ഹൈദരാബാദ്: കൺപോളയിലൂടെ ബ്രെയിൻ ട്യൂമർ നീക്കം ചെയ്‌ത് ഡോക്‌ടർമാർ. ഗച്ചിബൗളി ഏഷ്യൻ ഇൻസ്റ്റിറ്റ്യൂട്ട് ഓഫ് ഗ്യാസ്‌ട്രോ എൻട്രോളജിയിലാണ് ശാസ്ത്രക്രിയ വിജയകരമായി പൂർത്തീകരിച്ചത്. 54 കാരിയാണ് അതിസങ്കീർണമായ ശസ്ത്രക്രിയയ്ക്ക് വിധേയയായത്. സീനിയർ കൺസൾട്ടൻ്റ് ന്യൂറോ സർജൻ ഡോ അഭിരചന്ദ്ര ഗബ്ബിത, ന്യൂറോ സർജറി ഡയറക്‌ടർ ഡോ ശുഭോദ്രാജു, നേത്രരോഗ വിദഗ്‌ധർ തുടങ്ങിയവർ സംയുക്തമായാണ് ശസ്ത്രക്രിയ നടത്തിയത്.
ആറുമാസം മുമ്പ് വലുത് കണ്ണിന് വേദനയും കാഴ്‌ച മങ്ങുകയും ചെയ്‌തതോടെ 54 കാരി ചികിത്സ തേടിയിരുന്നു. എന്നാൽ ചികിത്സ ലഭിച്ചിട്ടും രോഗം ഭേദമാകാതെ വന്നതോടെയാണ് എഐജി ആശുപത്രിയിൽ ചികിത്സ തേടിയത്. പരിശോധനയിൽ കണ്ണിന്‍റെ പിൻഭാഗത്തായുള്ള തലയോട്ടിയുടെ ഭഗത്ത് 2 സെന്‍റീ മീറ്റർ നീളത്തിൽ ട്യൂമർ കണ്ടെത്തി. ശേഷം നടത്തിയ വിശദ പരിശോധനയിൽ സ്‌പിനോ ഓർബിറ്റൽ കാവേർണസ് മെനിഞ്ചിയോമ (എസ്ഒഎം) ആണെന്ന് ഡോക്‌ടർമാർ സ്ഥിരീകരിക്കുകയും ചെയ്‌തു.
തുടർന്നാണ് ശാസ്ത്രക്രിയയിലേക്ക് നീങ്ങിയത്. സാധാരണ ഇത്തരം ട്യൂമർ തലയോട്ടി വഴിയാണ് ശസ്ത്രക്രിയ നടത്താറ്. എന്നാൽ ഈ കേസിൽ തലയോട്ടി വഴിയുള്ള ശസ്ത്രക്രിയ അപകട സാധ്യത വർധിപ്പിക്കുമെന്നതിനാൽ കൺപോള വഴി ട്യൂമർ നീക്കം ചെയ്യാൻ തീരുമാനിക്കുകയായിരുന്നു ഡോക്‌ടർമാർ. എൻഡോസ്കോപ്പിക് ലാറ്ററൽ ട്രാൻസോർബിറ്റൽ സംവിധാനത്തിലൂടെയാണ് ട്യൂമർ നീക്കം ചെയ്‌തത്. അതേസമയം ശസ്ത്രക്രിയ കഴിഞ്ഞ് രണ്ട് ദിവസത്തിന് ശേഷം രോഗിയെ ഡിസ്‌ചാർജ് ചെയ്‌തുവെന്ന് ആശുപത്രി അധികൃതർ അറിയിച്ചു.
