നിങ്ങൾ ഉറങ്ങുന്ന സമയത്തും മസ്‌തിഷ്‌കം ഉണർന്നു പ്രവർത്തിക്കുന്നുവെന്ന് എത്ര പേർക്കറിയാം? മസ്‌തിഷ്‌കം പ്രവർത്തിക്കാൻ ആവശ്യമായ ഇന്ധനം ലഭിക്കുന്നത് നിങ്ങൾ കഴിക്കുന്ന ഭക്ഷണത്തിലൂടെയാണ്. അതിനാൽ ദിവസേന കഴിക്കുന്ന ഭക്ഷണത്തിൽ പോഷകാഹാരങ്ങൾ ഉൾപ്പെടുത്തേണ്ടത് പ്രധാനമാണ്. വാർധക്യത്തിൽ മസ്‌തിഷ്‌കത്തിന്‍റെ പ്രവർത്തനം കുറയുന്നത് സ്വാഭാവികമാണ്. ഇത് അൽഷിമേഴ്‌സ്, ഡിമെൻഷ്യ തുടങ്ങിയ മറവി രോഗങ്ങൾ വരാൻ കാരണമായേക്കും. അതിനാൽ മസ്‌തിഷ്‌കത്തിന്‍റെ പ്രവർത്തനം മെച്ചപ്പെടുത്താൻ ഡയറ്റിൽ ഉൾപ്പെടുത്തേണ്ട ഭക്ഷണങ്ങൾ ഏതൊക്കെയെന്ന് നോക്കാം.
കൊഴുപ്പടങ്ങിയ മൽസ്യങ്ങൾ
ഒമേഗ -3 ഫാറ്റി ആസിഡുകളുടെ മികച്ച ഉറവിടമാണ് കൊഴുപ്പടങ്ങിയ മൽസ്യങ്ങൾ. ഇത് ഓർമശക്തി വർധിപ്പിക്കാൻ സഹായിക്കുന്നു. തലച്ചോറിൻ്റെ 60 % കൊഴുപ്പ് കൊണ്ടാണ് നിർമ്മിച്ചിരിക്കുന്നത് കൂടാതെ തലച്ചോറിലെ കൊഴുപ്പിൻ്റെ 50% ഒമേഗ -3 ഫാറ്റി ആസിഡുകളാണ് അടങ്ങിയിരിക്കുന്നത്. തലച്ചോറിൻ്റെ സ്വയം വികസനത്തിനും നാഡീകോശങ്ങൾ നിർമിക്കാനും ഒമേഗ -3 പ്രധാന പങ്ക് വഹിക്കുന്നവയാണ്. സാൽമൺ, ട്രൗട്ട്, മത്തി തുടങ്ങിയ കൊഴുപ്പ് അടങ്ങിയ മത്സ്യങ്ങൾ ഡയറ്റിൽ ഉൾപ്പെടുത്തുന്നത് മറവി രോഗങ്ങൾ തടയാൻ സയഹിക്കുന്നു.
ബെറീസ്
സ്ട്രോബെറി, ബ്ലൂബെറി, ബ്ലാക്ക്‌ബെറി, മൾബറി തുടങ്ങിയവ മസ്‌തിഷ്‌കത്തിന്‍റെ പ്രവർത്തനം ഉത്തേജിപ്പിക്കാൻ സഹായിക്കുന്നു. ആൻ്റി ഓക്‌സിഡൻ്റ് ഗുണങ്ങളുള്ളതിനാൽ ഓക്‌സിഡേറ്റീവ് സമ്മർദ്ദം കുറയ്ക്കാൻ ഇത് നല്ലതാണ്. തലച്ചോറിന്‍റെ പ്ലാസ്റ്റിറ്റി വർദ്ധിപ്പിച്ച് ഓർമശക്തി മെച്ചപ്പെടുത്താനും ഇത് ഗുണം ചെയ്യുന്നു. മാത്രമല്ല മസ്‌തിഷ്‌ക കോശങ്ങൾ തമ്മിലുള്ള ആശയവിനിമയം മെച്ചപ്പെടുത്താനും ബെറീസ് ഡയറ്റിൽ ഉൾപ്പെടുത്തുന്നത് നല്ലതാണ്.
ധാന്യങ്ങൾ
മസ്‌തിഷ്‌കത്തിന്‍റെ പ്രവർത്തനം മെച്ചപ്പെടുത്താൻ ഭക്ഷണക്രമത്തിൽ ധാന്യങ്ങൾ ഉൾപ്പെടുത്തേണ്ടത് പ്രധാനമാണ്. ധാന്യങ്ങളിൽ കുറഞ്ഞ ഗ്ലൈസെമിക് സൂചികയുള്ളതിനാൽ തലച്ചോറിനെ കൂടുതൽ ഫലപ്രദമായി പ്രവർത്തിക്കാൻ ഇത് സഹായിക്കുന്നു.
ഇലക്കറികൾ
മസ്‌തിഷ്‌കത്തിന്‍റെ ആരോഗ്യം നിലനിർത്താൻ ഇലക്കറികൾ വളരെയധികം ഗുണം ചെയ്യുന്നു. ആൻ്റി ഓക്‌സിഡൻ്റുകൾ, പോഷകങ്ങൾ എന്നിവ ഇലക്കറികളിൽ ധാരാളം അടങ്ങിയിട്ടുള്ളതിനാൽ മസ്‌തിഷ്‌ക പ്രവർത്തനങ്ങൾ ഉത്തേജിപ്പിക്കാൻ സഹായിക്കുന്നു. മാത്രമല്ല അൽഷിമേഴ്‌സിനെ തടയുന്ന ല്യൂട്ടിൻ, ഫോളേറ്റ് എന്നീ ഘടകങ്ങളുടെ നല്ലൊരു ഉറവിടം കൂടിയാണ് ഇലക്കറികൾ. കാലെ, ചീര, ചീര, ബ്രൊക്കോളി തുടങ്ങിയവ കഴിക്കുന്നത് മസ്‌തിഷ്‌കത്തിന്‍റെ ആരോഗ്യത്തിന് നല്ലതാണ്.
മുട്ട
അവശ്യപോഷകങ്ങൾ അടങ്ങിയിട്ടുള്ള ഒന്നാണ് മുട്ട. വൈറ്റമിൻ ബി 6, ബി 12, ഫോളിക് ആസിഡ് എന്നിവയുടെ കലവറയായ മുട്ട ദിവസേന കഴിക്കുന്നത് ഓർമശക്തി നിലനിർത്താൻ സഹായിക്കുന്നത്തിനു പുറമെ തലച്ചോർ ചുരുങ്ങുന്ന അവസ്ഥയിൽ നിന്നും സംരക്ഷിക്കുന്നു. മുട്ടയുടെ മഞ്ഞക്കരുവിൽ കോളിൻ അടങ്ങിയിട്ടുള്ളതിനാൽ ഇത് മസ്‌തിഷ്‌കത്തിന്‍റെ പ്രവർത്തനം മെച്ചപ്പെടുത്താനും സഹായിക്കുന്നു.
ഓറഞ്ച്
മസ്‌തിഷ്‌കത്തിന്‍റെ ആരോഗ്യം മെച്ചപ്പെടുത്താൻ സഹായിക്കുന്ന ഒന്നാണ് വൈറ്റമിൻ സി. ഓറഞ്ചിൽ വൈറ്റമിൻ സി ധാരാളം അടങ്ങിയിട്ടുണ്ട്. അതിനാൽ ഓറഞ്ച് പതിവായി കഴിക്കുന്നത് മസ്‌തിഷ്‌ക കോശങ്ങളെ സംരക്ഷിക്കാൻ സഹായിക്കുന്നു. വിഷാദം, ഉത്കണ്‌ഠ , സ്‌കീസോഫ്രീനിയ തുടങ്ങിയ മാനസിക രോഗങ്ങളുടെ സാധ്യത കുറയ്ക്കാനും ഓറഞ്ച് നല്ലതാണ്. ഓറഞ്ചിന് പുറമെ പേരക്ക, കിവീസ്, തക്കാളി, കുരുമുളക് എന്നിവയിലും വൈറ്റമിൻ സി ധാരാളം അടങ്ങിയിട്ടുണ്ട്.
സീഡ്‌സ് & നട്‌സ്
മസ്‌തിഷ്‌കത്തിന്‍റെ ആരോഗ്യം നിലനിർത്താൻ സഹായിക്കുന്നവയാണ് നട്‌സുകളും സീഡ്‌സുകളും. ഉയർന്ന അളവിൽ ഒമേഗ -3 ഫാറ്റി ആസിഡുകളും ആൻ്റി ഓക്‌സിഡൻ്റുകളും അടങ്ങിയിട്ടുള്ളതിനാൽ തലച്ചോറിന്‍റെ പ്രവർത്തനം മെച്ചപ്പെടുത്താൻ വളരെയധികം ഗുണം ചെയ്യുന്ന ഭക്ഷണ പദാർഥങ്ങളാണ് ഇവ. വൈറ്റമിൻ ഇ ഇവയിൽ ധാരാളം അടങ്ങിയിട്ടുള്ളതിനാൽ പ്രായമാകുമ്പോൾ ഉണ്ടാകുന്ന ഓക്‌സിഡേറ്റീവ് സമ്മർദ്ദം തടയാൻ ഇത് സഹായിക്കുന്നു. അതിനാൽ അണ്ടിപ്പരിപ്പ്, ബദാം, ഹസൽനട്ട്, സൂര്യകാന്തി വിത്ത്, വാൽനട്ട് തുടങ്ങിയവ ഉൾപ്പെടെയുള്ള നട്‌സുകളും സീഡ്‌സുകളും ഭക്ഷണക്രമത്തിൽ ഉൾപ്പെടുത്തുക.
