പോഷക ഗുണങ്ങൾ ഏറെയുള്ള പഴമാണ് മാതളനാരങ്ങ അഥവാ അനാർ. വിറ്റാമിൻ സി, നാരുകൾ, മഗ്നീഷ്യം, ഫോസ്‌ഫറസ്, ഫോളേറ്റ്, പൊട്ടാസ്യം, ആന്‍റി ഓക്‌സിഡന്‍റുകൾ, ആന്‍റി-ഇൻഫ്ലമേറ്ററി ഗുണങ്ങൾ എന്നിവ അനാറിൽ ധാരാളം അടങ്ങിയിട്ടുണ്ട്. പ്രതിരോധ സംവിധാനത്തെ ശക്തിപ്പെടുത്താനും രോഗങ്ങളെ ചെറുക്കനും മാതളനാരങ്ങ ഗുണം ചെയ്യും. ഇതിൽ കുറഞ്ഞ അളവിൽ മാത്രമേ കലോറി അടങ്ങിയിട്ടുള്ളു. ഉപാപചയ പ്രവർത്തനം മെച്ചപ്പെടുത്താനും കൊഴുപ്പ് കത്തിക്കാനും മാതളനാരങ്ങ സഹായിക്കും. അതിനാൽ ശരീരഭാരം കുറയ്ക്കാൻ ശ്രമിക്കുന്നവർക്ക് ഡയറ്റിൽ ഉൾപ്പെടുത്താവുന്ന മികച്ച ഒരു പഴമാണിത്.
പ്യൂണികലാജിൻസ്, ആന്തോസയാനിൻ തുടങ്ങിയ പോളിഫെനോളുകൾ മാതള നാരങ്ങായിൽ അടങ്ങിയിട്ടുണ്ട്. ശരീത്തിന് ദോഷകരമായ ഫ്രീ റാഡിക്കലുകളെ നിർവീര്യമാക്കാനും ഓക്‌സിഡേറ്റീവ് സ്ട്രെസ് കുറയ്ക്കാനും ഇത് സഹായിക്കും. കൊളസ്‌ട്രോൾ, രക്തസമ്മർദ്ദം എന്നിവ കുറയ്ക്കാനും ധമനികളുടെ പ്രവർത്തനം മെച്ചപ്പെടുത്താനും മാതളനാരങ്ങയുടെ ഉപയോഗം ഗുണം ചെയ്യും. ഇതിലൂടെ ഹൃദയാരോഗ്യം നിലനിർത്താൻ സഹായിക്കും.
മാതളനാരങ്ങയിൽ കാൻസർ വിരുദ്ധ ഗുണങ്ങൾ അടങ്ങിയിട്ടുണ്ട്. ഇത് കാൻസറിനെ പ്രതിരോധിക്കാനും കാൻസർ കോശങ്ങളുടെ വ്യാപനത്തെ തടയാനും സഹായിക്കുമെന്ന് ക്ലിനിക്കൽ ന്യൂട്രീഷൻ ജേണലിൽ പ്രസിദ്ധീകരിച്ച ഒരു പഠനത്തിൽ പറയുന്നു. മാതളനാരങ്ങയിലെ ആന്‍റി ഇൻഫ്ലമേറ്ററി ഗുണങ്ങൾക്ക് കാൻസർ സാധ്യത വർധിപ്പിക്കാൻ ഇടയാക്കുന്ന വിട്ടുമാറാത്ത വീക്കം കുറയ്ക്കാനുള്ള കഴിവുണ്ട്.
ഓർമ്മക്കുറവുള്ളവരിലും പ്രായമായവരിലും ഓർമ്മശക്തി വർധിപ്പിക്കാൻ മാതളനാരങ്ങ സഹായിക്കുമെന്ന് എവിഡൻസ് ബേസ്‌ഡ് കോംപ്ലിമെൻ്ററി ആൻഡ് ആൾട്ടർനേറ്റീവ് മെഡിസിനിൽ പ്രസിദ്ധീരിച്ച ഒരു പഠനത്തിൽ പറയുന്നു. വൈജ്ഞാനിക പ്രവർത്തനം മെച്ചപ്പെടുത്താനും അൽഷിമേഴ്‌സ്, പാർക്കിൻസൺസ് തുടങ്ങിയ ന്യൂറോ ഡിജെനറേറ്റീവ് രോഗങ്ങളിൽ നിന്ന് സംരക്ഷിക്കാനും ഇത് ഫലപ്രദമാണ്.
തലച്ചോറിന്‍റെ പ്രവർത്തനം മെച്ചപ്പെടുത്താനും മാതളനാരങ്ങ കഴിക്കുന്നത് നല്ലതാണ്. ഓക്‌സിജൻ വിതരണം രക്തപ്രവാഹം എന്നിവ സുഗമമാക്കാനും പക്ഷാഘാത സാധ്യത കുറയ്ക്കാനും ഇതിന് കഴിയും. അസറ്റൈല്‍കോളിന്‍, ഡോപ്പമിന്‍, സെറോടോണിന്‍ എന്നീ ന്യൂറോട്രാന്‍സ്‌മിറ്ററുകളെ ഉത്തേജിപ്പിക്കാനും മാതളനാരങ്ങ സഹായിക്കും.
രക്തത്തിലെ പഞ്ചസാരയുടെ അളവ് നിയന്ത്രിക്കാനും ഇത് ഡയറ്റിൽ ഉൾപ്പെടുത്തുന്നത് നല്ലതാണ്. ഇൻസുലിൻ സംവേദനക്ഷമത മെച്ചപ്പെടുത്താനും മാതളനാരങ്ങ ഉപകരിക്കും. ടൈപ്പ് 2 പ്രമേഹമുള്ളവരും സാധ്യതയുള്ളവരും പതിവായി മാതളനാരങ്ങ കഴിക്കുന്നത് ഗുണം ചെയ്യുമെന്ന് ഡയബെറ്റിസ് ആൻഡ് മെറ്റബോളിസത്തിൽ പ്രസിദ്ധീകരിച്ച പഠനത്തിൽ പറയുന്നു.
ദഹന പ്രശ്‌നങ്ങൾ പരിഹരിക്കാനും ദഹന നാളത്തിലെ വീക്കം കുറയ്ക്കാനും അനാർ ഫലം ചെയ്യുമെന്ന് ഓക്‌സിഡേറ്റീവ് മെഡിസിന്‍ ആന്‍ഡ് സെല്ലുലാര്‍ ലോംഗ്വിറ്റിയില്‍ പ്രസിദ്ധീകരിച്ച പഠനം കണ്ടെത്തി. വയറ്റിലെ ആരോഗ്യകരമായ ബാക്‌ടീരിയകളുടെ വളർച്ചയെ പ്രോത്സാഹിപ്പിക്കുന്നതിലൂടെ കുടലിൻ്റെ ആരോഗ്യം മെച്ചപ്പെടുത്താനും ഇത് സഹായിക്കും.
ചർമ്മത്തിന്‍റെ ആരോഗ്യം സംരക്ഷിക്കാനും മാതളനാരങ്ങ ഗുണം ചെയ്യും. അൾട്രാ വയലറ്റ് കിരണങ്ങൾ ഉണ്ടാക്കുന്ന കേടുപാടുകളിൽ നിന്ന് ഇത് ചർമ്മത്തെ സംരക്ഷിക്കുമെന്ന് ദി ജേർണൽ ഓഫ് ന്യൂട്രീഷണൽ ബയോകെമിസ്ട്രിയിൽ പ്രസിദ്ധീകരിച്ച പഠനത്തിൽ പറയുന്നു. ചർമ്മത്തിന്‍റെ ഇലാസ്‌തികത നിലനിർത്താനും ചുളിവുകൾ ഇല്ലാതാക്കാനും പ്രായമാകൽ പ്രക്രിയ വൈകിപ്പിക്കാനും ഇത് സഹായിക്കും.
ശ്രദ്ധിക്കുക: ഇവിടെ കൊടുത്തിരിക്കുന്ന എല്ലാ ആരോഗ്യ വിവരങ്ങളും നിർദ്ദേശങ്ങളും നിങ്ങളുടെ അറിവിലേക്കായി മാത്രമുള്ളതാണ്. ശാസ്ത്രീയ ഗവേഷണം, പഠനങ്ങൾ, ആരോഗ്യ പ്രൊഫഷണലുകൾ നൽകുന്ന ഉപദേശങ്ങൾ എന്നിവയുടെ അടിസ്ഥാനത്തിലാണ് ഈ വിവരങ്ങൾ നൽകുന്നത്. എന്നാൽ, ഇവ പിന്തുടരുന്നതിന് മുമ്പ് ഒരു ഡോക്‌ടറുടെ നിർദേശം തേടേണ്ടതാണ്.
Also Read : അതിശയിപ്പിക്കുന്ന ആരോഗ്യഗുണങ്ങൾ; ദിവസേന കഴിക്കാം ഈ പവർഫുൾ പഴം
