സോഷ്യൽ മീഡിയകളിലാകെ 'തലൈവർ 171' ആണ് ഇപ്പോൾ ചർച്ചാവിഷയം. രജനികാന്ത് - ലോകേഷ് കനകരാജ് കൂട്ടുകെട്ടിന്‍റെ 'തലൈവർ 171' ടൈറ്റിൽ ടീസറിന്‍റെ റിലീസിനായി ആകാംക്ഷയോടെ കാത്തിരിക്കുകയാണ് ആരാധകർ. 'തലൈവർ 171' എന്ന് താത്‌കാലികമായി പേരിട്ടിരിക്കുന്ന സിനിമയുടെ ടൈറ്റിൽ ഇന്ന് വൈകിട്ട് റിലീസ് ചെയ്യും.
സോഷ്യൽ മീഡിയകളിൽ #Thalaivar171 പോലുള്ള ഹാഷ്‌ടാഗുകൾ ഇതിനകം ട്രെൻഡിംഗാണ്. ഏറെ നാളുകൾക്ക് ശേഷം രജനികാന്ത് നെഗറ്റീവ് ഷേഡുള്ള കഥാപാത്രത്തെ അവതരിപ്പിക്കുന്നു എന്നത് തന്നെയാണ് ഈ സിനിമയ്‌ക്കായുള്ള ആരാധകരുടെ കാത്തിരിപ്പിന്‍റെ ആക്കം കൂട്ടുന്നത്. കൂടാതെ തകർപ്പൻ ഹിറ്റുകൾ സമ്മാനിച്ച ലോകേഷ് കനകരാജുമായി തമിഴകത്തിന്‍റെ സ്റ്റൈൽമന്നൻ കൈകോർക്കുന്നതിന്‍റെ ആവേശവും.
ഇപ്പോഴിതാ ഈ സിനിമയുമായി ബന്ധപ്പെട്ട മറ്റൊരു വാർത്തയും ഏവരുടെയും ശ്രദ്ധനേടുകയാണ്. 'തലൈവർ 171'ല്‍ നാഗാർജുന ഒരു പ്രധാന വേഷത്തിൽ എത്തുമെന്നാണ് റിപ്പോർട്ടുകൾ. എന്നാൽ ഇക്കാര്യത്തിൽ ഔദ്യോഗിക സ്ഥിരീകരണമൊന്നും വന്നിട്ടില്ല.
ലോകേഷ് സിനിമാറ്റിക് യൂണിവേഴ്‌സിൻ്റെ (എൽസിയു) ഭാഗമല്ലെങ്കിലും, 'തലൈവർ 171' അത്യുഗ്രൻ ആക്ഷൻ രംഗങ്ങളാൽ സമ്പന്നമാകുമെന്ന് തന്നെയാണ് ആരാധകരുടെ പ്രതീക്ഷ. ഇതാദ്യമായാണ് ലോകേഷും രജനികാന്തും ഒന്നിക്കുന്നത്. നേരത്തെ ഒരു അഭിമുഖത്തിൽ, 'തലൈവർ 171' എന്ന ചിത്രത്തിലൂടെ വ്യത്യസ്‌തമായ എന്തെങ്കിലും പരീക്ഷിക്കുമെന്ന് ലോകേഷ് സൂചിപ്പിച്ചിരുന്നു. ഇതും സിനിമയുടെ ഹൈപ്പ് ഉയർത്തിയിട്ടുണ്ട്.
ചിത്രത്തിലെ പ്രധാന വേഷങ്ങൾക്കായി ശ്രുതി ഹാസൻ, മുതിർന്ന നടി ശോഭന, രൺവീർ സിംഗ് എന്നിവരുമായി നിർമ്മാതാക്കൾ ചർച്ചകൾ നടത്തുന്നുണ്ടെന്ന് നേരത്തെ റിപ്പോർട്ടുകൾ പുറത്തുവന്നിരുന്നു. സൺ പിക്‌ചേഴ്‌സ് ആണ് ഈ സിനിമ നിർമ്മിക്കുന്നത്. അനിരുദ്ധ് രവിചന്ദറാണ് സംഗീത സംവിധാനം നിർവഹിക്കുന്നത്. ഏതായാലും രജനികാന്തിൻ്റെ കരിയറിലെ സുപ്രധാന നാഴികക്കല്ലായിരിക്കും 'തലൈവർ 171' എന്നാണ് പ്രതീക്ഷ.
ALSO READ: രങ്കണ്ണന്‍റെ 'കരിങ്കാളി റീൽ' പിന്നാമ്പുറ കാഴ്‌ചകളിതാ; സെറ്റിലും ചിരിപടർത്തി ഫഹദ്, പിന്നാലെ കയ്യടിയും
