രാവിലെ ഈ കാര്യങ്ങൾ ചെയ്‌തു നോക്കൂ... കൊളസ്ട്രോൾ ഫലപ്രദമായി കുറയ്ക്കാമെന്ന് കാർഡിയോളജി വിദഗ്‌ധന്‍

ചീത്ത കൊളസ്‌ട്രോളിന്‍റെ അളവ് കുറയ്ക്കാൻ ചില പ്രഭാതശീലങ്ങൾ പിന്തുടരുന്നത് നല്ലതാണെന്ന് കാർഡിയോളജിസ്‌റ്റ് ഡോ പ്രതീക് ചൗധരി പറയുന്നു. വിശദമായി അറിയാം.

ശരീരത്തിന്‍റെ കോശങ്ങളിൽ മെഴുക് രൂപത്തിൽ കാണപ്പെടുന്ന ഒരു പദാർത്ഥമാണ് കൊളസ്‌ട്രോൾ. ഇത് എച്ച്ഡിഎൽ അഥവാ ആരോഗ്യകരമായ കൊഴുപ്പ്, എൽഡിഎൽ അഥവാ ചീത്ത കൊളസ്‌ട്രോൾ എന്നിങ്ങനെ രണ്ട് തരമുണ്ട്. ശരീരത്തിൽ ചീത്ത കൊളസ്‌ട്രോൾ അളവ് കൂടുന്നത് ഹൃദ്രോഗം, സ്ട്രോക്ക് തുടങ്ങിയ പല ഗുരുതരമായ ആരോഗ്യ പ്രശ്‌നങ്ങൾക്ക് കാരണമാകും. അതിനാൽ കൊളസ്‌ട്രോൾ അളവ് ആരോഗ്യകരമായി നിലനിർത്തേണ്ടത് ശരീരത്തിന്‍റെ ആരോഗ്യം സംരക്ഷിക്കാൻ പ്രധാനമാണ്. ചീത്ത കൊളസ്‌ട്രോൾ അളവ് കുറയ്ക്കാൻ ദിനചര്യയിൽ ചില പ്രഭാതശീലങ്ങൾ ഉൾപ്പെടുത്തുന്നത് നല്ല മാറ്റമുണ്ടാക്കാൻ സഹായിക്കുമെന്ന് ഏഷ്യൻ ഹോസ്‌പിറ്റലിലെ ഇന്‍റർവെൻഷണൽ കാർഡിയോളജിയിലെ സീനിയർ കൺസൾട്ടന്‍റായ ഡോ പ്രതീക് ചൗധരി പറയുന്നു. അവ എന്തൊക്കെയെന്ന് വിശദമായി അറിയാം.

നടത്തം

ദിവസവും രാവിലെ കുറഞ്ഞത് 30 മിനിറ്റെങ്കിലും നടക്കുന്നത് കൊളസ്‌ട്രോൾ കുറയ്ക്കാൻ സഹായിക്കും. ഇത് ശരീരഭാരം കുറയ്ക്കാനും വളരെയധികം ഗുണം ചെയ്യും.

ട്രാൻസ് ഫാറ്റുകൾ ഒഴിവാക്കുക

പ്രഭാതഭക്ഷണത്തിൽ നിന്ന് ട്രാൻസ് ഫാറ്റ് അടങ്ങിയ ആഹാരങ്ങൾ ഒഴിവാക്കുക. കേക്ക്, കുക്കികൾ, സംസ്‌കരിച്ച ഭക്ഷണങ്ങൾ എന്നിവയിലൊക്കെ ട്രാൻസ് ഫാറ്റുകൾ ധാരാളം അടങ്ങിയിട്ടുണ്ട്. അതിനാൽ ഇത്തരം ഭക്ഷണങ്ങൾ കഴിക്കാതിരിക്കാൻ പ്രത്യേകം ശ്രദ്ധിക്കുക.

ലയിക്കുന്ന നാരുകൾ അടങ്ങിയ ഭക്ഷണം

പ്രഭാതഭക്ഷണത്തിൽ ലയിക്കുന്ന നാരുകൾ അടങ്ങിയ ഭക്ഷണങ്ങൾ ധാരാളം ഉൾപ്പെടുത്തുക. ഇത് കൊളസ്‌ട്രോൾ അളവ് നിയന്ത്രിക്കാൻ സഹായിക്കും. അതിനാൽ ഉയർന്ന അളവിൽ ഫൈബർ അടങ്ങിയ ഓട്‌സ്, ചിയ സീഡ്‌സ്, പഴങ്ങൾ എന്നിവ ഡയറ്റിൽ ഉൾപ്പെടുത്താം.

പൂരിത കൊഴുപ്പ് കുറയ്ക്കുക

പൂരിത കൊഴുപ്പ് ധാരാളമുള്ള റെഡ് മീറ്റ്, കൊഴുപ്പടങ്ങിയ പാലുത്പന്നങ്ങൾ എന്നിവ ഉൾപ്പെടെയുള്ളവ പ്രഭാതഭക്ഷണമായി കഴിക്കാതിരിക്കുക. ഇത്തരം ഭക്ഷണങ്ങൾ ശരീരത്തിലെ ചീത്ത കൊളസ്‌ട്രോൾ അളവ് വർധിപ്പിക്കാൻ ഇടയാക്കും.

നട്‌സ് /സീഡ്‌സ്

പ്രഭാത ഭക്ഷണത്തിൽ ഒമേഗ 3 ഫാറ്റി ആസിഡുകൾ അടങ്ങിയിട്ടുള്ള നട്‌സുകളും സീഡ്‌സുകളും ഉൾപ്പെടുത്തുക. ഇത് ശരീരത്തിലെ ആരോഗ്യകരമായ കൊഴുപ്പിന്‍റെ അളവ് മെച്ചപ്പെടുത്താൻ സഹായിക്കും. അതിനാൽ ബദാം, വാൽനട്ട്, ഫ്ളാക്‌സ് സീഡുകൾ എന്നിവ കഴിക്കുക.

ചൂടുവെള്ളം കുടിക്കുക

രാവിലെ എഴുനേറ്റ ഉടൻ ഇളം ചൂടുള്ള വെള്ളത്തിൽ ചെറുനാരങ്ങാ നീര് ചേർത്ത് കുടിക്കുന്നത് നല്ലതാണ്. ഇത് മെറ്റബോളിസം മെച്ചപ്പെടുത്താനും ജലാംശം നിലനിർത്താനും സഹായിക്കും. ഹൃദയാരോഗ്യം മെച്ചപ്പെടുത്താനും ഇത് ഗുണം ചെയ്യും.

ശ്രദ്ധിക്കുക: ഇവിടെ കൊടുത്തിരിക്കുന്ന എല്ലാ ആരോഗ്യ വിവരങ്ങളും നിർദ്ദേശങ്ങളും നിങ്ങളുടെ അറിവിലേക്കായി മാത്രമുള്ളതാണ്. ശാസ്ത്രീയ ഗവേഷണം, പഠനങ്ങൾ, ആരോഗ്യ പ്രൊഫഷണലുകൾ നൽകുന്ന ഉപദേശങ്ങൾ എന്നിവയുടെ അടിസ്ഥാനത്തിലാണ് ഈ വിവരങ്ങൾ നൽകുന്നത്. എന്നാൽ, ഇവ പിന്തുടരുന്നതിന് മുമ്പ് ഒരു ഡോക്‌ടറുടെ നിർദേശം തേടേണ്ടതാണ്.