സിനിമയോളം മനുഷ്യനിൽ അഭിനിവേശവും കൗതുകവും ഉളവാക്കിയ മറ്റൊരു കലാസൃഷ്‌ടിയുണ്ടോ എന്ന് സംശയമാണ്. അതുകൊണ്ടുതന്നെ സിനിമയുടെ പിന്നാമ്പുറ കാഴ്‌ചകളും താരങ്ങളുടെ വിശേഷങ്ങളും ഒക്കെ അറിയാൻ പ്രേക്ഷകർക്ക് എപ്പോഴും ഒരു ജിജ്ഞാസ ഉണ്ടാകാറുണ്ട്. സിനിമയ്‌ക്ക് സിനിമ തന്നെ ആശയമായി വരുമ്പോൾ അവയ്‌ക്ക് ജനപ്രീതി ലഭിക്കുന്നതും സ്വാഭാവികമാണ്
കെ ജി ജോർജ് ചിത്രം 'ലേഖയുടെ മരണം ഒരു ഫ്ലാഷ് ബാക്കി'ൽ തുടങ്ങി ഇങ്ങ് 2024ൽ വിനീത് ശ്രീനിവാസൻ ചിത്രം 'വർഷങ്ങൾക്കു ശേഷം' വരെ സിനിമയ്‌ക്കുള്ളിൽ സിനിമയുടെ കഥ പറഞ്ഞ ചിത്രങ്ങളാണ്. 'ലേഖയുടെ മരണം ഒരു ഫ്ലാഷ് ബാക്കി'ന് മുൻപും സിനിമ എന്ന ആശയം ആസ്‌പദമാക്കി നിരവധി ചിത്രങ്ങൾ മലയാളത്തിൽ റിലീസ് ചെയ്‌തിട്ടുണ്ട്. അതിപ്രശസ്‌തമായ സിനിമകളിൽ പ്രതിപാദിച്ച് പോയിരിക്കുന്ന ചില സിനിമ പേരുകളെയും സിനിമ സംവിധായകരുടെ പേരുകളും ഒന്ന് പരിശോധിച്ചാലോ!
ലിസ്റ്റിൽ ആദ്യം തിയേറ്ററുകളിൽ നിറഞ്ഞോടുന്ന വിനീത് ശ്രീനിവാസൻ ചിത്രം 'വർഷങ്ങൾക്കു ശേഷ'ത്തിലെ സാങ്കൽപ്പിക സിനിമയുടെ പേരാണ്. ധ്യാൻ ശ്രീനിവാസന്‍റെ കഥാപാത്രമായ വേണു കൂത്തുപറമ്പ് സംവിധാനം ചെയ്‌ത 'ജീവിത ഗാഥകളെ'. നിവിൻ പോളി അവതരിപ്പിക്കുന്ന കഥാപാത്രമായ സൂപ്പർസ്റ്റാർ നിധിൻ മോളിയുടെ തിരിച്ചു വരവായിരുന്നു ചിത്രം. സിനിമകൾ തകർന്നു തരിപ്പണമായ നിതിൻ മോളിക്ക് ലഭിച്ച സൂപ്പർ ഹിറ്റ് ചിത്രമായിരുന്നു 'ജീവിത ഗാഥകളെ'.
സിനിമയ്‌ക്കുള്ളിൽ മറ്റൊരു സൂപ്പർസ്റ്റാർ കഥാപാത്രത്തിന് കരിയർ തിരിച്ചുനൽകിയ ചിത്രമായിരുന്നു 'അന്ന് പെയ്‌ത മഴയിൽ'. ഉദയഭാനു സംവിധാനം ചെയ്‌ത ചിത്രം സൂപ്പർസ്റ്റാർ സരോജ് കുമാർ എന്ന രാജപ്പൻ തെങ്ങിൻ മൂടിന് കരിയർ ബ്രേക്ക് നൽകി. 'ഉദയനാണ് താരം' എന്ന ചിത്രത്തിലെ മോഹൻലാൽ കഥാപാത്രം സംവിധാനം ചെയ്യുന്ന ചിത്രമാണ് 'അന്ന് പെയ്‌ത മഴയിൽ'.
'ഉദയനാണ് താരം' എന്ന ചിത്രത്തിലെ മറ്റൊരു സൂപ്പർ സ്റ്റാർ കഥാപാത്രം വട്ടവിള ജയകുമാറിന്‍റെ 'ദോശ രാഘവനെ' കുറിച്ചും പ്രതിപാദിക്കുന്നുണ്ട്. സരോജ് കുമാറിന്‍റെ കഴിഞ്ഞ ചിത്രങ്ങളായ 'ബോട്ട് ജെട്ടി', 'മുന്താണി കടവത്ത്' തിയേറ്ററുകളിൽ പരാജയമായി എന്നും പച്ചാളം ഭാസി പറയുന്നുണ്ട്. ചിത്രത്തിന്‍റെ രണ്ടാം ഭാഗം എന്ന പേരിൽ ഇറങ്ങിയ 'പത്മശ്രീ സരോജ് കുമാർ' എന്ന സിനിമയിലെ സിനിമ പേരുകളാണ് വിചിത്രം. സരോജ് കുമാർ അഭിനയിച്ച് പുറത്തിറങ്ങാൻ ഇരിക്കുന്ന ചിത്രത്തിന്‍റെ പേരാണ് 'വെക്കടാ വെടി'.
'ഇരുകാലി മൃഗം' എന്ന ചിത്രം ജൂലൈയിൽ ചിത്രീകരണം ആരംഭിക്കും. ഈ സിനിമയിൽ വട്ടവള ജയകുമാർ എന്ന കഥാപാത്രം അഭിനയിക്കുന്ന ചിത്രമാണ് 'ചുറ്റിക്കളി തട്ടിക്കളി'. സിനിമയിലെ മറ്റൊരു സൂപ്പർതാരമായ താനൂർ അബ്‌ദുള്ളയുടെ ചിത്രമാണ് 'വെള്ളിടി'. 'അഴകിയ രാവണൻ' എന്ന ചിത്രത്തിൽ ശ്രീനിവാസന്‍റെ കഥാപാത്രമായ അംബുജാക്ഷൻ തന്‍റെ നോവലായ 'ചിറകൊടിഞ്ഞ കിനാവുകൾ' സിനിമയാക്കാൻ ശങ്കർ ദാസിനോട് സംസാരിക്കുന്നുണ്ട്.
ശങ്കർദാസ് എന്ന പ്രൊഡ്യൂസറായി ആയി വേഷമിടുന്നത് സാക്ഷാൽ മമ്മൂട്ടി. ബിജു മേനോന്‍റെ കഥാപാത്രം ശരത്താണ് സിനിമയുടെ സംവിധായകൻ. എന്നാൽ 'ചിറകൊടിഞ്ഞ കിനാവുകളു'ടെ ആശയം ശരത്, ശങ്കർദാസ് പ്രൊഡക്ഷനിൽ സംവിധാനം ചെയ്യുന്ന ചിത്രത്തിന്‍റെ പേരാണ് 'ഘടികാരം'. ഇതിലെ ഇന്നസെന്‍റ് കഥാപാത്രം 'അരി വറക്കുന്ന' രംഗം ആരും മറക്കാൻ ഇടയില്ല. 'ചിറകൊടിഞ്ഞ കിനാവുകൾ' എന്ന പേരിൽ മലയാളത്തിൽ പിന്നീടൊരു സിനിമയും ഉണ്ടായി.
അടുത്തകാലത്ത് പുറത്തിറങ്ങിയ 'ഡ്രൈവിങ് ലൈസൻസ്' എന്ന ചിത്രത്തിലും സിനിമ പ്രതിപാദിക്കുന്നുണ്ട്. കഥയിലെ പൃഥ്വിരാജിന്‍റെ കഥാപാത്രമായ സൂപ്പർസ്റ്റാർ ഹരീന്ദ്രന് ഡ്രൈവിംഗ് ലൈസൻസ് എടുക്കുന്നതുമായി ബന്ധപ്പെട്ട് കുരുവിള (സുരാജ് വെഞ്ഞാറമൂട്) എന്ന വെഹിക്കിൾ ഇൻസ്‌പെക്‌ടറുമായി ഉണ്ടാകുന്ന വഴക്കാണ് ചിത്രത്തിന് ആധാരം. ചിത്രത്തിൽ ഹരീന്ദ്രൻ അഭിനയിച്ചുകൊണ്ടിരിക്കുന്ന സിനിമയുടെ ഭാഗമായാണ് അദ്ദേഹത്തിന് ഡ്രൈവിംഗ് ലൈസൻസ് എടുക്കേണ്ടതായി വരുന്നത്.
എല്ലാ പ്രശ്‌നങ്ങൾക്കും കാരണമായ ആ സിനിമയുടെ പേരാണ് 'ദി ഗ്രേറ്റ് ഡിക്ടെറ്റർ'. നടൻ അരുൺകുമാറിന്‍റെ കഥാപാത്രം സംവിധാനം ചെയ്യുന്ന ചിത്രം നിർമ്മിക്കുന്നത് ലാലു അലക്‌സിന്‍റെ കഥാപാത്രമാണ്. സിനിമയിലെ മറ്റൊരു സൂപ്പർതാരമായ ഭദ്രന്‍റെ പ്രശസ്‌തമായ ചിത്രമാണ് 'അഴകിയ മന്ത്രി'. സുരേഷ് കൃഷ്‌ണയാണ് സൂപ്പർസ്റ്റാർ ഭദ്രൻ.
ഫിലിം സ്റ്റാർ എന്ന ദിലീപ് - കലാഭവൻ മണി ചിത്രവും സിനിമയെ ആസ്‌പദമാക്കി ഒരുക്കിയ സിനിമയാണ്. ദിലീപിന്‍റെ കഥാപാത്രം വളരെ കഷ്‌ടപ്പെട്ട് കലാഭവൻ മണിയെ കൊണ്ട് അഭിനയിപ്പിക്കണമെന്ന് ആഗ്രഹിച്ച് എഴുതിയ തിരക്കഥയാണ് അഭയാർഥികൾ. ഇത് കലാഭവൻ മണിയുടെ കഥാപാത്രം തന്നെ നിർമ്മിച്ച് അശോകന്‍റെ കഥാപാത്ര സംവിധാനം ചെയ്‌ത് സിനിമയായി.
മലയാളത്തിലെ എക്കാലത്തെയും സൂപ്പർ ഹിറ്റ് ചിത്രമായ 'കഥ പറയുമ്പോൾ' എന്ന ചലച്ചിത്രത്തിലും സിനിമ പ്രതിപാദിക്കുന്നുണ്ട്. കഥയിലെ സൂപ്പർതാരമായ അശോക് രാജ് ബാർബർ ബാലന്‍റെ സുഹൃത്ത് കൂടിയാണ്. ബാർബർ ബാലന്‍റെ നാട്ടിൽ മമ്മൂട്ടിയുടെ കഥാപാത്രമായ അശോക് രാജ് ഷൂട്ടിങ്ങിനായി എത്തുന്ന ചിത്രത്തിന്‍റെ പേരാണ് 'പക്ഷികൾ പറക്കട്ടെ'.
പൃഥ്വിരാജ് ചിത്രം 'വൺവേ ടിക്കറ്റി'ൽ ഒരു യഥാർഥ സിനിമയെ തന്നെ സിനിമയുടെ ഭാഗമാക്കി മാറ്റി. കടുത്ത മമ്മൂട്ടി ആരാധകനായി അഭിനയിക്കുന്ന പൃഥ്വിരാജ് മമ്മൂട്ടിയെ കാണാനായി എത്തുന്നത് പത്മകുമാർ സംവിധാനം ചെയ്‌ത 'പരുന്ത്' എന്ന ചിത്രത്തിന്‍റെ ലൊക്കേഷനിലേക്ക് ആണ്. 'പരുന്തി'ലെ രംഗങ്ങൾ ചിത്രീകരിക്കുന്നത് 'വൺവേ ടിക്കറ്റ്' എന്ന ചിത്രത്തിൽ കാണിച്ചിട്ടുണ്ട്. സിനിമയിൽ മമ്മൂട്ടിയുടേതായി പ്രതിപാദിക്കുന്ന എല്ലാ ചിത്രങ്ങളും മമ്മൂട്ടിയുടെ സിനിമകൾ തന്നെയാണ്.
മലയാളത്തിലെ വിഖ്യാത ക്ലാസിക് ചിത്രമാണ് 'ലേഖയുടെ മരണം ഒരു ഫ്ലാഷ് ബാക്ക്.
കെ ജി ജോർജിന്‍റെ സംവിധാനത്തിൽ എത്തിയ ചിത്രം മലയാളത്തിലെ ഒരു യഥാർഥ സംഭവത്തെ ആസ്‌പദമാക്കി ഒരുക്കിയതാണ്. ഭരത് ഗോപിയുടെ കഥാപാത്രമായ സംവിധായകൻ സുരേഷ് ബാബു കേന്ദ്ര കഥാപാത്രമായ ലേഖയെ നായികയാക്കി ഒരുക്കുന്ന ചിത്രമാണ് 'ഒരു വേശ്യയുടെ കഥ'. സിനിമയിൽ ചിത്രത്തിലെ അഭിനയത്തിന് ലേഖയ്‌ക്ക് ദേശീയ പുരസ്‌കാരം ലഭിക്കുന്നുണ്ട്.
രഞ്ജിത് സംവിധാനം ചെയ്‌ത തിരക്കഥ എന്ന ചിത്രത്തിലും പല സിനിമ പേരുകൾ പ്രതിപാദിക്കുന്നുണ്ട്. കഥയിലെ സൂപ്പർ താരങ്ങളായ അജയചന്ദ്രനും മാളവികയും 1982 ർൽ ആദ്യമായി അഭിനയിക്കുന്ന ചിത്രമാണ് 'ഒരു മഞ്ഞുകാലത്ത്'. സുധീർ എന്നായിരുന്നു അനൂപ് മേനോൻ അവതരിപ്പിച്ച അജയചന്ദ്രൻ എന്ന കഥാപാത്രത്തിന് സിനിമയിൽ ഉള്ള പേര്. മാളവികയും അജയചന്ദ്രനും അവസാനമായി ഒന്നിച്ച് അഭിനയിച്ച ഒരു ചിത്രത്തിന്‍റെ രംഗവും സിനിമയിൽ കാണിക്കുന്നു. ആ സിനിമയുടെ പേരാണ് 'കാലം'. ചിത്രത്തിൽ അജയചന്ദ്രൻ സൂപ്പർതാരമായും മാളവിക സഹനടിയായും അഭിനയിക്കുന്നു. പ്രിയാമണിയാണ് മാളവികയുടെ വേഷത്തിൽ.
'മുല്ലശ്ശേരി മാധവൻകുട്ടി' എന്ന അനൂപ് മേനോൻ ചിത്രത്തിലും സിനിമ തന്നെയാണ് ആശയം. ഷിജു എന്ന നടന്‍റെ പ്രതാപചന്ദ്രൻ എന്ന കഥാപാത്രം അഭിനയിക്കുന്ന സിനിമയുടെ പേരാണ് 'ഒരു സ്വപ്‌നത്തിന്‍റെ കഥ'. നിർമ്മിച്ചത് മുല്ലശ്ശേരി മാധവൻകുട്ടി. അനൂപ് മേനോനാണ് മാധവൻകുട്ടിയായി വേഷമിടുന്നത്.
മോഹൻലാൽ ചിത്രം 'ഛോട്ടാ മുംബൈ'യിൽ ഷക്കീല ചിത്രവും മമ്മൂട്ടി ചിത്രം 'ഷൈലോക്കി'ൽ നിരവധി സിനിമകളും പ്രതിപാദിക്കുന്നു. സിനിമയ്‌ക്കുള്ളിൽ അത്തരം സിനിമകളുടെ പേരുകൾ കാണിക്കുന്നില്ല എന്നുള്ളതാണ് വാസ്‌തവം. ജിസ് ജോയ് ചിത്രം 'മോഹൻ കുമാർ ഫാൻസ്‌' അടക്കം നിരവധി ചിത്രങ്ങൾ സിനിമ ആസ്‌പദമാക്കി മലയാളത്തിൽ റിലീസ് ചെയ്‌തിട്ടുണ്ട്, നിരവധി സാങ്കൽപിക സിനിമ പേരുകളും.
