'മാളികപ്പുറം' ടീമിന്‍റെ രണ്ടാം വരവായ 'സുമതി വളവ്' സിനിമയുടെ ഓൾ ഇന്ത്യ വിതരണാവകാശം സ്വന്തമാക്കി ഡ്രീം ബിഗ് ഫിലിംസ്. 'ജയിലർ, ജവാൻ, ലിയോ, പൊന്നിയിൻ സെൽവൻ 2, മഞ്ഞുമ്മല്‍ ബോയ്‌സ്' തുടങ്ങി ബ്ലോക്ക് ബസ്‌റ്റർ ചിത്രങ്ങൾ തിയേറ്ററുകളിൽ എത്തിച്ച ഡ്രീം ബിഗ് ഫിലിംസ് ഈ വർഷം ക്രിസ്‌മസ് റിലീസായിട്ടാകും 'സുമതി വളവ്' തിയേറ്ററിൽ എത്തിക്കുക. 2022ൽ ക്രിസ്‌തുമസ് റിലീസായെത്തിയ 'മാളികപ്പുറം' ബോക്‌സോഫിസിൽ തിളങ്ങിയിരുന്നു. ഇവരുടെ രണ്ടാം വരവ് പ്രതീക്ഷയോടെയാണ് പ്രേക്ഷകർ കാത്തിരിക്കുന്നത്.
'മാളികപ്പുറം' ഒരുക്കിയ വിഷ്‌ണു ശശിശങ്കർ ആണ് ഈ ഹൊറർ ഫാന്‍റസി ചിത്രം സംവിധാനം ചെയ്യുന്നത്. അഭിലാഷ് പിള്ള തിരക്കഥാകൃത്തായ 'സുമതി വളവി'ന്‍റെ സംഗീത സംവിധാനം നിർവഹിക്കുന്നത് രഞ്ജിൻ രാജാണ്. 'മാളികപ്പുറ'ത്തിന് ശേഷമുള്ള ഇവരുടെ പുനഃസംഗമം നിരാശപ്പെടുത്തില്ലെന്നാണ് പ്രേക്ഷകരുടെ പ്രതീക്ഷ.
തൊണ്ണൂറുകളുടെ പശ്ചാത്തലത്തിൽ കഥ പറയുന്ന 'സുമതി വളവി'ൽ അർജുൻ അശോകൻ, മാളവിക മനോജ് എന്നിവർ പ്രധാന വേഷങ്ങളിലുണ്ട്. ഒപ്പം വമ്പൻ താരനിരയും അണിനിരക്കുന്നു. പാലക്കാട്, മൂന്നാർ, കുമളി, കമ്പം, തേനി, വട്ടവട എന്നിവിടങ്ങളാണ് ചിത്രത്തിന്‍റെ ലൊക്കേഷനുകൾ.
വാട്ടർമാൻ ഫിലിംസിന്‍റെ ബാനറിൽ മുരളി കുന്നുംപുറത്ത് നിർമിക്കുന്ന 'സുമതി വളവി'ന്‍റെ ടൈറ്റിൽ റിലീസ് അടുത്തിടെയാണ് കൊച്ചിയിൽ നടന്നത്. ഈ വർഷം ഓഗസ്‌റ്റിൽ സിനിമയുടെ ചിത്രീകരണം ആരംഭിക്കും. നദികളിൽ സുന്ദരി യമുന' എന്ന ചിത്രത്തിന് ശേഷം വാട്ടർമാൻ ഫിലിംസ് നിർമിക്കുന്ന സിനിമയാണിത്.
ശ്യാം മോഹൻ, സജിൻ ഗോപു, ലാൽ, സൈജു കുറുപ്പ്, ജയകൃഷ്‌ണൻ, ദേവനന്ദ, ശ്രീപത്, നിരഞ്ജൻ മണിയൻപിള്ള രാജു, ഗോപിക, ജീൻ പോൾ എന്നിവരോടൊപ്പം മറ്റനേകം പ്രമുഖ താരങ്ങളും ഈ ചിത്രത്തിൽ അണിനിരക്കുന്നുണ്ട്. ദിനേശ് പുരുഷോത്തമൻ ഛായാഗ്രഹണം നിർവഹിക്കുന്ന സിനിമയുടെ എഡിറ്റർ ഷെഫീഖ് മുഹമ്മദ്‌ അലി ആണ്.
സൗണ്ട് ഡിസൈനർ : എം ആർ രാജാകൃഷ്‌ണൻ, ആർട്ട്‌ : അജയ് മാങ്ങാട്, കോസ്‌റ്റ്യൂം : സുജിത് മട്ടന്നൂർ, മേക്കപ്പ് : ജിത്തു പയ്യന്നൂർ, ചീഫ് അസോസിയേറ്റ് ഡയറക്‌ടർ : ബിനു ജി നായർ, സ്‌റ്റിൽസ് : രാഹുൽ തങ്കച്ചൻ, ടൈറ്റിൽ ഡിസൈൻ : ശരത് വിനു എന്നിവരാണ് 'സുമതി വളവ്' സിനിമയുടെ മറ്റ് അണിയറ പ്രവർത്തകർ.
ALSO READ: പ്രഭാസിന്‍റെ 'കൽക്കി' കേരളത്തിലെത്തിക്കുക ദുൽഖർ; കാത്തിരിപ്പിൽ ആരാധകർ
