ടൊവിനോ തോമസ് ട്രിപ്പില്‍ റോളില്‍ എത്തിയ ചിത്രമാണ് 'അജയന്‍റെ രണ്ടാം മോഷണം'. പ്രേക്ഷക പ്രശംസയും നിരൂപക പ്രശംസയും ഒരുപോലെ സ്വന്തമാക്കിയ ഈ ചിത്രം അഞ്ച് ദിവസത്തിനുള്ളില്‍ ആഗോളതലത്തില്‍ 50 കോടി ക്ലബിലാണ് എത്തിനില്‍ക്കുന്നത്. വര്‍ഷങ്ങള്‍ക്ക് ശേഷമാണ് മലയാളത്തില്‍ ത്രിഡിയില്‍ ഒരു സിനിമ പുറത്തിറങ്ങുന്നത്. സിനിമ കുറഞ്ഞ ദിവസത്തിനുള്ളില്‍ ഗംഭീര കലക്ഷന് നേടിയതോടെ പ്രേക്ഷകര്‍ക്ക് നന്ദിയറിയിക്കുകയാണ് ചിത്രത്തിന്‍റെ സംവിധായകന്‍ ജിതിന്‍ ലാല്‍. തന്‍റെ ഫേസ്ബുക്ക് പേജിലൂടെയാണ് ജിതിന്‍ ലാല്‍ നന്ദിയറിച്ചുകൊണ്ട് കുറിപ്പിട്ടത്.
കുറിപ്പിന്‍റെ പൂര്‍ണ രൂപം
"എന്‍റെ ആദ്യ സിനിമ ജനങ്ങള്‍ക്ക് മുന്നില്‍ അവതരിപ്പിച്ചപ്പോള്‍ പ്രായഭേദമന്യേ എല്ലാവര്‍ക്കും കാണാവുന്ന ഒരു ഉത്സവ സിനിമയായിരിക്കും എന്നൊരു ഉറപ്പ് ഞാന്‍ നല്‍കിയിരുന്നു. സിനിമ ബോക്‌സോഫിസില്‍ ചരിത്ര നേട്ടം കൈവരിക്കുന്ന ഈ വേളയില്‍ എന്നെയും എന്‍റെ ടീമിനേയും സിനിമ കണ്ട് ഹൃദയം നല്‍കി പ്രോത്സാഹിപ്പിച്ച എല്ലാ അച്ഛന്‍മാര്‍ക്കും അമ്മമാര്‍ക്കും കുട്ടികള്‍ക്കും അപ്പൂപ്പന്‍മാര്‍ക്കും അമ്മൂമ്മമാര്‍ക്കും സഹോദരി സഹോദരങ്ങള്‍ക്കും ഹൃദയം തൊട്ട എന്‍റെ നന്ദി അറിയിക്കുന്നു". സംവിധായകന്‍ ജിതിന്‍ ലാല്‍ പറയുന്നു.
തമിഴ്, തെലുഗു, മലയാളം എന്നീ ചിത്രങ്ങളിലൂടെ ശ്രദ്ധേയമായ കൃതി ഷെട്ടി, ഐശ്വര്യ രാജേഷ്, സുരഭി ലക്ഷ്‌മി എന്നിവരാണ് ചിത്രത്തില്‍ നായികമാരായി എത്തുന്നത്. നടനും സംവിധായകനുമായ ബേസില്‍ ജോസഫ്, ജഗദീഷ്, ഹരീഷ് പേരടി, ഹരീഷ് ഉത്തമന്‍, പ്രമോദ് ഷെട്ടി, രോഹിണി തുടങ്ങിയവരും ചിത്രത്തില്‍ അഭിനയിക്കുന്നുണ്ട്.
ഇടിവി ഭാരത് കേരളം ഇനി വാട്‌സ്‌ആപ്പിലും
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
സിനിമയുടെ കഥ, തിരക്കഥ, സംഭാഷണം എന്നിവ ഒരുക്കിയിരിക്കുന്നത് സുജിത് നമ്പ്യാരാണ്. ദിബു നൈനാന്‍ തോമസാണ് ചിത്രത്തിലെ ഗാനങ്ങള്‍ക്ക് സംഗീതം ഒരുക്കിയിരിക്കുന്നത്. ജോമോന്‍ ടി ജോണ്‍ ഛായാഗ്രഹണവും ഷമീര്‍ മുഹമ്മദ് ചിത്ര സംയോജനവും നിര്‍വഹിച്ചിരിക്കുന്നു.
മാജിക് ഫ്രെയിംസ്, യുജിഎം മോഷന്‍ പിക്‌ചേഴ്‌സ് എന്നീ ബാനറുകളില്‍ ലിസ്‌റ്റിന്‍ സ്‌റ്റീഫന്‍, ഡോ.സക്കറിയ തോമസ് എന്നിവര്‍ ചേര്‍ന്നാണ് ചിത്രം നിര്‍മ്മിച്ചിരിക്കുന്നത്.
Also Read: എആർഎം വ്യാജ പതിപ്പ്; 'ഇത് നിരവധി പേരുടെ അധ്വാന ഫലം', പ്രതികരണവുമായി ലിസ്‌റ്റിന്‍ സ്‌റ്റീഫന്‍
