എറണാകുളം: ഫേസ്ബുക്കിലൂടെ 'വഴക്ക്' സിനിമ പുറത്തുവിട്ട് സനൽകുമാർ ശശിധരൻ. ടോവിനോ തോമസിനെ നായകനാക്കി സംവിധായകൻ സനൽകുമാർ ശശിധരൻ ഒരുക്കിയ ചിത്രമായിരുന്നു 'വഴക്ക്'. ലോക്ക്ഡൗൺ കാലഘട്ടത്തിൽ ചിത്രീകരിച്ച സിനിമ ഇതിനോടൊപ്പം തന്നെ നിരവധി ഫെസ്റ്റിവലുകളിൽ പ്രദർശിപ്പിക്കുകയും മികച്ച അഭിപ്രായം നേടിയെടുക്കുകയും ചെയ്‌തു.
വഴക്കിൽ പുതിയ വഴിത്തിരിവുകൾ സംഭവിക്കുന്നത് കഴിഞ്ഞ കുറച്ച് ദിവസങ്ങൾക്കു മുമ്പാണ്. നായകൻ ടോവിനോ തോമസിന്‍റെ കരിയറിന് 'വഴക്ക്' എന്ന ചിത്രം മോശമായി ബാധിക്കും എന്ന ഭയത്താൽ ആണ് ചിത്രം റിലീസ് ചെയ്യാൻ ടോവിനോ തയ്യാറാകാത്തത് എന്ന് ആരോപിച്ച് സനൽകുമാർ ശശിധരൻ രംഗത്തെത്തി. ഫെസ്റ്റിവലുകളിൽ മികച്ച പ്രേക്ഷക അഭിപ്രായം നേടിയ ചിത്രത്തിൽ തനിക്ക് വിശ്വാസമുണ്ടെന്നും, കരിയറിന്‍റെ മികച്ച സമയത്ത് നിൽക്കുമ്പോൾ 'വഴക്ക്' പോലൊരു ഓഫ്‌ ബീറ്റ് ചിത്രത്തിന്‍റെ ഭാഗമായാൽ ഇമേജിന് കളങ്കം സംഭവിക്കുമോ എന്നൊക്കെയാണ് ടോവിനോയുടെ ഭയം.
അതുകൊണ്ടാണ് നിർമ്മാതാവ് കൂടി ആയിരുന്നിട്ടു പോലും ചിത്രത്തിനുവേണ്ടി അദ്ദേഹം മുന്നിട്ടിറങ്ങാത്തതെന്നുമായിരുന്നു സംവിധായകന്‍ പറഞ്ഞത്. എന്നാല്‍ സനൽ കുമാർ ശശിധരന്‍റെ പ്രസ്‌താവന അപ്പാടെ നിരാകരിച്ചുകൊണ്ട് ടോവിനോ തോമസ് രംഗത്ത് എത്തിയിരുന്നു. സംവിധായകന്‍റെ പേരിനൊപ്പം ഉള്ള നെഗറ്റീവ് ഇമേജ് കാരണമാണ് ചിത്രം ഒടിടി കളിലും മറ്റ് ഡിജിറ്റൽ പ്ലാറ്റ്‌ഫോമുകളിലും പ്രദർശിപ്പിക്കാൻ തയ്യാറാകാത്തത് എന്നായിരുന്നു ടോവിനോയുടെ വാദം.
തനിക്ക് ഏറ്റവും പ്രിയപ്പെട്ട സംവിധായകനും പ്രിയപ്പെട്ട സിനിമയുമായിരുന്നു 'വഴക്ക്'. ചിത്രീകരണ സമയത്ത് സനൽകുമാർ ശശിധരനുമായി മികച്ച സൗഹൃദം ഉടലെടുക്കാനും സാധിച്ചു. പക്ഷേ എന്തുകൊണ്ടാണ് അദ്ദേഹം ഇങ്ങനെയൊക്കെ ഇപ്പോൾ സംസാരിക്കുന്നത് എന്ന് മനസിലാകുന്നില്ല. ചിത്രത്തിന്‍റെ ആശയം അത്രമേൽ ഇഷ്‌ടമായത് കൊണ്ടാണ് ഇരുപത്തി ഏഴു ലക്ഷം രൂപ ചിത്രത്തിനായി മുടക്കിയത്.
സിനിമയ്ക്ക് ഒരു രൂപ പോലും പ്രതിഫലവും മേടിച്ചിട്ടില്ലെന്നും ടൊവിനൊ പറഞ്ഞിരുന്നു. ഇതിന് പിന്നാലെയാണ് ഇന്ന് ഉച്ചയോടെ വഴക്ക് സിനിമയുടെ ഡിജിറ്റൽ കോപ്പി തന്‍റെ ഫേസ്ബുക്ക് അക്കൗണ്ടിലൂടെ പുറത്തുവിട്ടുകൊണ്ടാണ് സനൽകുമാർ ശശിധരന്‍റെ മറുപടി പറച്ചിൽ. പ്രേക്ഷകർക്ക് കാണാനുള്ളതാണ് സിനിമ.
വഴക്ക്/The Quarrel കാണണമെന്നുള്ളവർക്ക് കാണാം. എന്തുകൊണ്ട് ഇത് പുറത്തുവരുന്നില്ല എന്ന് മനസിലാക്കുന്നവർക്ക് മനസിലാക്കാം. എന്നാണ് വീഡിയോയ്ക്ക് അടിക്കുറിപ്പ് ആയി സനൽകുമാർ ശശിധരൻ കുറിച്ചത്. രണ്ടുവർഷം മുമ്പ് തന്‍റെ വിമോ അക്കൗണ്ടിൽ അപ്‌ലോഡ് ചെയ്‌ത പ്രൈവ്യൂ കോപ്പിയാണ് സംവിധായകൻ പ്രേക്ഷകർക്കായി ഷെയർ ചെയ്‌തിരിക്കുന്നത്.
ALSO READ: വിഷ്‌ണു മഞ്ചുവിന്‍റെ 'കണ്ണപ്പ' ടീസർ കാൻ ഫിലിം ഫെസ്റ്റിവലിൽ അനാവരണം ചെയ്യും; റിലീസ് തീയതി പുറത്ത്
