ടൊവിനോ തോമസ് ട്രിപ്പിള്‍ റോളിലെത്തുന്ന 'അജയന്‍റെ രണ്ടാം മോഷണം' ട്രെയിലര്‍ റിലീസ് ചെയ്‌തു. ട്രിപ്പിള്‍ റോളില്‍ അതിഗംഭിര ഗെറ്റപ്പില്‍ മികച്ച പ്രകടനമാണ് ടൊവിനോ കാഴ്‌ചവയ്‌ക്കുന്നത്. മലയാള സിനിമയ്‌ക്ക് മറ്റൊരു ദൃശ്യവിസ്‌മയമാകും അജയന്‍റെ രണ്ടാം മോഷണം എന്നാണ് ട്രെയിലര്‍ നല്‍കുന്ന സൂചന.
മൂന്ന് കാലഘട്ടങ്ങളിലൂടെ സഞ്ചരിക്കുന്ന ഒരു എന്‍റര്‍ടെയിനറായാണ് ചിത്രം ഒരുക്കിയിരിക്കുന്നത്. കുട്ടികൾക്കും മുതിർന്നവർക്കും ഒരുപോലെ ആസ്വദിക്കാൻ കഴിയുന്ന ഒരു ഫാന്‍റസി ചിത്രമാണ് 'അജയന്‍റെ രണ്ടാം മോഷണം'. സംഘട്ടന രംഗങ്ങള്‍ക്ക് ഏറെ പ്രാധാന്യമുള്ള ചിത്രമാണ് 'അജയന്‍റെ രണ്ടാം മോഷണം'. കളരിക്ക് ഏറെ പ്രാധാന്യം നൽകുന്ന ചിത്രമായതിനാല്‍ സിനിമയ്‌ക്ക് വേണ്ടി ടൊവിനോ തോമസ് കളരി അഭ്യസിച്ചിരുന്നു.
മൂന്ന് വേഷങ്ങളിലാണ് ചിത്രത്തിൽ ടൊവിനോ തോമസ് എത്തുന്നത് എന്നാണ് സിനിമയുടെ ഏറ്റവും വലിയ പ്രത്യേകതകളില്‍ ഒന്ന്. മണിയൻ, അജയൻ, കുഞ്ഞികേളു എന്നീ വ്യത്യസ്‌തമായ മൂന്ന് കഥാപാത്രങ്ങളെയാണ് ചിത്രത്തിൽ ടൊവിനോ അവതരിപ്പിക്കുന്നത്. 118 ദിവസങ്ങൾ കൊണ്ടാണ് സിനിമയുടെ ഷൂട്ടിങ് പൂർത്തിയാക്കിയത്.
കൃതി ഷെട്ടി, ഐശ്വര്യ രാജേഷ്, സുരഭി ലക്ഷ്‌മി എന്നിവരാണ് ചിത്രത്തില്‍ ടൊവിനോയുടെ നായികമാര്‍. കൃതി ഷെട്ടിയുടെ ആദ്യ മലയാള ചിത്രം കൂടിയാണ് എആർഎം. ബേസിൽ ജോസഫ്, ജഗദീഷ്, അജു വര്‍ഗീസ്, സന്തോഷ് കീഴാറ്റൂർ, കബീർ സിംഗ് ദുഹാൻ, സഞ്ജു ശിവറാം, രോഹിണി, ശിവജിത്ത്, നിസ്‌താര്‍ സേഠ്, ഹരീഷ് ഉത്തമന്‍, പ്രമോദ് ഷെട്ടി, ശിവരാജ്, സുധീഷ് തുടങ്ങിയവും ചിത്രത്തില്‍ അണിനിരക്കുന്നു.
ഓണം റിലീസായാണ് ചിത്രം തിയേറ്ററുകളില്‍ എത്തുക. 3 ഡിയിലും 2ഡിയിലുമായാണ് ചിത്രം റിലീസ് ചെയ്യുക. ജിതിന്‍ ലാല്‍ ആണ് സിനിമയുടെ സംവിധാനം. 'എന്ന് നിന്‍റെ മൊയ്‌തീന്‍', 'കുഞ്ഞിരാമായണം', 'ഗോദ', 'കൽക്കി' എന്നീ ചിത്രങ്ങളുടെ സഹ സംവിധായകനായ ജിതിൻ ലാലിന്‍റെ ആദ്യ സംവിധാന സംരഭം കൂടിയാണ് 'അജയന്‍റെ രണ്ടാം മോഷണം'.
മാജിക് ഫ്രെയിംസ്, ജുജിഎം മോഷന്‍ പിക്‌ചേഴ്‌സ് എന്നീ ബാനറുകളില്‍ ലിസ്‌റ്റിന്‍ സ്‌റ്റീഫന്‍, ഡോ.സക്കറിയ തോമസ് എന്നിവര്‍ ചേര്‍ന്നാണ് സിനിമയുടെ നിര്‍മാണം. സുജിത് നമ്പ്യാരാണ് സിനിമയ്‌ക്ക് വേണ്ടി തിരക്കഥ ഒരുക്കിയിരിക്കുന്നത്. മനു മൻജിത്തിന്‍റെ ഗാനരചനയില്‍ ദീപു നൈനാന്‍ തോമസാണ് ചിത്രത്തിന് വേണ്ടി സംഗീതം പകര്‍ന്നിരിക്കുന്നത്.
ജോമോന്‍ ടി ജോണ്‍ ഛായാഗ്രഹണവും ഷമീര്‍ മുഹമ്മദ് എഡിറ്റിംഗും നിര്‍വഹിച്ചിരിക്കുന്നു. ദീപു പ്രദീപാണ് അഡിഷണല്‍ സ്‌ക്രീന്‍പ്ലേ നിര്‍വഹിച്ചിരിക്കുന്നത്. സ്‌റ്റണ്ട് - വിക്രം മോർ, ഫീനിക്‌സ്‌ പ്രഭു, മേക്കപ്പ് - റോണക്‌സ്‌ സേവ്യർ, കോസ്റ്റ്യൂം ഡിസൈൻ - പ്രവീൺ വർമ്മ, പ്രൊഡക്ഷൻ ഡിസൈൻ - ഗോകുൽ ദാസ്, പ്രൊഡക്ഷൻ കൺട്രോളർ - പ്രിൻസ് റാഫേൽ, ഹർഷൻ പട്ടാഴി, പിആർ - മഞ്ജു ഗോപിനാഥ് എന്നിവരാണ് ചിത്രത്തിലെ മറ്റ് അണിയറ പ്രവർത്തകർ.
Also Read: കാത്തിരിപ്പുകൾക്ക് വിരാമം...; അജയന്‍റെ രണ്ടാം മോഷണം ഓണത്തിന് - Ajayante Randam Moshanam
