ശോഭ പടിഞ്ഞാറ്റിലിന്റെ ഗേൾ ഫ്രണ്ട്സ് എന്ന ചിത്രം മലയാളം ടുഡേ വിഭാഗത്തിൽ ഇന്ന് (15 ഡിസംബർ) ഐ.എഫ്.എഫ്.കെയിൽ പ്രദർശിപ്പിക്കും. വൈകിട്ട് 6:30 ന് ന്യൂ തീയേറ്ററിലാണു പ്രദർശനം. ശോഭന പടിഞ്ഞാറ്റിലിന്റെ ആദ്യ ചിത്രമാണ്'ഗേൾ ഫ്രണ്ട്സ്'. വളരെ സ്വതന്ത്രരായ ആദർശ കഥാപാത്രങ്ങളാത്ത എല്ലാ സ്വഭാവങ്ങളും ചേർന്ന അഞ്ച് പെൺകുട്ടികളുടെ കഥ പറയുന്ന ക്വയർ ചിത്രമാണ് ഗേൾ ഫ്രണ്ട്‌സെന്നും സിനിമയിൽ ക്വയർ കഥാപാത്രങ്ങളെ അവതരിപ്പിച്ചിരിക്കുന്നത് ക്വയർ മനുഷ്യർ തന്നെയാണ്.
ഒരു ഷോർട്ട് ഫിലിം എന്ന രീതിയിൽ തുടങ്ങിയ ചിത്രം പിന്നീട് ഒരു ഫീചർ ഫിലിമായി മാറുകയിരുന്നു. ആദ്യ സിനിമയിൽ ആഗ്രഹിച്ച ഒട്ടുമിക്ക ഘടകങ്ങളും കൊണ്ടുവരാൻ സാധിച്ചവെന്നതിൽ അഭിമാനുണ്ടെന്നു ശോഭന പറഞ്ഞു. സ്ത്രീകളുടെ സങ്കീർണ അവസ്ഥകൾ തന്റെ ആദ്യ സിനിമയിലൂടെ തന്നെ കാണിക്കാൻ സാധിച്ചു. സ്ത്രീ സൗഹൃദങ്ങളുടെ ആഴവും അടുപ്പവും എല്ലാകാലത്തും സമകാലികമാണെന്നും ശോഭന പറഞ്ഞു.
ആദ്യ ഐ.എഫ്.എഫ്.കെ മുതൽ പങ്കെടുക്കുന്ന ശോഭന, സ്ത്രീ സംവിധായകാർക്കും സിനിമ സ്വപ്‌നം കാണുന്ന നവാഗത സംവിധായകർക്കും സ്വതന്ത്ര ചിത്രങ്ങൾക്കും ഇത്തവണത്തെ ഐ.എഫ്.എഫ്.കെയിൽ പ്രാധിനിധ്യം കൊടുക്കുന്നതുകൊണ്ടാണ് തന്റെ ചിത്രമായ ഗേൾ ഫ്രണ്ട്സ് 29-മത് ഐ.എഫ്.എഫ്.കെയിൽ പ്രേക്ഷകർ കാണുന്നതെന്നും ശോഭന കൂടിച്ചേർത്തു.
കർണാടകയിലെ സിദ്ദി സമൂഹത്തിന്റെ കഥ പറയുന്ന, ജയൻ ചെറിയാന്റെ റിഥം ഓഫ് ദമാം രാവിലെ 9.15ന് തിരുവനന്തപുരം ന്യൂ തീയേറ്ററിൽ പ്രദർശിപ്പിക്കും. കർണാടകത്തിൽ ജീവിക്കുന്ന സിദ്ദി സമൂഹത്തിന്റെ അറിയപ്പെടാത്ത കഥയാണു ചിത്രം പറയുന്നത്. സിദ്ദി സമൂഹത്തിൽ നിന്നുള്ളവർ തന്നെയാണ് ചിത്രത്തിലെ അഭിനേതാക്കൾ.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
തലമുറകളായി നേരിട്ട അടിച്ചമർത്തലും അവരുടെ അതിജീവനവും ദമാം എന്ന സംഗീതോപകരണത്തിന്റെ സാധ്യതകൾ ഉപയോഗപ്പെടുത്തി പറയുകയാണ് ചിത്രം. ചിത്രത്തിൽ വേഷമിട്ട ജയറാം സിദ്ദി എന്ന പന്ത്രണ്ടുകാരൻ ഐ.എഫ്.എഫ്.കെയുടെ വേദിയിലെത്തുന്നുണ്ട്.
സിദ്ദി ഭാഷയിൽ ഇറങ്ങുന്ന ആദ്യ ചിത്രമാണ് റിഥം ഓഫ് ദമാം. ലിപിയില്ലാത്ത ഈ ഭാഷ എട്ടു വർഷത്തോളമെടുത്താണ് സംവിധായകൻ പഠിച്ചെടുത്തത്. ജയൻ ചെറിയാന്റെ മുൻ ചിത്രങ്ങളായ പാപിലിയോ ബുദ്ധ, കാ ബോഡിസ്‌കേപ്‌സ് എന്നിവ നിരൂപക പ്രശംസ നേടിയിരുന്നു. ഗോവ രാജ്യാന്തര ചലച്ചിത്രമേളയിൽ ഇത്തവണ റിഥം ഓഫ് ദമാം പ്രദർശിപ്പിച്ചിരുന്നു.
പ്രശസ്‌ത സംവിധായകൻ കൃഷാന്ദ് ആർ.കെ. സംവിധാനം ചെയ്‌ത സംഘർഷ ഘടന ഇന്ന് പ്രദർശിപ്പിക്കും. മലയാളം സിനിമ ടുഡേ വിഭാഗത്തിൽ വൈകിട്ട് ആറിന് അജന്ത തിയേറ്ററിലാണു ചിത്രത്തിന്റെ ആദ്യ പ്രദർശനം. ഐ.എഫ്.എഫ്.കെയിലേക്ക് മൂന്നാം തവണയും തന്റെ സിനിമ തെരഞ്ഞെടുക്കപ്പെട്ടതിന്റെ സന്തോഷത്തിലാണ്
പുരുഷപ്രേതം, ആവാസവ്യൂഹം, വൃത്താകൃതിയിലുള്ള ചതുരം എന്നീ സിനിമകളിലൂടെ പ്രേക്ഷകപ്രീതി നേടിയ കൃഷാന്ദ്. അഞ്ചാം നൂറ്റാണ്ടിൽ ജീവിച്ചിരുന്ന ചൈനീസ് ജനറലായ സുങ് ത്സുവിന്റെ 'ആർട്ട് ഓഫ് വാർ' എന്ന രചനയെ ആസ്പദമാക്കിയുള്ള സിനിമയാണ് 'സംഘർഷ ഘടന'.
ലോകം യുദ്ധവെറിയുടെ ഭീകരതയിൽ നിൽക്കുമ്പോൾ, മൂവായിരത്തോളം വർഷങ്ങൾക്ക് മുമ്പ് യുദ്ധങ്ങൾ എങ്ങനെ വേണമെന്ന് ഒരു പുസ്തകം പറഞ്ഞുവച്ചതിനെ വിമർശനാത്മകമായാണ് സംവിധായകൻ സമീപിക്കുന്നത്. യുദ്ധങ്ങളുടെ നിരർഥകത കൂടി ചിത്രം അനാവരണം ചെയ്യുന്നു.
സനൂപ് പടവീടൻ, വിഷ്ണു അഗസ്ത്യ, രാജഗോപാൽ എന്നിവർ പ്രധാന കഥാപാത്രങ്ങളെ അവതരിപ്പിക്കുന്നു. സ്ഥിരംശൈലിയിൽ നിന്ന് വേറിട്ട രീതിയിൽ സിനിമകൾ എടുക്കുന്നത് ബോധപൂർവം അല്ലെന്നും മനസിൽ സിനിമകൾ ജനിക്കുന്നതേ അങ്ങനെയാണെന്നും സംവിധായൻ പറഞ്ഞു. തന്റെ കഥകൾ എല്ലാം സാധാരണമാണ്. എന്നാൽ അതിന്റെ ആഖ്യാന രീതിയിൽ വ്യത്യാസം കൊണ്ടുവരുമ്പോൾ അതു സിനിമയെ വേറിട്ട തലത്തിലേക്ക് ഉയർത്തുകയാണ് പതിവെന്നും കൃഷാന്ദ് പറയുന്നു.
ഐ.എഫ്.എഫ്.കെ. വേദിയിലെ സ്ഥിരം സന്ദർശകനായ കൃഷാന്ദ്, വരും ദിവസങ്ങളിൽ 'സംഘർഷ ഘടന'യെ പറ്റി കാണികളുമായി സംവദിക്കും.
Also Read:എത്തിയത് സിനിമ പഠിക്കാൻ; 29ാമത് കേരള രാജ്യാന്തര ചലച്ചിത്രമേളയിൽ പ്രയാഗ മാർട്ടിൻ
