പ്രേക്ഷകര്‍ ഏറെ പ്രതീക്ഷയോടെ കാത്തിരുന്ന ചിത്രമായിരുന്ന വിജയ് നായകനായ 'ദി ഗോട്ട്'. ചിത്രം പുറത്തിറങ്ങിയതു മുതല്‍ സമ്മിശ്ര പ്രതികരണങ്ങളാണ് ലഭിച്ചുകൊണ്ടിരുന്നത്. തമിഴ്‌നാട്ടിലെ കളക്ഷനെ ഈ പ്രതികരണം യാതൊരു വിധത്തിലും ബാധിച്ചിട്ടില്ലെങ്കിലും ആന്ധ്രപ്രദേശ്, തെലങ്കാന സംസ്ഥാനങ്ങളില്‍ ഇത് സാരമായി ബാധിച്ചതായാണ് റിപ്പോര്‍ട്ട്. ഈ സംസ്ഥാനങ്ങളില്‍ 2.5 കോടി രൂപ മാത്രമേ ചിത്രം ഇത്‌വരെ കളക്റ്റ് ചെയ്‌തിട്ടുള്ളു.
സെപ്റ്റംബര്‍ 5 നാണ് ഗോട്ട് തിയേറ്ററുകളിലെത്തിയത്. ആദ്യ ദിനം തന്നെ ഇന്ത്യയില്‍ നിന്ന് മാത്രമായി 60 കോടിയോളം വരുമാനം നേടി. തൊട്ടടുത്ത വെള്ളിയാഴ്‌ച വരുമാനം കുത്തനെ ഇടിഞ്ഞെങ്കിലും അവധിദിനമായ ശനിയാഴ്‌ച വീണ്ടും വരുമാനമുയര്‍ന്നു. വളരെ പെട്ടെന്നാണ് ഗോട്ട് 100 കോടി ക്ലബില്‍ പ്രവേശിച്ചത്. പിന്നീടുള്ള ദിവസങ്ങളില്‍ സിനിമയുടെ കളക്ഷന്‍ വലിയ തോതില്‍ കുറഞ്ഞതായാണ് റിപ്പോര്‍ട്ട്.
ആന്ധ്രപ്രദേശിലും തെലങ്കാനയിലുമായി ഗോട്ടിന്‍റെ വിതരണാവകാശം 16 കോടി രൂപക്കാണ് വിറ്റു പോയത്. സിനിമയ്ക്ക് ലഭിച്ച തണുപ്പന്‍ പ്രതികരണത്തിലൂടെ വിതരണക്കാര്‍ക്ക് 13 കോടിയോളം രൂപ നഷ്‌ടം സംഭവിച്ചുവെന്നും റിപ്പോര്‍ട്ടുകള്‍ പറയുന്നു.
ആക്ഷന്‍ മൂഡില്‍ ഒരുക്കിയ ഈ ചിത്രം എജിഎസ് എന്‍റര്‍ടൈന്‍മെന്‍റിന്‍റെ ബാനറില്‍ കല്‍പാത്തി എസ് ആഘോരം, കല്‍പാത്തി എസ് ഗണേഷ്, കല്‍പാത്തി എസ് സുരേഷ് എന്നിവര്‍ ചേര്‍ന്നാണ് നിര്‍മിക്കുന്നത്. യുവന്‍ ശങ്കര്‍ രാജയാണ് ചിത്രത്തിന് സംഗീതം ഒരുക്കിയിരിക്കുന്നത്.
ഇടിവി ഭാരത് കേരളം ഇനി വാട്‌സ്‌ആപ്പിലും
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
വിജയ് ഇരട്ടവേഷത്തിലെത്തിയ സിനിമയിൽ സ്നേഹ, മീനാക്ഷി ചൗധരി എന്നിവരാണ് നായികമാരായെത്തിയത്. ഇവർക്ക് പുറമെ പ്രശാന്ത്, പ്രഭുദേവ, ജയറാം, മോഹൻ, യോഗി ബാബു, വിടിവി ഗണേഷ്, ലൈല, വൈഭവ്, പ്രേംജി അമരൻ, അരവിന്ദ്, അജയ് രാജ്, പാർവതി നായർ, കോമൾ ശർമ്മ, യുഗേന്ദ്രൻ തുടങ്ങി വലിയ താരനിര തന്നെ ചിത്രത്തിലുണ്ട്.
അതേ സമയം സിനിമയുടെ രണ്ടാം ഭാഗം ഉടനെ റിലീസ് ചെയ്യുമെന്നാണ് പുറത്ത് വരുന്ന വിവരം. രണ്ടാം ഭാഗത്തിനുള്ള സാധ്യതകള്‍ തുറന്നിട്ടാണ് ആദ്യഭാഗ്യം അവസാനിക്കുന്നത്. ഗോട്ട് വേഴ്‌സ് ഒജിയെന്നായിരിക്കും രണ്ടാം ഭാഗത്തിന്‍റെ പേര്. രണ്ടാം ഭാഗത്തില്‍ വിജയിക്ക് പകരം അജിത്ത് നായകനാകുമെന്നാണ് സൂചന.
Also Read:ദളപതി ദർശനം...ഗോട്ട് തിയേറ്ററുകളില്‍; സമ്മിശ്ര പ്രതികരണവുമായി പ്രേക്ഷകർ
