ഹൈദരാബാദ്: ബോളിവുഡ് യുവതാരനിരയിൽ ശ്രദ്ധേയനായ സിദ്ധാർഥ് മൽഹോത്ര നായകനായി എത്തുന്ന ഏറ്റവും പുതിയ ചിത്രമാണ് 'യോദ്ധ'. ദിഷ പടാനിയും രാശി ഖന്നയും നായികമാരായ ഈ ചിത്രത്തിന്‍റെ ടീസർ പുറത്തുവന്നു (Sidharth Malhotra, Disha Patani And Raashi Khanna starrer Yodha movie). ചിത്രത്തിന്‍റെ കൗതുകവും ആകാംക്ഷയുമേറ്റുന്ന ട്രെയിലറാണ് അണിയറ പ്രവർത്തകർ തിങ്കളാഴ്‌ച പുറത്തുവിട്ടത് (Yodha movie's Teaser out ).
- " class="align-text-top noRightClick twitterSection" data="">
സൈനികനായാണ് 'യോദ്ധ'യിൽ സിദ്ധാർഥ് മൽഹോത്ര പ്രത്യക്ഷപ്പെടുക. 'ഷേർഷാ', 'ഇന്ത്യൻ പൊലീസ് ഫോഴ്‌സ്' എന്നീ ചിത്രങ്ങൾക്ക് ശേഷം സിദ്ധാർഥ് മൽഹോത്ര വീണ്ടും യൂണിഫോമിലുള്ള ഒരു കഥാപാത്രത്തെ അവതരിപ്പിക്കുമ്പോൾ ആരാധകരും ഏറെ ആവേശത്തിലാണ്. ഹൈജാക്കർമാരെ തടയാൻ പൊരുതുന്ന സൈനികനായാണ് സിദ്ധാർഥ് 'യോദ്ധ'യിൽ എത്തുന്നത്.
സാഗർ ആംബ്രെയും പുഷ്‌കർ ഓജയും ചേർന്നാണ് ഈ ചിത്രം സംവിധാനം ചെയ്യുന്നത്. സിനിമയുടെ റിലീസിനായി പ്രതീക്ഷയോടെ കാത്തിരിക്കുന്ന ആരാധകരുടെ ആവേശം ഇരട്ടിയാക്കുന്നതാണ് ഇപ്പോൾ പുറത്തുവന്ന ടീസർ. ആക്ഷനും രാജ്യസ്‌നേഹവും നിറഞ്ഞതായിരിക്കും ഈ ചിത്രം എന്നാണ് ടീസർ സൂചിപ്പിക്കുന്നത്.
ഭീകരർ ഒരു യാത്ര വിമാനം ഹൈജാക്ക് ചെയ്യുന്നതിനെ കേന്ദ്രീകരിച്ചാണ് ഈ ചിത്രത്തിന്‍റെ കഥ വികസിക്കുന്നത്. ഈ വിമാനത്തിൽ ഓഫ് ഡ്യൂട്ടിയിലുള്ള സിദ്ധാർഥിന്‍റെ കഥാപാത്രവുമുണ്ട്. ഹൈജാക്കർമാരെ പരാജയപ്പെടുത്താനും എഞ്ചിൻ തകരുമ്പോൾ യാത്രക്കാരുടെ സുരക്ഷ ഉറപ്പാക്കാനും തന്ത്രങ്ങൾ മെനയുന്ന സിദ്ധാർഥിന്‍റെ കഥാപാത്രത്തെ ഈ ചിത്രം പിന്തുടരുന്നത്. ഏതായാലും യോദ്ധ സിനിമയുടെ റിലീസിനായുള്ള കാത്തിരിപ്പ് ആരാധകരുടെ കാത്തിരിപ്പ് ടീസർ വർധിപ്പിച്ചു എന്നതിൽ തർക്കമുണ്ടാകില്ല.
ഈ സിനിമയെ കുറിച്ചുള്ള സിദ്ധാർഥ് മൽഹോത്രയുടെ വാക്കുകൾ നേരത്തെ ശ്രദ്ധ നേടിയിരുന്നു. "ഒരു കലാകാരനെന്ന നിലയിൽ, നമ്മെ തിളങ്ങാൻ അനുവദിക്കുന്ന സ്ക്രിപ്റ്റുകളാണ് എപ്പോഴും തേടുന്നത്. ഈ പ്രോജക്റ്റ് എൻ്റെ ഒരു പുതിയ വശം വെളിപ്പെടുത്തുന്നതാണ്, അതിൽ ഞാൻ വളരെ നന്ദിയുള്ളവനാണ്.
പ്രേക്ഷകരിൽ നിന്നും ആരാധകരിൽ നിന്നുമുള്ള സ്‌നേഹം ശരിക്കും മാന്ത്രികമാണ്. അവർക്കായി യോദ്ധ എന്താണ് കരുതിയിരിക്കുന്നത് എന്ന് വെളിപ്പെടുത്താൻ ഞാൻ ഏറെ ആവേശത്തിലാണ്" - സിദ്ധാർഥിന്‍റെ വാക്കുകൾ ഇങ്ങനെ. ഹിരൂ യാഷ് ജോഹർ, കരൺ ജോഹർ, അപൂർവ മേത്ത, ശശാങ്ക് ഖൈതാൻ എന്നിവർ ചേർന്നാണ് 'യോദ്ധ'യുടെ നിർമാണം. ആമസോൺ പ്രൈമും ധർമ്മ പ്രൊഡക്ഷൻസും മെൻ്റർ ഡിസിപ്പിൾ എൻ്റർടൈൻമെൻ്റുമായി സഹകരിച്ചാണ് ഈ ചിത്രം അവതരിപ്പിക്കുന്നത്.
മാർച്ച് 15-ന് 'യോദ്ധ' തിയേറ്ററുകളിലെത്തും. കഴിഞ്ഞ വർഷം നവംബർ 11-ന് ആയിരുന്നു ഈ സിനിമയുടെ റിലീസ് ആദ്യം നിശ്ചയിച്ചിരുന്നത്. പിന്നീട് പലതവണ റിലീസ് മാറ്റിവെച്ച് ഒടുവിൽ മാർച്ച് 15-ന് റിലീസ് തീരുമാനിക്കുകയായിരുന്നു.
അതേസമയം നാടകീയതയും ആവേശവും ശരിയായ അളവിലുള്ള ഒരു ആക്ഷൻ ത്രില്ലറാണ് യോദ്ധ എന്നാണ് നിർമാതാവായ കരൺ ജോഹർ ഈ ചിത്രത്തെ വിശേഷിപ്പിച്ചത്. ഒരു ആക്ഷൻ ഹീറോയുടെ സത്തയെ പൂർണമായി ഉൾക്കൊള്ളുന്ന നടനാണ് സിദ്ധാർഥെന്നും കരൺ ജോഹർ അഭിപ്രായപ്പെട്ടിരുന്നു. ആധുനിക കാലത്തെ ആക്ഷൻ ഹീറോയുടെ വേഷം അദ്ദേഹം പൂർണമായും സ്വീകരിച്ചു എന്നും കരൺ പറഞ്ഞിരുന്നു.
