കൊല്‍ക്കൊത്ത: ഭാരതീയ ദളിത് സാഹിത്യ അക്കാദമിയുടെ ഡോ. അംബേദ്ക്കർ നാഷണൽ അവാർഡിന് യുവ സംവിധായകനും ഫോക്ക്‌ലോര്‍ ഗവേഷകനുമായ ജിംസിത്ത് അമ്പലപ്പാട് അർഹനായി. വയനാടൻ ആദിവാസി വിഭാഗമായ പണിയ സമുദായത്തിന്‍റെ ജീവിത പശ്ചാത്തലവും അവരുടെ കലാരൂപമായ വട്ടക്കളിയും പ്രതിപാദിക്കുന്ന അദ്ദേഹത്തിന്‍റെ ഡോക്യുമെന്‍ററിയാണ് അവർഡിനായി പരിഗണിച്ചത്.
ദളിത് സാഹിത്യ അക്കാദമി കല, സാഹിത്യം, സാമൂഹ്യപ്രവർത്തനം എന്നീ മേഖലകളിലെ പ്രതിഭകൾക്കാണ് അവാർഡ് ഏർപ്പെടുത്തിയിട്ടുള്ളത്. ഡിസംബർ 8 ന് ന്യൂഡൽഹി പഞ്ചശീൽ ആശ്രമത്തിലെ അംബേദ്‌ക്കര്‍ മണ്ഡപത്തിൽ നടക്കുന്ന ദളിത് സാഹിത്യ അക്കാദമിയുടെ നാൽപ്പതാമത് സമ്മേളനത്തിൽ കേന്ദ്രസർക്കാർ പ്രതിനിധികളുടെയും, കലാസംസ്‌ക്കാരികരംഗത്തെ പ്രമുഖരുടെയും സാന്നിദ്ധ്യത്തിൽ യുവ സംവിധായാകനുള്ള പുരസ്‌ക്കാരം ജിംസിത്ത് അമ്പലപ്പാട് ഏറ്റുവാങ്ങും.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
കേരള പൊതുവിദ്യാഭ്യാസ വകുപ്പിന്റെ ആംഗീകാരം, കേരള മാപ്പിളകലാ അക്കാദമി അവാർഡ്(2022), മണിമുഴക്കം കലാഭവൻ മണി പുരസ്‌കാരം(2023) തുടങ്ങിയ നിരവധി അംഗീകാരങ്ങൾ ജിംസിത്തിന് ലഭിച്ചിട്ടുണ്ട്. കോഴിക്കോട് ജില്ലയിൽ ചേളന്നൂർ അമ്പലപ്പാട് സ്വദേശി വിശ്വനാഥൻ നായരുടെയും പ്രേമവല്ലിയുടെയും മകനാണ്.
ഡോ. അംബേദ്‌ക്കര്‍ ദേശീയ അവാർഡ്
സാമൂഹ്യനീതി, ശാക്തീകരണ മന്ത്രാലയത്തിനു കീഴിലെ സ്വയംഭരണ സ്ഥാപനമായ ഡോ. അംബേദ്കര്‍ ഫൗണ്ടേഷന്‍ (Dr. Ambedkar Foundation) നല്‍കുന്ന ഡോ. അബേദ്‌ക്കര്‍ ദേശീയ അവാര്‍ഡാണിത്.
1992-ലാണ് ഡോ. അംബേദ്‌ക്കര്‍ ദേശീയ അവാർഡ് ഏർപ്പെടുത്തിയത്. സാമൂഹിക ധാരണയ്ക്കും ദുർബല വിഭാഗങ്ങളുടെ ഉന്നമനത്തിനും വേണ്ടി നടത്തുന്ന പ്രവർത്തനങ്ങൾ പരിഗണിച്ചാണ് അവാർഡ്. സമൂഹത്തിലെ ദുർബല വിഭാഗങ്ങളുടെ ജീവിത നിലവാരത്തിൽ കാര്യമായ സ്വാധീനം ചെലുത്തിയ, പ്രസിദ്ധീകരിച്ച ഒരു കൃതിയുടെയോ ബഹുജന പ്രസ്ഥാനത്തിൻ്റെയോ അടിസ്ഥാനത്തിലാണ് തിരഞ്ഞെടുപ്പ് നടത്തുന്നത്.
ദുർബല വിഭാഗങ്ങളെ ഇന്ത്യൻ സമൂഹത്തിൻ്റെ മുഖ്യധാരയിലേക്ക് സമന്വയിപ്പിക്കുന്നതിനും അവരുടെ സാമൂഹിക-സാമ്പത്തിക-വിദ്യാഭ്യാസ ഉന്നമനത്തിനായി പ്രവർത്തിക്കുന്നതിനുമുള്ള ശ്രമങ്ങളും ജൂറി പരിഗണിക്കും.
Also Read:ടൊവിനോ തോമസിന്‍റെ 'നരിവേട്ട'; രണ്ടാംഘട്ട ചിത്രീകരണം വയനാട്ടിൽ ആരംഭിച്ചു
