍കി.
കഴിഞ്ഞ ദിവസം വാഴ്‌സയിലെത്തിയ പ്രധാനമന്ത്രി നാളെ യുക്രെയ്ന് സന്ദര്‍ശിക്കും. ഇന്ന് ട്രെയിന്‍ മാര്‍ഗം അദ്ദേഹം പോളണ്ടില്‍ നിന്ന് വാഴ്‌സയിലേക്ക് തിരിക്കും. നാല്‍പ്പത്തിയഞ്ച് വര്‍ഷത്തിന് ശേഷമാണ് ആദ്യമായി ഒരു ഇന്ത്യന്‍ പ്രധാനമന്ത്രി പോളണ്ട് സന്ദര്‍ശിച്ചത്. 1979ല്‍ അന്നത്തെ പ്രധാനമന്ത്രി മൊറാര്‍ജി ദേശായ് ആണ് ഏറ്റവും ഒടുവില്‍ പോളണ്ട് സന്ദര്‍ശിച്ച ഇന്ത്യന്‍ പ്രധാനമന്ത്രി. യുക്രെയ്ന് സ്വതന്ത്രമായ ശേഷം ഇവിടം സന്ദര്‍ശിക്കുന്ന ആദ്യ പ്രധാനമന്ത്രി എന്ന പ്രത്യേകതയും അദ്ദേഹത്തിനുണ്ട്.
Thank you Warsaw! Today’s community programme was extremely lively and memorable.
— Narendra Modi (@narendramodi) August 21, 2024
Here are some glimpses. pic.twitter.com/b4KzxE2Zld
എല്ലാ രാജ്യങ്ങളുമായും അകലം പാലിക്കുക എന്നതാണ് പതിറ്റാണ്ടുകളായുള്ള ഇന്ത്യയുടെ നയമെന്ന് പോളണ്ടിന്‍റെ തലസ്ഥാനമായ വാഴ്‌സയില്‍ ഇന്ത്യന്‍ സമൂഹത്തെ അഭിസംബോധന ചെയ്യവേ മോദി വ്യക്തമാക്കി. എന്നാല്‍ എല്ലാരാജ്യങ്ങളുമായും അടുക്കുക എന്നതാണ് ഇന്നത്തെ ഇന്ത്യയുടെ നയമെന്നും അദ്ദേഹം കൂട്ടിച്ചേര്‍ത്തു.
ബുദ്ധന്‍റെ പാരമ്പര്യമുള്ള നാടാണ് ഇന്ത്യ. അത് കൊണ്ട് തന്നെ ഈ മേഖലയില്‍ സ്ഥിരം സമാധാനത്തിന് ഇന്ത്യ ഒരു വക്താവായി നിലകൊള്ളുമെന്നും അദ്ദേഹം അറിയിച്ചു. ഇന്ത്യയുടെ ആശയം വ്യക്തമാണ്. ഇത് യുദ്ധത്തിന്‍റെ കാലമല്ല. ആശയവിനിമയത്തിലൂടെയും നയതന്ത്രത്തിലൂടെയും തര്‍ക്കങ്ങള്‍ പരിഹരിക്കാനാകുമെന്നാണ് ഇന്ത്യയുടെ വിശ്വാസം.
പ്രസിഡന്‍റ് വ്ലാഡിമർ സെലെൻസ്‌കിയുടെ ക്ഷണപ്രകാരം യുക്രെയ്ൻ സന്ദർശിക്കുന്ന മോദി, നിലവിലുള്ള സംഘർഷം സമാധാനപരമായി പരിഹരിക്കുന്നതിനുള്ള കാഴ്‌ചപ്പാടുകൾ യുക്രേനിയൻ ഭരണാധികാരികളുമായി പങ്കിടുമെന്ന് പറഞ്ഞു. അമേരിക്കയുടെയും അവരുടെ ചില പാശ്ചാത്യ സഖ്യകക്ഷികളുടെയും വിമർശനത്തിന് കാരണമായ മോസ്കോയിലേക്കുള്ള അദ്ദേഹത്തിന്‍റെ യാത്രയ്ക്ക് ഏകദേശം ആറാഴ്‌ചയ്ക്ക് ശേഷമാണ് കീവ് സന്ദർശനം.
"ഇന്നത്തെ ഇന്ത്യ എല്ലാവരുമായും ബന്ധപ്പെടാൻ ആഗ്രഹിക്കുന്നു. ഇന്നത്തെ ഇന്ത്യ എല്ലാവരുടെയും വികസനത്തെക്കുറിച്ചാണ് സംസാരിക്കുന്നത്. ഇന്നത്തെ ഇന്ത്യ എല്ലാവരുടെയും കൂടെയാണ്, എല്ലാവരുടെയും താൽപ്പര്യങ്ങളെക്കുറിച്ച് ചിന്തിക്കുന്നു," മോദി പറഞ്ഞു. ഏതെങ്കിലും രാജ്യം പ്രതിസന്ധി നേരിടുകയാണെങ്കിൽ ആദ്യം സഹായ ഹസ്‌തം നീട്ടുന്നത് ഇന്ത്യയാണെന്നും അദ്ദേഹം പറഞ്ഞു.
"കൊവിഡ് വന്നപ്പോൾ ഇന്ത്യ പറഞ്ഞു - മനുഷ്യത്വത്തിന് ആദ്യം. ഞങ്ങൾ ലോകത്തിലെ 150 ലധികം രാജ്യങ്ങളിലേക്ക് മരുന്നുകളും വാക്‌സിനുകളും അയച്ചു. എവിടെ ഭൂകമ്പമോ ദുരന്തമോ ഉണ്ടായാലും ഇന്ത്യക്ക് മാനവികത എന്ന ഒരു മന്ത്രമേ ഉള്ളൂ," -അദ്ദേഹം പറഞ്ഞു.
ആഗോള വിതരണ ശൃംഖലയ്ക്ക് വളരെ നിർണായകമായ ഗുണനിലവാരമുള്ള ഉത്‌പാദനത്തിലും ഗുണനിലവാരമുള്ള മനുഷ്യശേഷിയിലുമാണ് ഇന്ത്യയുടെ മുഴുവൻ ശ്രദ്ധയെന്നും മോദി പറഞ്ഞു. "2024ലെ ബജറ്റിൽ, യുവാക്കളുടെ നൈപുണ്യവും തൊഴിലവസരങ്ങളും ഉറപ്പാക്കുന്നതിൽ ഞങ്ങൾ വളരെയധികം ശ്രദ്ധ കേന്ദ്രീകരിച്ചു, ഇന്ത്യയെ വിദ്യാഭ്യാസത്തിന്‍റെയും ഗവേഷണത്തിന്‍റെയും നവീകരണത്തിന്‍റെയും കേന്ദ്രമാക്കി മാറ്റാൻ ഞങ്ങൾ ആഗ്രഹിക്കുന്നു" -അദ്ദേഹം പറഞ്ഞു. രണ്ട് പതിറ്റാണ്ട് മുമ്പ് ഗുജറാത്തിൽ ഭൂകമ്പമുണ്ടായപ്പോൾ ആദ്യം സഹായിച്ച രാജ്യങ്ങളിലൊന്നാണ് പോളണ്ടെന്ന് മോദി അനുസ്‌മരിച്ചു.
"പോളണ്ടിലെ ജനങ്ങൾ ജാം സാഹിബിനും അദ്ദേഹത്തിന്‍റെ കുടുംബാംഗങ്ങൾക്കും വളരെയധികം സ്നേഹവും ബഹുമാനവും നൽകിയിട്ടുണ്ട്, മഹാരാജ സ്ക്വയർ അതിന്‍റെ സാക്ഷ്യമാണ്. ഇന്ന് ഞാൻ ഡോബ്രി മഹാരാജ സ്‌മാരകവും കോലാപ്പൂർ സ്‌മാരകവും സന്ദർശിച്ചു. ഈ അവസരത്തിൽ ജാം സാഹിബ് മെമ്മോറിയൽ യൂത്ത് ആക്ഷൻ പ്രോഗ്രാം ആരംഭിക്കാൻ ഇന്ത്യ തീരുമാനിച്ചതായി പ്രഖ്യാപിക്കാൻ ഞാൻ ആഗ്രഹിക്കുന്നു," അദ്ദേഹം പറഞ്ഞു.
ഈ പരിപാടിക്ക് കീഴിൽ, ഇന്ത്യ വർഷം തോറും 20 പോളിഷ് യുവാക്കളെ രാജ്യം സന്ദർശിക്കാൻ ക്ഷണിക്കും. ആയിരക്കണക്കിന് ഇന്ത്യൻ സൈനികരുടെ ത്യാഗത്തെ അനുസ്‌മരിപ്പിക്കുന്ന മോണ്ടെ കാസിനോ സ്‌മാരകത്തിൽ താൻ ആദരാഞ്ജലി അർപ്പിക്കുകയും ചെയ്‌തു. ലോകത്തിന്‍റെ എല്ലാ കോണിലും ഇന്ത്യക്കാർ തങ്ങളുടെ കർത്തവ്യം എങ്ങനെ നിർവഹിച്ചു എന്നതിന്‍റെ തെളിവാണിതെന്നും അദ്ദേഹം പറഞ്ഞു.
ഇരുപത്തിയൊന്നാം നൂറ്റാണ്ടിലെ ഇന്ത്യ അതിന്‍റെ മൂല്യങ്ങളിലും പൈതൃകത്തിലും അഭിമാനിക്കുമ്പോഴും വികസനത്തിന്‍റെ പാതയിൽ മുന്നേറുകയാണെന്ന് പ്രധാനമന്ത്രി പറഞ്ഞു. "ഞങ്ങൾ ഇന്ത്യക്കാർ ഞങ്ങളുടെ പ്രയത്നങ്ങൾക്കും പ്രവൃത്തികൾക്കും സഹാനുഭൂതിയ്ക്കും പേരുകേട്ടവരാണ്. എവിടെ പോയാലും ഞങ്ങൾ ഇന്ത്യക്കാർ പരമാവധി പരിശ്രമിക്കുന്നത് കാണാം. സംരംഭകത്വമോ പരിചരിക്കുന്നവരോ സേവന മേഖലയോ ആകട്ടെ, ഇന്ത്യക്കാർ അവരുടെ പരിശ്രമത്തിലൂടെ രാജ്യത്തിന് ബഹുമതികൾ കൊണ്ടുവരുന്നു," അദ്ദേഹം പറഞ്ഞു.
ഇന്ത്യയ്ക്കും പോളണ്ടിനും ഒരുപാട് സാമ്യമുണ്ടെന്നും മോദി പറഞ്ഞു. അതിലൊന്നാണ് ജനാധിപത്യം. ഇന്ത്യ ജനാധിപത്യത്തിന്‍റെ മാതാവ് മാത്രമല്ല, പങ്കാളിത്തവും ഊർജ്ജസ്വലവുമായ ജനാധിപത്യം കൂടിയാണ്. ഇന്ത്യയിലെ ജനങ്ങൾക്ക് ജനാധിപത്യത്തിൽ വളരെയധികം വിശ്വാസമുണ്ട്, ഇത് സമീപകാല (ലോക്‌സഭ) തെരഞ്ഞെടുപ്പിൽ പ്രകടമായിരുന്നു, അദ്ദേഹം പറഞ്ഞു. ചരിത്രത്തിലെ ഏറ്റവും വലിയ തെരഞ്ഞെടുപ്പായിരുന്നു ഈ തെരഞ്ഞെടുപ്പെന്ന് അദ്ദേഹം എടുത്തുപറഞ്ഞു.
"അടുത്തിടെ, 180 ദശലക്ഷം വോട്ടർമാർ പങ്കെടുത്ത യൂറോപ്യൻ യൂണിയനിലും തെരഞ്ഞെടുപ്പ് നടന്നു. ഇന്ത്യയിൽ ഇത് 640 ദശലക്ഷമായിരുന്നു," അദ്ദേഹം പറഞ്ഞു. തന്‍റെ മൂന്നാം ടേമിൽ ഇന്ത്യ ലോകത്തിലെ മൂന്നാമത്തെ വലിയ സമ്പദ്‌വ്യവസ്ഥയായി മാറുമെന്ന് താൻ വാഗ്‌ദാനം ചെയ്‌തിട്ടുണ്ടെന്നും മോദി പറഞ്ഞു. "ഡിജിറ്റൽ ഇൻഫ്രാസ്ട്രക്‌ചർ കാരണം ഈ ദശകത്തിന്‍റെ അവസാനത്തോടെ ഇന്ത്യ ഒരു ലക്ഷം കോടി ഡോളർ സമ്പദ്‌വ്യവസ്ഥയായി മാറുമെന്ന് നാസ്‌കോം കണക്കാക്കുന്നു," അദ്ദേഹം പറഞ്ഞു.
Also Read: നരേന്ദ്ര മോദി പോളണ്ടിൽ; വാർസോ വിമാനത്താവളത്തിൽ ഊഷ്‌മള സ്വീകരണം
