'ഒരു മുറൈ വന്ത് പാർത്തായ', 'വിവാഹ ആവാഹനം' എന്നീ ചിത്രങ്ങൾക്ക് ശേഷം പുതിയ സിനിമയുമായി സംവിധായകൻ സാജൻ ആലുംമൂട്ടിൽ എത്തുന്നു. കാർമിക് സ്റ്റുഡിയോസിന്‍റെ ബാനറിൽ നിർമിക്കുന്ന ഈ ചിത്രത്തിന്‍റെ ടൈറ്റിൽ ലുക്ക് പോസ്റ്റർ പുറത്തുവന്നു. 'തല തെറിച്ച കൈ' എന്നാണ് സാജൻ ആലുംമൂട്ടിലിന്‍റെ പുതിയ സംവിധാന സംരംഭത്തിന് പേരിട്ടിരിക്കുന്നത്.
തീർത്തും ഹാസ്യത്തിന് പ്രാധാന്യം നൽകിക്കൊണ്ട് കോമഡി - ത്രില്ലർ ജോണറിലാണ് 'തല തെറിച്ച കൈ' അണിയിച്ചൊരുക്കുന്നത്. സംവിധായകൻ സാജൻ ആലുംമൂട്ടിലിന്‍റേതാണ് ഈ സിനിമയുടെ കഥ. നിതാരയാണ് തിരക്കഥ, സംഭാഷണം എന്നിവ ഒരുക്കിയിരിക്കുന്നത്.
ഒരു പൊലീസ് ഉദ്യോഗസ്ഥന്‍റെ കഥയാണ് 'തല തെറിച്ച കൈ' പറയുന്നത്. ഇദ്ദേഹത്തിന് തന്‍റെ കൈകൊണ്ട് ഉണ്ടാവുന്ന പ്രശ്‌നങ്ങളാണ് ഈ സിനിമയുടെ ഇതിവൃത്തം. അതേസമയം, ഈ ചിത്രത്തിന്‍റെ താരനിർണയം പുരോഗമിക്കുകയാണ്. ഉടൻ തന്നെ കേന്ദ്ര താരങ്ങൾ ഉൾപ്പടെയുള്ള കൂടുതൽ വിവരങ്ങൾ പുറത്തുവരുമെന്നാണ് പ്രതീക്ഷിക്കുന്നത്.
ഓഗസ്റ്റ് അവസാനം 'തല തെറിച്ച കൈ'യ്യുടെ ചിത്രീകരണം ആരംഭിക്കും. കെൻ സാം ഫിലിപ്പ് ഈ സിനിമയുടെ സഹനിർമ്മാതാവും പ്രമോദ് ഗോപകുമാർ എക്‌സിക്യൂട്ടീവ് പ്രൊഡ്യൂസറുമാണ്. ധനേഷ് രവീന്ദ്രനാഥാണ് 'തല തെറിച്ച കൈ' സിനിമയുടെ ഛായാഗ്രാഹകൻ. അഖിൽ എ ആർ എഡിറ്റിങ്ങും നിർവഹിക്കുന്നു. വിനു തോമസ് ആണ് സംഗീത സംവിധായകൻ.
സ്റ്റോറി ഐഡിയ : മനു പ്രദീപ് & മുഹദ്, പ്രൊഡക്ഷൻ കൺട്രോളർ : സിൻജോ ഒറ്റതൈക്കൽ, ആർട്ട് : അരുൺ കല്ലുമൂഡ്, കോസ്റ്റ്യൂംസ് : ഷെഹന, മേക്കപ്പ് : നരസിംഹസ്വാമി, ആക്ഷൻ : സുധീഷ് കുമാർ, ഡിസൈൻസ് : മൂൺ മാമ എന്നിവരാണ് ഈ സിനിമയുടെ മറ്റ് അണിയറ പ്രവർത്തകർ.
ALSO READ: ഇനി ജോസച്ചായന്‍റെ തേരോട്ടം; മമ്മൂട്ടിയുടെ 'ടർബോ' റിലീസ് തീയതി പുറത്ത്
