ബോളിവുഡ് താരം സെയ്ഫ് അലി ഖാനെ ആക്രമിച്ച കേസുമായി ബന്ധപ്പെട്ട് ഇതുവരെ ആരെയും കസ്‌റ്റഡയില്‍ എടുത്തിട്ടില്ലെന്ന് വ്യക്‌തമാക്കി മുംബൈ പൊലീസ്. കേസുമായി ബന്ധപ്പെട്ട് ചോദ്യം ചെയ്യലിനായി ഒരാളെ ബാന്ദ്ര പൊലീസ് സ്‌റ്റേഷനിലേക്ക് കൊണ്ടുവന്നതായി നേരത്തെ റിപ്പോർട്ടുണ്ടായിരുന്നു.
കസ്‌റ്റഡിയില്‍ എടുത്ത ആള്‍ പ്രതി അല്ലെന്നും അയാള്‍ക്ക് അക്രമിയുമായി രൂപ സാദൃശ്യം മാത്രമെന്നും പൊലീസ്. ഇയാള്‍ക്ക് സെയ്ഫ് അലി ഖാനെ ആക്രമിച്ച കേസുമായി ബന്ധമില്ലെന്നും പൊലീസ് വ്യക്‌തമാക്കി.
അതേസമയം, സംഭവത്തില്‍ ഒരു സംഘത്തിനും പങ്കില്ലെന്ന് മഹാരാഷ്ട്ര ആഭ്യന്തര (നഗര) സഹമന്ത്രി യോഗേഷ് കദം പ്രതികരിച്ചു. "ഇതൊരു മോഷണ ശ്രമം മാത്രമായിരുന്നു, ഈ സംഭവത്തിൽ ഒരു സംഘത്തിനും പങ്കില്ല. പൊലീസ് കേസ് കൂടുതൽ അന്വേഷിക്കുന്നുണ്ട്," മന്ത്രി യോഗേഷ് കദം പറഞ്ഞു.
"സെയ്ഫ് അലി ഖാൻ ഇതുവരെ ഒരുതരത്തിലുള്ള സുരക്ഷയും ആവശ്യപ്പെട്ടിട്ടില്ല. ഈ ആക്രമണം ഒരു സംഘത്തിന്‍റെയും ഭാഗമല്ല. മോഷണം എന്ന ലക്ഷ്യത്തോടെ മാത്രമാണ് പ്രതി വീട്ടിൽ കയറിയത്. സെയ്ഫ് അലി ഖാനും പ്രതിയും തമ്മിൽ ഒരു തർക്കമുണ്ടായി, അതിൽ നടന് പരിക്കേറ്റു," യോഗേഷ് കദം പ്രതികരിച്ചു.
മുംബൈയിലെ പ്രമുഖരുടെ താമസ സ്ഥലമായ ബാന്ദ്ര വെസ്‌റ്റിലെ സെയ്ഫ് അലി ഖാന്‍റെ വസതിയില്‍ വച്ച് കഴിഞ്ഞ ദിവസം പുലര്‍ച്ചെ 2.30 ഓടെയാണ് നടനെതിരെ ആക്രമണം ഉണ്ടായത്. ഇദ്ദേഹത്തിന്‍റെ ബഹുനില മന്ദിരത്തില്‍ കവര്‍ച്ചയ്ക്കെത്തിയ സംഘം നടനോട് ഒരു കോടി രൂപ ആവശ്യപ്പെട്ടെന്നാണ് പൊലീസ് വൃത്തങ്ങള്‍ നൽകുന്ന റിപ്പോർട്ട്.
കെട്ടിടത്തിലെ പടിക്കെട്ടുകള്‍ വഴിയാണ് അക്രമികള്‍ വീടിന് അകത്തേയ്‌ക്ക് കടന്നത്. അക്രമികളുടെ ദൃശ്യങ്ങള്‍ സിസിടിവിയില്‍ പതിഞ്ഞിട്ടുണ്ട്. ടി ഷര്‍ട്ടും ജീന്‍സും ഓറഞ്ച് നിറത്തിലുള്ള സ്‌കാര്‍ഫും അണിഞ്ഞെത്തിയ ഇവര്‍ ഒരു കോടി രൂപ ആവശ്യപ്പെടുകയും താരം അത് നിരസിച്ചതോടെ അക്രമാസക്തരാകുകയും ചെയ്യുകയായിരുന്നു.
സംഭവ സമയം നടിയും സെയ്ഫ് അലി ഖാന്‍റെ ഭാര്യയുമായ കരീന കപൂർ ഖാനും കുട്ടികളും വീട്ടിലുണ്ടായിരുന്നു. എന്നാൽ അവർ സുരക്ഷിതരാണെന്ന് കരീന കപൂറിന്‍റെ ടീം അറിയിച്ചിരുന്നു. അതേസമയം വീട്ടില്‍ ഉണ്ടായിരുന്ന മറ്റ് രണ്ട് പേര്‍ക്ക് സംഭവത്തില്‍ പരിക്കേറ്റിറ്റുണ്ട്.
പരിക്കേറ്റ താരത്തെ മൂത്ത മകന്‍ ഇബ്രാഹിം ഉടന്‍ തന്നെ ലീലാവതി ആശുപത്രിയില്‍ എത്തിച്ചു. വീട്ടിലെ കാർ എടുക്കാന്‍ കഴിയാതിരുന്ന സാഹചര്യത്തിൽ ഓട്ടോ റിക്ഷയിലാണ് ഇബ്രാഹിം തന്‍റെ പിതാവിനെ ആശുപത്രിയില്‍ എത്തിച്ചത്.
ആറ് കുത്താണ് താരത്തിന്‍റെ ശരീരത്തിലുള്ളത്. കഴുത്തിലും കയ്യിലും പരിക്കുണ്ട്. നട്ടെല്ലിനോട് ചേര്‍ന്ന് ഗുരുതര പരിക്കും ഉണ്ടായിരുന്നു. ആശുപത്രിയില്‍ എത്തിച്ച താരത്തെ അടിയന്തര ശസ്‌ത്രക്രിയയ്‌ക്ക് വിധേയനാക്കിയ ശേഷം അപകടനില തരണം ചെയ്‌തതായി ഡോക്‌ടര്‍മാര്‍ അറിയിച്ചു.
Also Read: സെയ്ഫ് അലി ഖാനെ ആക്രമിച്ച പ്രതി പൊലീസ് കസ്‌റ്റഡിയില്‍ - SAIF ALI KHAN STABBED ATTACKER
