സൈജു ശ്രീധരൻ ആദ്യമായി സംവിധാനം ചെയ്‌ത് അനുരാഗ് കശ്യപ് പ്രേക്ഷകരിലേക്ക് എത്തിക്കുന്ന 'ഫൂട്ടേജി' ന്‍റെ പ്രിവ്യൂ ഷോ കൊച്ചിയില്‍ സംഘടിപ്പിച്ചു. ക്ഷണിക്കപ്പെട്ട അതിഥികൾ മാത്രമായിരുന്നു സിനിമയുടെ പ്രത്യേക പ്രദർശനം കാണാനെത്തിയത്. അനുരാഗ് കാശ്യപ്, ടൊവിനോ തോമസ്, മഞ്ജു വാര്യർ തുടങ്ങിയ നിരവധി താരങ്ങൾ സിനിമയുടെ പ്രിവ്യൂ ഷോയില്‍ പങ്കെടുത്തു.
കഴിഞ്ഞ കുറച്ചു നാളുകളായി മലയാള സിനിമ മേഖലയിൽ നിന്നും പുറത്തിറങ്ങുന്ന ചിത്രങ്ങൾ വളരെ നിലവാരമുള്ളതാണ്. മലയാളത്തിൽ വളരെ വ്യത്യസ്‌തതയോട് കൂടി പുറത്തിറങ്ങാൻ ഇരിക്കുന്ന ഫൂട്ടേജ് എന്ന ചിത്രത്തിന്‍റെ ഭാഗമാകാൻ കഴിഞ്ഞത് അഭിമാനപൂർണമായ കാര്യമാണ്. മികച്ച ടെക്‌നിക്കൽ പെർഫെക്ഷനോടെ ഈ ചിത്രത്തെ ഒരുക്കാൻ സിനിമയുടെ അണിയറ പ്രവർത്തകർ ശ്രദ്ധിച്ചിട്ടുണ്ട്. അതുകൊണ്ടുതന്നെ ഈ ചിത്രത്തെ പ്രേക്ഷകരിലേക്ക് എത്തിക്കാൻ ഞാൻ ആവേശഭരിതനാണെന്ന് അനുരാഗ് കശ്യപ് പറഞ്ഞു.
മഞ്ജു വാര്യരുടെ ആക്ഷൻ രംഗങ്ങൾ എല്ലാം അടിപൊളി. സിനിമയുടെ എഡിറ്റിങ് പാറ്റേണുകൾ എല്ലാം തന്നെ ശ്രദ്ധേയമാണ്. മികച്ച ചിത്രം. ഞാൻ വളരെയധികം ആസ്വദിച്ചു. ചിത്രം കണ്ട ശേഷം ടൊവിനോയുടെ അഭിപ്രായ പ്രകടനം ഇങ്ങനെയായിരുന്നു.
മലയാളത്തിൽ ഫൗണ്ട് ഫൂട്ടേജ് ചിത്രീകരണ രീതി അവലംബിച്ച് ഒരുക്കുന്ന ചിത്രമാണിത്. മഞ്ജു വാര്യർ പ്രധാന വേഷത്തിൽ എത്തുന്ന ചിത്രത്തിൽ വിശാഖ്, ഗായത്രി അശോക് തുടങ്ങിയവര്‍ മറ്റ് കഥാപാത്രങ്ങളെ അവതരിപ്പിക്കുന്നു. മൂവി ബക്കറ്റ്, കാസ്റ്റ് ആന്‍ഡ് കോ, പെയില്‍ ബ്ലൂ ഡോട്ട് പിക്ചേഴ്‌സ് എന്നിവയുടെ ബാനറില്‍ ബിനീഷ് ചന്ദ്രൻ, സൈജു ശ്രീധരൻ എന്നിവർ ചേര്‍ന്നാണ് ചിത്രത്തിന്‍റെ നിര്‍മാണം.
Also Read: ബിബിൻ ജോർജ് നായകനാകുന്ന 'കൂടൽ'; സിനിമയുടെ പൂജയും ടൈറ്റില്‍ ലോഞ്ചും കൊച്ചിയില്‍
