ഹൈദരാബാദ്: സസ്യാഹാരിയായതിൽ അഭിമാനം കൊള്ളുന്നുവെന്ന ഫുഡ് ബ്ലോഗർ നളിനി ഉനഗറിൻ്റെ ട്വീറ്റിനെതിരെ ശക്തമായ നിലപാടുമായി നടി സ്വര ഭാസ്‌കർ. നളിനി ഉനഗർ എക്‌സിൽ അടുത്തിടെ പങ്കുവെച്ച ഫ്രൈഡ് റൈസും പനീറിൻ്റെയും ചിത്രത്തോടൊപ്പമാണ് താൻ ഒരു സസ്യാഹാരിയായതിൽ അഭിമാനിക്കുന്നുവെന്ന കുറിപ്പ് പങ്കുവെച്ചത്.
"ഞാൻ ഒരു സസ്യാഹാരിയായതിൽ അഭിമാനിക്കുന്നു. എൻ്റെ പ്ലേറ്റ് കണ്ണീരും ക്രൂരതയും കുറ്റബോധവും ഇല്ലാത്തതാണ്." എന്ന് നളിനി ഉനഗർ ട്വീറ്റ് ചെയ്‌തു. എന്നാൽ ഈ ട്വീറ്റിന് മറുപടിയുമായി സ്വര രംഗത്തെത്തി.
"സത്യസന്ധമായിട്ടും ഈ സസ്യാഹാരികളുടെ കള്ളത്തരം എനിക്ക് മനസ്സിലാകുന്നില്ല. പശുക്കിടാവിന് അമ്മയുടെ പാൽ നിഷേധിക്കുകയും പശുക്കളെ നിർബന്ധിച്ച് ഗർഭം ധരിപ്പിക്കുകയും പിന്നീട് അവയെ അമ്മയിൽ നിന്നും വേർപെടുത്തുന്നതു പോലെയാണ് നിങ്ങളുടെ ഭക്ഷണക്രമം മുഴുവനും. എന്നിട്ട് അവരുടെ പാൽ മോഷ്‌ടിക്കുകയും ചെയ്യുന്നു. നിങ്ങൾ വേരുപച്ചക്കറികൾ കഴിക്കുന്നുണ്ടോ? അത് ചെടിയെ മുഴുവൻ കൊല്ലുകയാണ് ചെയ്യുന്നത്". എന്ന് സ്വര പറഞ്ഞു.
"ഗാസയിൽ കൊച്ചുകുട്ടികളെ കശാപ്പുചെയ്യുന്നതിൽ സന്തോഷിക്കുന്ന അതേ ആളുകൾ തന്നെ ഇന്ത്യയിൽ മാംസം ഭക്ഷിക്കുന്നതിനെതിരെ രോഷാകുലരാകും" എന്ന് പ്രസ്‌താവിച്ച ഒരു പോസ്‌റ്റ് റീട്വീറ്റ് ചെയ്‌തുകൊണ്ടാണ് സ്വര തൻ്റെ നിലപാട് ശക്തമാക്കിയത്.
എന്തും തുറന്നടിച്ച് സംസാരിക്കുന്ന നടിയായാണ് സ്വര ഭാസ്‌കർ അറിയപ്പെടുന്നത്. നിരവധി വിഷയങ്ങളിൽ അഭിപ്രായപ്രകടനം നടത്തിയതിനാൽ തനിക്ക് ജോലി നഷ്‌ടപ്പെട്ടുവെന്നും "വിവാദ നടി" എന്നും "ഇൻ്റർനെറ്റിൽ ഏറ്റവും വെറുക്കപ്പെട്ട ബോളിവുഡ് വ്യക്തിത്വം" എന്നും താൻ ടാഗ് ചെയ്യപ്പെട്ടിട്ടുണ്ടെന്ന് താരം അടുത്തിടെ തുറന്നു പറഞ്ഞിരുന്നു.
Also Read: അല്ലു അർജുൻ്റെ 'പുഷ്‌പ 2' റിലീസിൽ മാറ്റം; പുതിയ തീയതി പ്രഖ്യാപിക്കാൻ നിർമാതാക്കൾ
