മലയാളത്തിന്‍റെ പാൻ ഇന്ത്യൻ സംഗീത സംവിധായകനാണ് ജേക്‌സ് ബിജോയ്. മലയാളത്തിലും തമിഴിലും തെലുഗുവിലും തരംഗം സൃഷ്‌ടിച്ച ജേക്‌സ് ബിജോയ് ഇപ്പോഴിതാ ബോളിവുഡിലും അരങ്ങേറിയിരിക്കുകയാണ്. 2014 ൽ എയ്ഞ്ചൽസ് എന്ന മലയാളം ചിത്രത്തിലൂടെയാണ് ജേക്‌സ് ബിജോയ് സംഗീത സംവിധായകനായി അരങ്ങേറുന്നത്.
അമേരിക്കയിൽ ജോലി ചെയ്യുകയായിരുന്ന ജേക്‌സ് സംഗീതത്തോടുള്ള കടുത്ത അഭിനിവേശത്തിന്‍റെ പുറത്താണ് ജോലി ഉപേക്ഷിച്ച് സിനിമ സംഗീത ലോകത്തേക്ക് ചുവടുവയ്ച്ചത്. ആദ്യകാലങ്ങളിൽ വർഷത്തിൽ ഒന്നോ രണ്ടോ ചിത്രങ്ങൾക്ക് മാത്രം സംഗീതസംവിധാനം നിർവഹിച്ചിരുന്ന ജേക്‌സ് ബിജോയ് ഇപ്പോൾ ഒരു വർഷത്തിൽ പത്തിലധികം സിനിമകൾക്കാണ് സംഗീത സംവിധാനം നിർവഹിക്കുന്നത്.
രണം, അയ്യപ്പനും കോശിയും, കൽക്കി, ഇരട്ട, പോർത്തൊഴിൽ, ഗരുഡൻ, ഫോറൻസിക്, സൂര്യാസ് സാറ്റർഡേ, സാറ്റർഡേ നൈറ്റ്സ്, അടിഗോ അമിഗോസ്, ഹലോ മമ്മി, ഐഡന്‍റിറ്റി തുടങ്ങിയ ഹിറ്റ് ചിത്രങ്ങളുടെ സംഗീത സംവിധാനം നിർവഹിച്ചിരിക്കുന്നത് ജേക്‌സ് ബിജോയിയാണ്. മോഹൻലാൽ തരുമൂർത്തി ചിത്രം തുടരും, റോഷനാ സംവിധാനം ചെയ്യുന്ന ഹിന്ദി ചിത്രമായ ദേവ തുടങ്ങി സിനിമകളാണ് ജേക്‌സ് ബിജോയിയുടെ സംഗീത സംവിധാനത്തിൽ ഉടൻ തീയേറ്ററുകളിൽ എത്തുന്ന സിനിമകൾ. സംഗീത വിശേഷങ്ങൾ ഇടിവി ഭാരതിനോട് തുറന്നു സംസാരിക്കുകയാണ് ജേക്‌സ് ബിജോയ്.
പാൻ ഇന്ത്യൻ മ്യൂസിക് ഡയറക്‌ടർ എന്ന വിശേഷണത്തിന് ചിരിയായിരുന്നു ജേക്‌സ് ബിജോയിയുടെ മറുപടി. 'ഒരു സിനിമയ്ക്ക് സംഗീത സംവിധാനം നിർവഹിക്കുമ്പോൾ മലയാളമാണോ തമിഴാണോ തെലുങ്കാണോ എന്നൊന്നും ഒരിക്കലും ചിന്തിക്കാറില്ല. തന്നെക്കൊണ്ട് സാധിക്കുന്ന രീതിയിൽ പരമാവധി കഠിനാധ്വാനം ചെയ്‌തുതന്നെയാണ് എല്ലാ ഭാഷയിലുള്ള സിനിമകൾക്കും സംഗീത സംവിധാനം നിർവഹിക്കുന്നത്. തുടർച്ചയായി മലയാള ചിത്രങ്ങൾ ചെയ്‌ത് കൊണ്ടിരിക്കുമ്പോൾ ഇടയ്ക്ക് തമിഴിലോ തെലുങ്കിലോ ഒരു സിനിമ ചെയ്യാൻ അവസരം ലഭിക്കുന്നത് റിലീഫ് ആയിട്ടാണ് കരുതുന്നതെന്ന് ജേക്‌സ് ബിജോയ് പറഞ്ഞു.
ഏറ്റവും പുതിയ വിശേഷം റോഷൻ ആൻഡ്രൂസിന്‍റെ സംവിധാനത്തിൽ ഒരുങ്ങുന്ന ഹിന്ദി ചിത്രമായ ദേവ തന്നെയാണ്. സിനിമ അതിഗംഭീരമായി ചിത്രീകരിച്ചിട്ടുണ്ട്. സിനിമ നന്നായി വരും എന്നതിൽ യാതൊരു സംശയവും തനിക്കില്ല. റോഷൻ ആൻഡ്രൂസ് എന്ന സംവിധായകനുമായി ഇതിനു മുമ്പ് രണ്ട് ചിത്രങ്ങളിൽ താൻ വർക്ക് ചെയ്‌തിട്ടുണ്ട്. ദുൽഖർ സൽമാൻ നായകനായ സല്യൂട്ട്, നിവിൻപോളി ചിത്രം സാറ്റർഡേ നൈറ്റ് എന്നിവയാണ് ആ സിനിമകൾ.
അങ്ങനെ ഒരു ബന്ധത്തിന്‍റെ പുറത്ത് തന്നെയാണ് റോഷൻ ആൻഡ്രൂസ് തന്നെ ഈ ചിത്രത്തിലേക്ക് ക്ഷണിക്കുന്നത്. റോഷൻ ആൻഡ്രൂസ് തന്നെ സംവിധാനം ചെയ്‌ത പൃഥ്വിരാജ് ചിത്രം മുംബൈ പോലീസിന്‍റെ റീമേക്ക് ആണോ ദേവ എന്ന് എല്ലാവരും ചോദിക്കുന്നുണ്ട്. വ്യക്തമായി പറയട്ടെ, ദേവ ഒരു റീമേക്ക് ചിത്രമല്ല. തികച്ചും ഫ്രഷ് ആയിട്ട് തന്നെയാണ് റോഷൻ ആൻഡ്രൂസ് ദേവ ഒരുക്കിയിരിക്കുന്നത്.
എങ്കിലും മുംബൈ പോലീസ് എന്ന ചിത്രത്തിലെ ചില കാര്യങ്ങൾ ഈ സിനിമയിൽ ഉൾപ്പെടുത്തിയിട്ടുണ്ട്. മുംബൈ പോലീസ് എന്ന സിനിമ അപ്പാടെ റീമേക്ക് ചെയ്യാൻ റോഷൻ ആൻഡ്രൂസിന് താത്‌പര്യമുണ്ടായിരുന്നില്ല, ജേക്‌സ് ബിജോയ് വെളിപ്പെടുത്തി.
മുംബൈ പോലീസിലെ ചില എലമെന്‍റ്സ് ദേവ എന്ന ചിത്രത്തിലുണ്ട്: മുംബൈ പോലീസ് എന്ന സിനിമയിലെ ചില എലമെന്‍റ്സ് ദേവ എന്ന ചിത്രത്തിൽ ഉൾപ്പെടുത്തിയിട്ടുണ്ടെങ്കിലും വളരെയധികം മാറ്റങ്ങൾ വരുത്തിയാണ് സിനിമ ഒരുക്കിയിരിക്കുന്നത്. തികച്ചും ഒരു വ്യത്യസ്‌ത ചിത്രം തന്നെയാണത്. സോഷ്യൽ മീഡിയയിൽ ഇതൊരു റീമേക്ക് ചിത്രമാണെന്ന് പ്രചരിക്കുന്നുണ്ട്. അതിനുള്ള വ്യക്തമായ മറുപടിയാണ് ഞാനിപ്പോൾ പറഞ്ഞിരിക്കുന്നതെന്ന് ജേക്‌സ് ബിജോയ് പറഞ്ഞു.
ഹിന്ദി സിനിമകളിൽ ജോലി ചെയ്യുക എന്ന് പറഞ്ഞാൽ വളരെ വ്യത്യസ്‌തമായ ഒരു അനുഭവമാണ് നമുക്ക് ലഭിക്കുക. സൗത്ത് ഇന്ത്യൻ സിനിമകളിൽ വർക്ക് ചെയ്യുമ്പോൾ അവസാനവാക്ക് സംവിധായകന്‍റേതാണ്. നമ്മുടെ ക്രിയേറ്റീവ് സ്പേസുകളിൽ ഒരു പക്ഷേ സംവിധായകൻ മാത്രമാകും ഇടപെടുക. എന്നാൽ ബോളിവുഡിൽ അങ്ങനെയല്ല. ക്രിയേറ്റിവിറ്റിക്കപ്പുറം ഒരു കോർപ്പറേറ്റ് ലെവൽ ചിന്താഗതി കൂടി അവർക്കുണ്ട്. വർക്ക് ചെയ്യാൻ ധാരാളം സമയം ലഭിക്കുമെങ്കിലും കൃത്യസമയം, കോർപ്പറേറ്റ് മാനദണ്ഡങ്ങൾ എന്നിവയൊക്കെ പാലിക്കപ്പെടേണ്ടി വരും.
'പക്ഷേ ദേവ എന്ന ചിത്രത്തിൽ ഇത്തരം കോർപ്പറേറ്റ് ഇടപെടലുകളിൽ നിന്ന് എന്നെ സംരക്ഷിച്ചു നിർത്തിയത് സംവിധായകൻ റോഷൻ ആൻഡ്രൂസ് ആണ്. പ്രൊഡക്ഷൻ ഹൗസുകളിൽ നിന്നുള്ള എനിക്കുള്ള നിർദേശങ്ങൾ റോഷൻ ചേട്ടന്‍റെ പക്കൽ എത്തിയ ശേഷം ഫിൽട്ടർ ചെയ്‌താകും എന്നിലേക്ക് എത്തുക. അദ്ദേഹത്തെ പോലൊരു കമാൻഡിങ് പവർ ഉള്ള സംവിധായകന്‍റെ വാക്കുകൾക്ക് അവിടെ നല്ല വിലയുണ്ട്. അതുകൊണ്ട് തന്നെ സംവിധായകന് മേലെ എനിക്ക് ആരോടും ഉത്തരം പറയേണ്ടി വന്നിട്ടില്ല. എന്‍റെ സൃഷ്‌ടികളിൽ ആരും ഇടപെട്ടിട്ടുമില്ല' എന്ന് ജേക്‌സ് ബിജോയ് വ്യക്തമാക്കി.
ദേവ എന്ന ചിത്രത്തിൽ സംഗീതം ഒരുക്കിയിരിക്കുന്നത് എന്‍റെ ശൈലിയിൽ തന്നെയാണ്. ഒരൽപം മെലോഡിയസ് ആയി ചെയ്യേണ്ട സംഗീതത്തിന് കുറച്ച് ഹിന്ദുസ്ഥാനി സംഗീതത്തിന്‍റെ മേമ്പൊടി ചേർക്കും. മലയാളത്തിനാണെങ്കിലും തമിഴിൽ ആണെങ്കിലും തെലുഗുവിലാണെങ്കിലും ഹിന്ദിയിൽ ആണെങ്കിലും ബാക്ഗ്രൗണ്ട് സ്കോർ ഒരുക്കുമ്പോൾ പൊതുവേ ഒരു ഇന്‍റർനാഷണൽ പാറ്റേൺ ആണ് ഞാൻ പിടിക്കാറുള്ളത്. അങ്ങനെ ഒരു പാറ്റേൺ എല്ലാ ഭാഷയിലും വർക്ക് ഔട്ടാകും. അതേ രീതി തന്നെയാണ് ദേവയിലെ ബാഗ്രൗണ്ട് സ്കോർ ഒരുക്കുമ്പോഴും സ്വീകരിച്ചത്.
ദേവ കരിയറിലെ ഏറ്റവും വലിയ ചിത്രങ്ങളിൽ ഒന്നാകും: 'ഷാഹിദ് കപൂറിനെ പോലൊരു നാഷണൽ ഹീറോയോടൊപ്പം വർക്ക് ചെയ്യാൻ സാധിച്ചത് വലിയൊരു എക്‌സ്‌പീരിയൻസ് ആയിരുന്നു. ഒരു ഹീറോ മെറ്റീരിയലിന് അപ്പുറം അദ്ദേഹം ഒരു മികച്ച നടൻ കൂടിയാണ്. ദേവ എന്‍റെ കരിയറിലെ ഏറ്റവും വലിയ ചിത്രങ്ങളിൽ ഒന്നാകാനുള്ള സാധ്യത കൂടിയുണ്ട്. വളരെ സങ്കീർണമായ ഒരു ആശയമാണ് സിനിമ സംസാരിക്കുന്നത്.
രണ്ട് റാപ്പ് സോങ്ങുകളും ബാക്ഗ്രൗണ്ട് സ്കോറുമാണ് ദേവയ്ക്ക് വേണ്ടി ഞാൻ സംഗീതം നൽകിയിരിക്കുന്നത്. മ്യൂസിക്കിന് ഗംഭീര സ്കോപ്പ് നൽകുന്ന രീതിയിലാണ് റോഷൻ ചേട്ടൻ ദേവ ചിത്രീകരിച്ച് വയ്ച്ചിരിക്കുന്നത്. റോഷൻ ചേട്ടനും ഷാഹിദ് കപൂറിനും നിർമാണ കമ്പനിക്കും ഞാൻ ചെയ്‌ത സംഗീതത്തിൽ പൂർണ തൃപ്‌തിയുണ്ട്. അവരുടെ തൃപ്‌തിയിലും എന്‍റെ വർക്കിലും ഞാൻ പൂർണ സന്തോഷവാനാണ്' ജേക്‌സ് ബിജോയ് വെളിപ്പെടുത്തി.
'ദേവ എന്ന സിനിമയ്ക്ക് പശ്ചാത്തല സംഗീതം ഒരുക്കുമ്പോൾ ഒരു സ്ഥലത്ത് പോലും ചലഞ്ചിങ് ആയി തോന്നിയിട്ടില്ല. അതിനൊരു കാരണമുണ്ട്. 40ലധികം ത്രില്ലർ സിനിമകൾക്ക്‌ ഞാൻ എന്‍റെ കരിയറിൽ സംഗീതം നൽകി കഴിഞ്ഞു. ഏറ്റവും അവസാനം പുറത്തിറങ്ങിയ ടോവിനോ തോമസ് നായകനായ ഐഡന്‍റിറ്റി എന്ന സിനിമയും ത്രില്ലർ ജോണറിലാണ് ഒരുക്കിയിരിക്കുന്നത്. ഒരുപാട് ത്രില്ലർ സിനിമകൾ ചെയ്‌തതുകൊണ്ട് തന്നെ ഒരു ത്രില്ലർ സിനിമയ്ക്ക് വേണ്ട ചേരുവകൾ ഒക്കെ എനിക്ക് നന്നായി അറിയാം. അതുകൊണ്ട് ദേവയുടെ പശ്ചാത്തല സംഗീതം ഒരുക്കാൻ കഷ്‌ടപ്പെടേണ്ടി വന്നിട്ടില്ല.
നായകന് എപ്രകാരമുള്ള ഒരു ബാക്ഗ്രൗണ്ട് സ്കോർ ആവശ്യമാണ്, വില്ലനെ എങ്ങനെ സംഗീതത്തിലൂടെ അവതരിപ്പിക്കണം ഇതൊക്കെയാകും ആദ്യം ചിന്തിക്കുക. ഇതൊന്നു് സെറ്റ് ചെയ്‌ത് കഴിഞ്ഞാൽ പിന്നെ വർക്ക് ചെയ്യാൻ വളരെ എളുപ്പമാണ്. സാധാരണ ഒരു മാസം ഒന്നരമാസം കൊണ്ടാണ് ഒരു സിനിമ ഞാൻ വർക്ക് ചെയ്‌ത് പൂർത്തിയാക്കുന്നത്. പക്ഷേ ദേവ എന്ന ചിത്രം മൂന്ന് മാസം കൊണ്ടാണ് പൂർത്തിയായത്.
സദാസമയവും സംവിധായകൻ റോഷൻ ആൻഡ്രൂസ് എന്നോടൊപ്പം ഉണ്ടാകും. മലയാളത്തിലെയും തമിഴിലെയും പോലെ ധൃതിപിടിച്ച് വർക്ക് ചെയ്യേണ്ട ആവശ്യം ഹിന്ദിയിൽ ഇല്ല. പലപ്പോഴും വളരെ റിലാക്‌സ്‌ഡ് ആയി വൈകുന്നേരങ്ങളിലാവും ഞങ്ങൾ വർക്ക് ചെയ്‌ത് തുടങ്ങുക. സിനിമയുടെ റിലീസിന് ആറുമാസം മുമ്പ് തന്നെ ഹിന്ദി ചിത്രങ്ങൾ ഫൈനൽ കട്ട് ചെയ്‌ത് സംഗീത സംവിധായകന്‍റെ ടേബിളിൽ എത്തിക്കും.
മലയാളത്തിലോ തമിഴിലോ തെലുഗുവിലോ ആണെങ്കിൽ സിനിമയുടെ റിലീസിന് 10 ദിവസം മുമ്പാകും ചിലപ്പോൾ സിനിമകൾ മ്യൂസിക് ചെയ്യാൻ എത്തുക. ഓഗസ്‌റ്റ് 29ന് റിലീസ് ചെയ്യേണ്ട ഒരു ചിത്രം ഓഗസ്‌റ്റ് 1 ന് ഫൈനൽ കട്ട് ചെയ്‌ത് എന്‍റെ അടുത്ത് എത്തിയിട്ടുണ്ട്. ഇത്തരം കാര്യങ്ങളിൽ ഹിന്ദി സിനിമയുടെ സമീപനം മികച്ചതാണ്. കഴിഞ്ഞ വർഷം നവംബർ പകുതിയോടെ ദേവയുടെ വർക്കുകൾ ഞാൻ പൂർത്തിയാക്കിയിരുന്നു' ജേക്‌സ് ബിജോയ് വ്യക്തമാക്കി.
ഹൈബ്രിഡ് ഓർക്കസ്ട്രൽ മ്യൂസിക്കാണ് ദേവയുടെ പശ്ചാത്തല സംഗീതത്തിൽ ഉപയോഗിച്ചിരിക്കുന്നത്: 'മറ്റുഭാഷ സിനിമകളിൽ നിന്നും വിഭിന്നമായി തന്‍റെ അനുഭവത്തിൽ ബോളിവുഡ് പോസ്‌റ്റ് പ്രൊഡക്ഷനിൽ വളരെയധികം ശ്രദ്ധ കേന്ദ്രീകരിക്കുന്നുണ്ട്. ഒരുതരത്തിലുള്ള റഫറൻസൊ ഇൻസ്‌പിരേഷനോ സ്വീകരിക്കുന്ന ഒരു സ്വഭാവം തനിക്കില്ല. ഹൈബ്രിഡ് ഓർക്കസ്ട്രൽ മ്യൂസിക് എന്നൊരു രീതിയാണ് ദേവയുടെ പശ്ചാത്തല സംഗീതത്തിൽ ഞാൻ ഉപയോഗിച്ചിരിക്കുന്നത്.
ഹൈബ്രിഡ് എന്ന് പറയുമ്പോൾ പ്യുവർ ഓർക്കസ്ട്രേഷൻ മാത്രമല്ല. ഇലക്ട്രോണിക് എലമെന്‍റ്‌സിന്‍റെ സമന്വയം ഇങ്ങനെയുള്ള സംഗീതത്തിൽ ഉണ്ടാകും. പശ്ചാത്തല സംഗീതത്തിന് തെക്കേ ഇന്ത്യയുടെ ചേരുവകൾ ചേർത്തുള്ള വരികളുടെ പിൻബലമുണ്ട്. ശക്തമായ ആശയങ്ങൾ ഉൾക്കൊള്ളുന്ന വരികളാണവ.
സിനിമയുടെ ആദ്യ പകുതിയിലും, ആക്ഷൻ സീക്വന്‍സുകളിലും വടക്കേ ഇന്ത്യയുടെ ഒരു സ്വഭാവം കൂടുതൽ ആഡ് ചെയ്‌തു. വടക്കേ ഇന്ത്യൻ സംഗീതത്തിൽ ഉപയോഗിക്കുന്ന വാദ്യോപകരണങ്ങളെ ആ സമയത്തെ പശ്ചാത്തല സംഗീതത്തിൽ കൃത്യമായി ഉപയോഗപ്പെടുത്തിയിട്ടുണ്ട്. ദോൽ, മഹാരാഷ്ട്രയുടെ തനത് വാദ്യോപകരണങ്ങൾ ഇവയൊക്കെ ഉപയോഗിച്ച് ചെയ്‌ത പശ്ചാത്തല സംഗീതം എനിക്ക് വളരെ ഇന്‍ററസ്‌റ്റിങ്ങായി തോന്നിയിരുന്നു' എന്ന് ജേക്‌സ് ബിജോയ് പറഞ്ഞു.
'ഒരു സിനിമയുടെ സ്വഭാവത്തിനനുസരിച്ച് ഇന്ത്യയുടെ ആത്മാവ് ഉറങ്ങുന്ന സംഗീതത്തെ മുഴുവൻ ആവാഹിക്കുന്ന രീതി ചില്ലറ കാര്യമല്ല. ഇന്ത്യ ഒട്ടുക്കുള്ള സംഗീതത്തിന്‍റെ സ്വഭാവം നമ്മൾ അറിയണം, അതിനെ കുറിച്ച് പഠിക്കണം. ഇതൊക്കെ എങ്ങനെ മനസിലാക്കി, ഉൾക്കൊണ്ടു എന്നൊക്കെ വിശദീകരിക്കാൻ വളരെ ബുദ്ധിമുട്ടാണ്.
ഒരു മ്യൂസിക് ഡയറക്‌ടറായി മാറുന്നതിന് മുമ്പ് തന്നെ ഞാൻ ചെയ്‌തത് ഇത്തരം പഠനങ്ങൾ നടത്തുക എന്നുള്ളതായിരുന്നു. ഇത്തരം കാര്യങ്ങളൊക്കെ മനസിലാക്കിയിട്ട് ഇൻഡസ്ട്രിയിലേക്ക് കടന്നു വന്നാൽ ചെയ്യുന്ന ജോലി വളരെ എളുപ്പമാകും. അല്ലെങ്കിൽ ഒരു ജോലി ചെയ്‌തുകൊണ്ടിരിക്കുമ്പോൾ പഠിക്കേണ്ടതായി വരും. അത് ഇരട്ടി പണിയാണ് ജേക്‌സ് ബിജോയ് വിശദീകരിച്ചു.
