കോഴിക്കോട്: 'രക്തദാനം മഹാദാനം' എന്നാണ് ചൊല്ല്. 18 നും 60 നും ഇടയിൽ പ്രായമുള്ള ആരോഗ്യമുള്ള ഏതൊരു വ്യക്തിക്കും രക്തം ദാനം നടത്താം എന്നാണ് ശാസ്ത്രം പറയുന്നത്. എന്നാൽ ഈ കാര്യത്തിൽ ഇപ്പോഴും ജനങ്ങൾ തീർത്തും ബോധവാൻമാർ ആയിട്ടില്ല. കെട്ടുകഥകളാണ് പലരേയും ഈ സദ്പ്രവൃത്തിയിൽ നിന്നും പിന്തിരിപ്പിക്കുന്നത്. എന്നാൽ ഈ കെട്ടുകളേയെല്ലാം പൊട്ടിച്ചെറിഞ്ഞ് മുന്നേറുകയാണ് മാഹി മഞ്ചക്കൽ സ്വദേശി സി എച്ച് ഫൈസൽ റഹ്മാനെന്ന ഫൈസൽ ചെള്ളത്ത്.
രക്തദാനത്തിൽ സെഞ്ച്വറി ലക്ഷ്യവുമായാണ് ഫൈസലിന്‍റെ യാത്ര. 46മത്തെ വയസിനിടെ 72 തവണ രക്തദാനം നൽകി ഫൈസൽ ചെള്ളത്ത്. 1998 ഏപ്രിലിൽ സഹോദരിയുടെ മകന് രക്തം നൽകിയാണ് രക്തദാനത്തിന് തുടക്കം കുറിച്ചത്. 2000 മുതൽ രക്തദാനം ജീവിതത്തിന്‍റെ ഭാഗമാക്കി മാറ്റുകയായിരുന്നു. രക്തം ആവശ്യമുള്ളവർക്ക് വിളിപ്പാടകലെയാണ് ഫൈസൽ. വടകര എംആർഎ ബേക്കറിയിൽ സൂപ്പർവൈസറായ ഫൈസൽ ബ്ലഡ് ഡോണേഴ്‌സ് കേരള അംഗമാണ്. ഒ പോസിറ്റിവ് ഗ്രൂപ് രക്തമാണ് ഇദ്ദേഹത്തിന്‍റേത്.
''മൂന്നു മാസം കൂടുമ്പോഴാണ് രക്തം നൽകുന്നത്. സംസ്ഥാനത്ത് പ്രതിവര്‍ഷം ശരാശരി നാല് ലക്ഷം യൂനിറ്റ് രക്തമാണ് ആവശ്യമായി വരുന്നത്. അതില്‍ 80 ശതമാനം സന്നദ്ധ രക്തദാനത്തിലൂടെ നിറവേറ്റാന്‍ കഴിയുന്നുണ്ട്. ഇത് 100 ശതമാനത്തില്‍ എത്തിക്കുന്നതിനായുള്ള പ്രവര്‍ത്തനങ്ങളിൽ എളിയ പങ്കുവഹിക്കുകയാണ് ചെയ്യുന്നത്'' ഫൈസൽ പറഞ്ഞു.
ഇന്ത്യൻ റെഡ് ക്രോസ് സൊസൈറ്റി ലൈഫ് അംഗവും മലബാർ ട്രെയിൻ പാസഞ്ചേഴ്‌സ് ഫോറം കൺവീനറുമായ ഇദ്ദേഹം ട്രെയിൻ ടൈം ഗ്രൂപ്പിന്‍റെ അഡ്‌മിനുമാണ്. വടകര സ്വദേശി പരേതനായ മാപ്പിളപ്പാട്ട് കലാകാരൻ പിസി ലിയാക്കത്തിന്‍റെയും സുഹറയുടെയും മകനാണ്. ഭാര്യ ഫാത്തിമ. അയാനും ആഹിലുമാണ് മക്കൾ.
ആരോഗ്യമുള്ള ഒരു പുരുഷന് മൂന്ന് മാസം കൂടുന്തോറും സ്ത്രീക്ക് നാല് മാസം കൂടുന്തോറും രക്തദാനം നടത്താം. നിങ്ങൾ ആരോഗ്യകരമായ ദാതാവാണെന്ന് ഉറപ്പുവരുത്താൻ രക്തത്തിലെ താപനില, രക്തസമ്മർദ്ദം, പൾസ്, ഹീമോഗ്ലോബിൻ എന്നിവ പരിശോധിക്കുന്നതിന് ദ്രുതഗതിയിലുള്ള ശാരീരിക പരിശോധന നടത്തും. ഒരു രക്തദാനത്തിൽ ഏകദേശം 350 മില്ലി രക്തം ശേഖരിക്കും. 60 കിലോഗ്രാമിൽ കൂടുതൽ ഭാരം ഉള്ളവർക്ക് 450 മില്ലി രക്തം ദാനം ചെയ്യാം.
വ്യവസ്ഥകൾ
18-60 വയസിനിടയിലുള്ളവരാവണം
നിങ്ങളുടെ ഭാരം 45 കിലോയോ അതിൽ കൂടുതലോ ആവണം.
നിങ്ങളുടെ ഹീമോഗ്ലോബിൻ ഏറ്റവും കുറഞ്ഞത് 12.5 ഗ്രാം% ആവണം.
നിങ്ങളുടെ അവസാന രക്തദാനം മൂന്നോ അതിലധികമോ മാസം മുമ്പായിരുന്നിരിക്കണം.
നിങ്ങൾ ആരോഗ്യവാന്മാരാവണം, സമീപകാലത്ത് മലേറിയ, ടൈഫോയ്‌ഡ് അല്ലെങ്കിൽ പകരുന്ന മറ്റ് രോഗങ്ങൾ എന്നിവയൊന്നും പിടിപെട്ടിട്ടുണ്ടാകാൻ പാടില്ല.
ഹൃദയാരോഗ്യം മെച്ചപ്പെടുത്തുന്നു
രക്തം ദാനം ചെയ്യുന്നത് നിങ്ങളുടെ മൊത്തത്തിലുള്ള ആരോഗ്യത്തെ മെച്ചപ്പെടുത്തുന്നു. രക്തത്തിലെ ഇരുമ്പിന്‍റെ അളവ് വർദ്ധിക്കുന്നത് ഹൃദ്രോഗത്തിനുള്ള സാധ്യത ഉയർത്തുന്നു. പതിവായി രക്തം ദാനം ചെയ്യുന്നത് പുരുഷന്മാരെ പ്രത്യേകിച്ച് രക്തത്തിലെ ഇരുമ്പിന്‍റെ അളവ് കുറയ്ക്കാൻ സഹായിക്കുന്നു. ഇത് ഹൃദയാഘാത സാധ്യത 88% കുറയ്ക്കും. കൂടാതെ, പതിവായി രക്തദാനത്തിലൂടെ ഹൃദയാഘാതം പോലുള്ള ഹൃദയസംബന്ധമായ സംഭവങ്ങളുടെ സാധ്യത 33% കുറയ്ക്കും.
ജീവിതങ്ങൾ സംരക്ഷിക്കുന്നു
രക്തം ദാനം ചെയ്യുന്നതിലൂടെ, നിരവധി ജീവൻ രക്ഷിക്കപ്പെടുന്നു. കൂടാതെ പ്രത്യാശ ഇല്ലാത്ത പലർക്കും പ്രത്യാശ നൽകുന്നു. നിങ്ങൾ രക്തം ദാനം ചെയ്യുമ്പോൾ, നിങ്ങളുടെ സംഭാവനയെ ആശ്രയിച്ചിരിക്കുന്ന രോഗിയെ മാത്രമല്ല, ആ രോഗിയെ ആശ്രയിക്കുന്ന എല്ലാവരും നിങ്ങളോട് കടപ്പെട്ടിരിക്കും.
Also Read:വാക്ക് പാലിച്ച് സൂര്യ; പിറന്നാളിന് ദിവസങ്ങൾ മാത്രം ശേഷിക്കേ രക്തദാനം ചെയ്‌ത് നടൻ- വീഡിയോ
