മലയാളത്തിൽ നിരവധി സിനിമകൾക്ക് സംഗീത സംവിധാനം നിർവഹിച്ച വ്യക്‌തിയാണ് ജയൻ പിഷാരടി. നവ്യ നായർ കേന്ദ്ര കഥാപാത്രമായ 'കണ്ണേ മടങ്ങുക', മുകേഷ് പ്രധാന വേഷത്തിൽ എത്തിയ '11ൽ വ്യാഴം', ചാക്കോച്ചൻ നായകനായ 'സാൻവിച്ച്' തുടങ്ങീ സിനിമകൾക്ക് അദ്ദേഹം സംഗീത സംവിധാനം നിർവഹിച്ചിട്ടുണ്ട്. സനൽ കുമാര്‍ ശശിധരൻ സംവിധാനം ചെയ്‌ത 'ഫ്രോഗ്' എന്ന ഹ്രസ്വ ചിത്രത്തിലൂടെ മികച്ച സംഗീത സംവിധായകനുള്ള സംസ്ഥാന പുരസ്‌കാരവും ജയൻ പിഷാരടിക്ക് ലഭിച്ചിട്ടുണ്ട്.
മമ്മൂട്ടി ചിത്രം 'പരോൾ' അടക്കമുള്ള സിനിമകളിൽ മികച്ച പ്രകടനം കാഴ്‌ച്ചവച്ച ഹർഷിത പിഷാരടി ജയൻ പിഷാരടിയുടെ മകളാണ്. മാധ്യമപ്രവർത്തകയും പിന്നീട് എഴുത്തുകാരിയുമായ സ്‌മിത പിഷാരടിയാണ് അദ്ദേഹത്തിന്‍റെ ജീവിതപങ്കാളി. ജയന്‍ പിഷാരടിയും ഭാര്യയും മകളും തങ്ങളുടെ കലാവിശേഷങ്ങൾ ഇടിവി ഭാരതിനോട് പങ്കുവെച്ചിരിക്കുകയാണ്.
കലാ മേഖലയുമായി ബന്ധപ്പെട്ട് പ്രവർത്തിക്കുന്നവരാണ് മൂന്നു പേരും. മൂന്ന് പേരും മൂന്ന് തരത്തിലുള്ള കാഴ്‌ച്ചപ്പാടുള്ളവരാണ്. എങ്കിലും ഒരു കൂരയ്ക്കുള്ളിൽ കൂടുമ്പോൾ ഞങ്ങൾക്കിടയിൽ ഇമ്പം മാത്രമേ ഉള്ളൂവെന്നാണ് ജയൻ പിഷാരടി പറയുന്നത്. അച്ഛന്‍റെ പിന്തുണയോടെയാണ് താന്‍ സംഗീത ലോകത്തേയ്‌ക്ക് കടന്നു വന്നതെന്ന് അദ്ദേഹം തുറന്നു പറഞ്ഞു.
"അച്ഛന്‍റെ മികച്ച പിന്തുണയോടു കൂടിയാണ് സംഗീത ലോകത്തേയ്‌ക്ക് കടന്നുവരുന്നത്. പിന്നീട് സ്വാതി തിരുനാൾ സംഗീത കോളേജിൽ മൃദംഗം പഠിച്ചു. തുടർന്ന് അച്ഛന്‍റെ സുഹൃത്തുക്കൾ വഴിയാണ് സിനിമയിലേയ്‌ക്ക് അവസരം കിട്ടുന്നത്. ചെയ്യുന്ന സംഗീതത്തിൽ എപ്പോഴും വ്യത്യസ്‌തത കൊണ്ടുവരാൻ സാധിക്കുന്നത് കൊണ്ടാണ് ഇപ്പോഴും നിലനിൽക്കാൻ സാധിക്കുന്നത്.
യൂണിവേഴ്‌സിറ്റി കലോത്സവ വേദിയിൽ വച്ചാണ് ഭാര്യയായ സ്‌മിതയെ ആദ്യം കാണുന്നത്. സൗന്ദര്യം കണ്ടിട്ടല്ല, ഉള്ളിലെ കലാകാരിയെ തിരിച്ചറിഞ്ഞിട്ടാണ് ഇനിയുള്ള ജീവിതത്തിൽ ഒപ്പമുണ്ടാകുമോ എന്ന് സ്‌മിതയോട് ചോദിക്കുന്നത്. പിന്നീട് ഞാൻ സംഗീത സംവിധാനം നിർവ്വഹിച്ച നിരവധി ഗാനങ്ങൾക്ക് സ്‌മിത പാട്ടുകൾ എഴുതി." -ജയൻ പിഷാരടി പറഞ്ഞു.
കുഞ്ചാക്കോ ബോബൻ പ്രധാന വേഷത്തിൽ എത്തിയ 'സാൻവിച്ച്' എന്ന ചിത്രത്തിലെ 'പനിനീർ ചെമ്പകങ്ങള്‍' എന്ന ഗാനം രചിച്ചു കൊണ്ടാണ് സ്‌മിത പിഷാരടി മലയാള സംഗീത ലോകത്തേയ്‌ക്ക് കടന്നു വരുന്നത്. മധു ബാലകൃഷ്‌ണനും മഞ്‌ജരിയും ചേർന്നാണ് ആ ഗാനം ആലപിച്ചത്. ശേഷം ജയൻ പിഷാരടി സംഗീത സംവിധാനം നിർവഹിച്ച നിരവധി ഗാനങ്ങൾക്ക് സ്‌മിത വരികൾ എഴുതി.
മാധ്യമപ്രവർത്തകയായാണ് സ്‌മിത പിഷാരടി തന്‍റെ കരിയർ ആരംഭിക്കുന്നത്. ഓൾ ഇന്ത്യ റേഡിയോയിൽ അനൗൺസർ ആയാണ് തുടക്കം. പിന്നീട് ഏഷ്യാനെറ്റ്, സൂര്യ തുടങ്ങിയ മാധ്യമങ്ങളിൽ എട്ട് വർഷത്തോളം പ്രവർത്തിച്ചു. മാധ്യമ മേഖലയിലെ ജോലി യാന്ത്രികമായി തോന്നിയതിനെ തുടർന്നാണ് ജോലി ഉപേക്ഷിച്ച് സ്‌മിത എഴുത്തിന്‍റെ ലോകത്തേയ്‌ക്ക് കടന്നു വരുന്നത്.
നിരവധി പ്രമുഖ തിരക്കഥാകൃത്തുക്കൾക്കൊപ്പം സഹായിയായും പ്രവർത്തിച്ചു. ഇപ്പോൾ സ്വന്തമായി എഴുതുന്ന തിരക്കഥയുടെ പണിപ്പുരയിലാണ് സ്‌മിത. എഴുതാന്‍ ത്രില്ലർ സബ്‌ജക്‌ടുകളാണ് തനിക്ക് ഇഷ്‌ടമെന്നും സ്‌മിത വ്യക്തമാക്കി.
"ആദ്യം അഞ്ചോളം തിരക്കഥകളാണ് എഴുതി പൂർത്തിയാക്കിയത്. ഈ തിരക്കഥകളൊക്കെ ആദ്യം വായിച്ച് കേൾപ്പിക്കാൻ ഭാഗ്യം ലഭിച്ചത് സംവിധായകൻ ഫാസിൽ സാറിനോടും. അദ്ദേഹം കഥകളുടെ ആശയം പൂർണമായും കേട്ടു. ഈ അഞ്ച് കഥകളും സിനിമയ്ക്ക് യോഗ്യമാണെന്നുള്ള അദ്ദേഹത്തിന്‍റെ മറുപടിയിൽ നിന്നാണ് തിരക്കഥയെഴുത്ത് പ്രൊഫഷണലായി മുന്നോട്ടു കൊണ്ടു പോകാൻ തീരുമാനിക്കുന്നത്. ആദ്യ സിനിമയുടെ പണിപ്പുരയിലാണ്. അടുത്ത വർഷം സിനിമയുടെ ചിത്രീകരണം ആരംഭിക്കും."-സ്‌മിത പിഷാരടി പറഞ്ഞു.
കുട്ടിക്കാലം മുതൽ കലാമേഖലയോട് അഭിനിവേശം ഉണ്ടായിരുന്നുവെങ്കിലും എഴുത്തിന്‍റെ വഴിയെ സഞ്ചരിക്കാൻ തനിക്ക് പൂർണ്ണ പിന്തുണ നൽകിയത് ജയൻ പിഷാരടിയാണെന്ന് സ്‌മിത പറഞ്ഞു. തന്‍റെ മാതാപിതാക്കള്‍ നല്‍കിയ പിന്തുണയെ കുറിച്ച് മകള്‍ ഹര്‍ഷിതയും പ്രതികരിച്ചു. കുട്ടിക്കാലം മുതൽ ഒരു കലാകാരിയാകാൻ തന്‍റെ മാതാപിതാക്കള്‍ തനിക്ക് പൂർണ്ണ പിന്തുണ തന്നിരുന്നുവെന്ന് ഹർഷിത തുറന്നു പറഞ്ഞു.
"അച്ഛൻ ജയൻ പിഷാരടി പല സെറ്റുകളിലും പോകുമ്പോൾ എന്നെയും കൂടെ കൂട്ടിയിട്ടുണ്ട്. അച്ഛന്‍റെ സുഹൃത്തായിരുന്നു നിർമ്മാതാവ് ജൂഡ്. അതുവഴിയാണ് 'പരോൾ' എന്ന സിനിമയുടെ ഓഡീഷനിൽ പങ്കെടുക്കാൻ അവസരം ലഭിച്ചത്. ഓഡീഷനിൽ പങ്കെടുക്കാൻ മാത്രമാണ് അച്ഛന്‍റെ സഹായം വേണ്ടിവന്നത്. ഒഡീഷനിൽ നല്ല രീതിയിൽ പെർഫോം ചെയ്‌തതോടെ മമ്മൂക്കയോടൊപ്പം അഭിനയിക്കാനുള്ള അവസരം തുറന്നു കിട്ടുകയായിരുന്നു.
അച്ഛന്‍റെ സിനിമ ബന്ധങ്ങൾ തന്‍റെ കരിയറിന്‍റെ ഉയർച്ചയ്ക്ക് വേണ്ടി ദുരുപയോഗം ചെയ്‌തില്ലെന്ന ബോധ്യമുണ്ട്. 'പരോൾ' സിനിമയിൽ അവസരം ലഭിക്കുമ്പോൾ അതൊരു മമ്മൂട്ടി ചിത്രമാണെന്ന് അറിയില്ലായിരുന്നു. സിനിമയിലെ ആദ്യ രംഗവും ആദ്യ ഷോട്ടും മമ്മൂക്കയ്‌ക്കൊപ്പം ആയിരുന്നു. അതൊരു വലിയ ഭാഗ്യമായി കരുതുന്നു."-ഹർഷിത പിഷാരടി പറഞ്ഞു.
ഹർഷിത പ്രധാന വേഷത്തിൽ എത്തിയ 'നൊമ്പരക്കൂട്' എന്ന ചിത്രം നിരവധി വിദേശ ഫിലിം ഫെസ്‌റ്റിവലുകളില്‍ പ്രദര്‍ശിപ്പിച്ചിട്ടുണ്ട്. 'നൊമ്പരക്കൂട്' സിനിമയുടെ വിശേഷങ്ങളും ഹര്‍ഷിത പങ്കുവച്ചു.
"അന്താരാഷ്ട്ര തലത്തിൽ മികച്ച സംവിധായകനുള്ള അവാർഡുകൾ വാങ്ങിയിട്ടുള്ള വ്യക്‌തിത്വമാണ് ജോഷി മാത്യു. അദ്ദേഹമാണ് നൊമ്പരക്കൂട് സംവിധാനം ചെയ്‌തിരിക്കുന്നത്. അദ്ദേഹത്തിന്‍റെ തന്നെ നവയുഗ് എന്ന സംരംഭത്തിൽ കുട്ടിക്കാലം മുതൽ ഞാൻ പഠിക്കുന്നുണ്ടായിരുന്നു. അഭിനയവും എഴുത്തുമൊക്കെ അവിടുന്ന് സ്വായത്തമാക്കി. പിൽക്കാലത്ത് നൊമ്പരക്കൂട് എന്ന ചിത്രത്തിന്‍റെ പ്രാരംഭ ചർച്ചകൾ ആരംഭിച്ചപ്പോൾ തന്നെ പ്രധാന വേഷത്തിലേക്ക് ജോഷി മാത്യു സർ എന്നെ കാസ്‌റ്റ് ചെയ്യുകയായിരുന്നു."-ഹർഷിത പറഞ്ഞു.
സിനിമയ്ക്ക് പുറമെ, നാടകം, മോഡലിംഗ് എന്നീ മേഖലകളിലും ഹര്‍ഷിത ശോഭിക്കുന്നുണ്ട്. നിരവധി ബ്രാൻഡുകളുടെ മോഡലായും ഹർഷിത ഇതിനോടകം പ്രവർത്തിച്ചു. ഈ മൂന്ന് മേഖലകളെയും മൂന്ന് മേഖലകളായി തരംതിരിച്ച് തന്നെ ഒരു കലാകാരന്‍ കാണണമെന്നാണ് ഹർഷിതയുടെ അഭിപ്രായം. മൂന്ന് മേഖലകളിലും പെർഫോം ചെയ്യേണ്ടത് മൂന്ന് തരത്തിലാണ്. അത്തരമൊരു തിരിച്ചറിവുണ്ടെങ്കിൽ മാത്രമെ മൂന്ന് മേഖലയിലും പിടിച്ചുനിൽക്കാൻ ആവുകയുള്ളൂവെന്നും ഹർഷിത പറഞ്ഞു.
മമ്മൂട്ടി കേന്ദ്ര കഥാപാത്രത്തിലെത്തുന്ന 'ഡൊമനിക്' എന്ന ചിത്രത്തിലാണ് നിലവില്‍ ഹർഷത അഭിനയിച്ചു കൊണ്ടിരിക്കുന്നത്. അഭിനയത്തിന് പുറമെ സഹ സംവിധായികയായും ഹർഷിത പ്രവർത്തിച്ചിട്ടുണ്ട്.
തനിക്ക് മികച്ച സംഗീത സംവിധായകനുള്ള സംസ്ഥാന പുരസ്‌കാരം നേടിക്കൊടുത്ത സനല്‍കുമാര്‍ ശശിധരന്‍റെ 'ഫ്രോഗ്' എന്ന ഹ്രസ്വചിത്രത്തിന്‍റെ വിശേഷങ്ങളും ജയന്‍ പിഷാരടി പങ്കുവച്ചു. നിരവധി നല്ല ഗാനങ്ങൾ ഒരുക്കിയിട്ടും ജനങ്ങളുടെ ഇടയിൽ തന്‍റെ പേര് വേണ്ട രീതിയിൽ എത്തിപ്പെടാത്തതിന്‍റെ ദുഃഖവും അദ്ദേഹം രേഖപ്പെടുത്തി.
"ഫ്രോഗിന്‍റെ റീ റെക്കോർഡിംഗ് സമയത്ത് ആദ്യം ചെയ്‌തുവച്ച ബാക്ക്‌ഗ്രൗണ്ട് സ്‌കോര്‍ ഒട്ടും യോജിക്കുന്നതായി തോന്നിയില്ല. സംവിധായകനായ സനൽകുമാർ ശശിധരനോട് മാറ്റി ചെയ്തോട്ടെ എന്ന് ചോദിച്ചു. അദ്ദേഹത്തിന്‍റെ സമ്മതത്തോടെ പൂർണ്ണമായും എന്‍റെ കലാ ബോധത്തിനനുസരിച്ച് മറ്റൊരു സ്കോർ ഒരുക്കി. പുതിയ ബാക്ക്‌ഗ്രൗണ്ട് സ്കോർ സനൽകുമാർ ശശിധരന് നന്നായി ബോധിച്ചു.
ചെയ്‌തതിൽ ഏറ്റവുമധികം ഹൃദയത്തിൽ സ്‌പർശിച്ച ഒരു ഗാനം ഇതുവരെ പുറത്തിറക്കാൻ സാധിച്ചിട്ടില്ല. അകലുന്നുവോ തെന്നലേ അറിയുന്നുവോ എന്‍റെ നൊമ്പരം എന്ന് തുടങ്ങുന്ന ഗാനമാണത്. സുഹൃത്താണ് വരികൾ എഴുതിയത്. ഗാനത്തിന്‍റെ വരികളെഴുതി എന്നെ ഏല്‍പ്പിച്ച ശേഷം സുഹൃത്ത് മടങ്ങി. വരികൾ എഴുതിയ പേപ്പർ പിന്നീട് നഷ്‌ടപ്പെട്ടു. ചുരുട്ടിക്കൂട്ടിയ നിലയിൽ ആ പേപ്പർ കുറച്ച് സമയത്തിന് ശേഷം എനിക്ക് തിരികെ കിട്ടി.
വരികൾ വായിച്ചപ്പോൾ തന്നെ നല്ലൊരു ട്യൂൺ മനസ്സിൽ ഉദിച്ചു. ഒറ്റ രാത്രികൊണ്ട് ഗാനം തയ്യാർ. പക്ഷേ നിർഭാഗ്യവശാൽ അത് പുറത്തിറക്കാൻ സാധിച്ചില്ല. വരും കാലങ്ങളിൽ ഏതെങ്കിലും ഒരു സിനിമയിലൂടെ ആ ഗാനം പ്രേക്ഷകർക്ക് കേൾക്കാനാക്കുമെന്ന് പ്രതീക്ഷിക്കുന്നു. ആധുനിക കാലത്ത് കഴിവിനോടൊപ്പം ടെക്‌നോളജിയെയും വിശ്വസിക്കണം. രണ്ടിന്‍റെയും സമന്വയം പ്രേക്ഷകർ ഇഷ്‌ടപ്പെടുന്ന തരത്തിലുള്ള ഗാനങ്ങൾ ഉണ്ടാക്കാൻ നമ്മളെ സഹായിക്കും." -ജയൻ പിഷാരടി അഭിപ്രായപ്പെട്ടു.
ജയൻ പിഷാരടി സംഗീതം നൽകിയ നിരവധി പാട്ടുകൾക്ക് സ്‌മിത വരികൾ എഴുതി. ഒരു വഴക്കിലൂടെയാണ് പലപ്പോഴും പല ഗാനങ്ങളും ജനിക്കുന്നതെന്ന് ജയൻ പിഷാരടി പറഞ്ഞു. ട്യൂണിന് അനുസരിച്ച് വരികൾ വന്നില്ല, വരികളുടെ ഗാഢത ട്യൂണിനില്ല എന്നിങ്ങനെ പറഞ്ഞാണ് ഇരുവരും വഴക്കിടുന്നതെന്നും അദ്ദേഹം പറഞ്ഞു.
ഈ വഴക്ക് നല്ലൊരു ഗാനത്തിന്‍റെ പിറവിക്ക് കാരണമായി. 'നൊമ്പരക്കൂട്' എന്ന ചിത്രത്തിൽ ജയൻ പിഷാരടി സംഗീതം ചെയ്‌ത് സ്‌മിത എഴുതിയ ഗാനത്തില്‍ ഹർഷിതയാണ് അഭിനയിച്ചിരിക്കുന്നത്. എത്രപേർക്ക് ഇപ്രകാരം ഒരു ഭാഗ്യം ലഭിക്കുമെന്ന് ജയനും സ്‌മിതയും അതിശയോക്തിയോടെ പ്രതികരിച്ചു.
വീട്ടിൽ പലപ്പോഴും കലാ മേഖലയെ കുറിച്ചുള്ള ചർച്ചകളാണ് അരങ്ങേറുക. ഓരോരുത്തർക്കും ഓരോ അഭിപ്രായമുണ്ട്. ചർച്ചകൾ ചിലപ്പോൾ അവസാനമായി കണ്ട സിനിമയെ കുറിച്ചാവാം, കേട്ട ഗാനത്തെ കുറിച്ചാവാം വായിച്ച പുസ്‌തകത്തെ കുറിച്ചാവാം.
മൂന്നു പേർക്കും വിരുദ്ധ അഭിപ്രായമുണ്ടെങ്കിൽ ആ ദിവസം നല്ല രസമായിരിക്കും. ആരെങ്കിലും ഒരാൾ പറഞ്ഞ് ജയിക്കുന്നത് വരെ അത്തരം ചർച്ചകൾ തുടരും. ജയൻ പിഷാരടിയുടെയും കുടുംബത്തെയും ജീവവായുവാണ് കല. മലയാള സിനിമയുടെ ഉയരങ്ങളിലേയ്‌ക്ക് നടന്നു കയറുകയാണ് ഈ കലാകുടുംബം.
