മലയാള സിനിമയിലെ എന്നല്ല ഇന്ത്യൻ സിനിമയിലെ തന്നെ അതുല്യ നടനാണ് മമ്മൂട്ടി. 72-ാം വയസിലും പ്രേക്ഷകരെ അമ്പരിപ്പിക്കുന്നതിൽ താരം തെല്ലും പിറകോട്ട് പോയിട്ടില്ല. അൻപത് വർഷത്തോളം നീണ്ട തന്‍റെ അഭിനയ ജീവിതത്തിൽ എണ്ണിയാലൊടുങ്ങാത്ത ആരാധക വൃന്ദത്തെയാണ് സിനിമയ്‌ക്കകത്തും പുറത്തും മമ്മൂട്ടി സ്വന്തമാക്കിയത്. ഇപ്പോഴിതാ ബോളിവുഡ് നടി തിലോത്തമ ഷോം മമ്മൂട്ടിയെ കുറിച്ച് പറഞ്ഞ വാക്കുകളാണ് ശ്രദ്ധ നേടുന്നത്.
മമ്മൂട്ടിയെ നേരിൽ കാണാൻ സാധിച്ചതിൽ ഏറെ അഭിമാനമുണ്ടെന്ന് തിലോത്തമ ഷോം പറയുന്നു. ഇൻസ്റ്റഗ്രാമിൽ പങ്കുവച്ച കുറിപ്പിലാണ് മമ്മൂട്ടിയെ കുറിച്ചും അദ്ദേഹത്തെ കാണാൻ കഴിഞ്ഞതിലുള്ള സന്തോഷവും താരം വ്യക്തമാക്കിയത്. ഇതിഹാസം എന്നാണ് തിലോത്തമ ഷോം മമ്മൂട്ടിയെ വിശേഷിപ്പിച്ചത്.
'സ്വയം പുനർനിർമിക്കുന്നതിന് ഇത്രയേറെ അഭിനിവേശമുള്ള ഈ മനുഷ്യനെ കണ്ടുമുട്ടാൻ സാധിച്ചത് വളരെ വലിയ അഭിമാനമായാണ് കാണുന്നത്. യുവ സംവിധായകർക്ക് ഒപ്പം പ്രവർത്തിക്കാനുള്ള മനസും അത്യാധുനിക സാങ്കേതിക വിദ്യകൾ അറിയാനുള്ള ജിജ്ഞാസയും എല്ലാറ്റിനും ഉപരി ലാളിത്യവുമുള്ള ഈ മനുഷ്യനുമായി കുറച്ച് നേരം സാംസാരിക്കാൻ സാധിച്ചു. ഇതിഹാസമാണ് മമ്മൂട്ടി'- തിലോത്തമയുടെ വാക്കുകൾ ഇങ്ങനെ (Bollywood actress Tillotama Shome praised Mammootty).
'സർ', 'എ ഡെത്ത് ഇൻ ദി ഗുഞ്ച്', 'മൺസൂൺ വെഡിങ്', ലസ്റ്റ് സ്റ്റോറീസ് - 2 തുടങ്ങിയ സിനിമകളിലൂടെ പ്രേക്ഷക ശ്രദ്ധ ആർജിച്ച താരമാണ് തിലോത്തമ ഷോം. അതേസമയം തിലോത്തമയുടെ പോസ്റ്റ് പുറത്തുവന്നതിന് പിന്നാലെ കമന്‍റ് ബോക്‌സിൽ മലയാളികൾ ഉൾപ്പടെയുള്ള മമ്മൂട്ടി ആരാധകരുടെ കുത്തൊഴുക്കാണ്. അക്കൂട്ടത്തിൽ സെലിബ്രിറ്റികളും ഉണ്ട്. 'ഞങ്ങളുടെ സ്വന്തം മമ്മൂക്ക', 'ഇക്ക നമ്മള്‍ മലയാളികളുടെ സ്വത്ത്', 'ഞങ്ങളുടെ ഇതിഹാസത്തെ വാഴ്‌ത്തിയതിന് നന്ദി' എന്നിങ്ങനെ പോകുന്നു ചില കമന്‍റുകള്‍.
'ഭ്രമയുഗം' ആണ് മമ്മൂട്ടിയുടേതായി റിലീസിന് ഒരുങ്ങുന്ന ഏറ്റവും പുതിയ ചിത്രം (Mammootty starrer Bramayugam Release). രാഹുല്‍ സദാശിവന്‍ സംവിധാനം ചെയ്യുന്ന ചിത്രം ഫെബ്രുവരി15ന് തിയേറ്ററില്‍ എത്തും. അര്‍ജുന്‍ അശോകൻ, സിദ്ധാര്‍ഥ് ഭരതൻ, അമൽഡ ലിസ് എന്നിവരും ഈ ചിത്രത്തിൽ മറ്റ് പ്രധാന വേഷങ്ങളിലുണ്ട്. ഷെയിൻ നിഗം, രേവതി എന്നിവർ പ്രധാന കഥാപാത്രങ്ങളെ അവതരിപ്പിച്ച 'ഭൂതകാലം' എന്ന ഹൊറർ ചിത്രത്തിന് ശേഷം രാഹുൽ സദാശിവൻ സംവിധാനം ചെയ്യുന്ന സിനിമയാണ് 'ഭ്രമയുഗം'.
