തെലുഗു മെഗാസ്റ്റാർ ചിരഞ്ജീവിയെ നായകനാക്കി 'ബിംബിസാര' ഫെയിം വസിഷ്‌ഠ രചനയും സംവിധാനവും നിർവഹിക്കുന്ന ചിത്രമാണ് 'വിശ്വംഭര'. ഈ സിനിമയുടെ ഏറ്റവും പുതിയ അപ്‌ഡേറ്റ് പുറത്തുവന്നിരിക്കുകയാണ്. ബിഗ് ബജറ്റിൽ ഒരുങ്ങുന്ന ഈ ഫാന്‍റസി അഡ്വഞ്ചർ സിനിമയുടെ ആക്ഷൻ ഷെഡ്യൂൾ ആരംഭിച്ചു. ഹൈദരാബാദിലാണ് ഷൂട്ടിങ് പുരോഗമിക്കുന്നത്.
ഒരു ഗാനം, ആക്ഷൻ ബ്ലോക്ക് എന്നിവയുടെ ചിത്രീകരണത്തിന് പിന്നാലെയാണ് ചിത്രത്തിന്‍റെ പുതിയ ഷെഡ്യൂൾ ആരംഭിച്ചിരിക്കുന്നത്. ഹൈദരാബാദിലെ അലൂമിനിയം ഫാക്‌ടറിയിൽ ഫൈറ്റ് മാസ്റ്റേഴ്‌സ് ജോഡികളായ രാം-ലക്ഷ്‌മണിൻ്റെ മേൽനോട്ടത്തിൽ ചിരഞ്ജീവിയും എതിരാളികളും തമ്മിലുള്ള തീവ്രമായ ആക്ഷൻ സീക്വൻസാണ് നിലവിൽ ചിത്രീകരിക്കുന്നത്. വലിയ ക്യാൻവാസിൽ ചിത്രീകരിക്കുന്ന ഈ ആക്ഷൻ സീക്വൻസ് തിയേറ്ററുകളിൽ കാണികൾക്ക് ഒരു പ്രത്യേക അനുഭവം നൽകുമെന്നാണ് പ്രതീക്ഷിക്കുന്നത്.
പ്രമുഖ പ്രൊഡക്ഷൻ ഹൗസായ യുവി ക്രിയേഷൻസിന്‍റെ ബാനറിൽ വിക്രം, വംശി, പ്രമോദ് എന്നിവർ ചേർന്നാണ് ഈ ഫാന്‍റസി സിനിമ നിർമിക്കുന്നത്. ചിരഞ്ജീവിയുടെ ഇതുവരെയുള്ള സിനിമകളേക്കാൾ ഏറ്റവും ചെലവേറിയ ചിത്രം കൂടിയാണ് 'വിശ്വംഭര'. അടുത്ത വർഷം (2025) ജനുവരി 10ന് സംക്രാന്തി റിലീസായി ഈ ചിത്രം തിയേറ്ററുകളിലെത്തും.
തെന്നിന്ത്യയുടെ സൂപ്പർ താരം തൃഷ കൃഷ്‌ണനാണ് ഈ സിനിമയിൽ ചിരഞ്ജീവിയുടെ നായികയായി എത്തുന്നത്. 2006 ൽ പുറത്തിറങ്ങിയ 'സ്റ്റാലിൻ' എന്ന ചിത്രത്തിന് ശേഷം ചിരഞ്ജീവിയും തൃഷയും ഒരുമിച്ച് അഭിനയിക്കുന്ന സിനിമയാണിത്. അതേസമയം ബ്ലോക്ക്ബസ്റ്റർ വിജയം സ്വന്തമാക്കിയ 'ബിംബിസാര' എന്ന ചിത്രത്തിന് ശേഷം വസിഷ്‌ സംവിധാനം ചെയ്യുന്ന രണ്ടാമത്തെ സിനിമയാണ് 'വിശ്വംഭര'.
നവംബർ അവസാന വാരത്തിലാണ് ഈ സിനിമയുടെ ചിത്രീകരണം ആരംഭിച്ചത്. 13 കൂറ്റൻ സെറ്റുകളാണ് സിനിമയുടെ പ്രധാന ഭാഗങ്ങൾ ചിത്രീകരിക്കുന്നതിനായ് അണിയറ പ്രവർത്തകർ ഹൈദരാബാദിൽ സ്ഥാപിച്ചിരിക്കുന്നത്. വർഷങ്ങൾക്ക് ശേഷമാണ് ഒരു ഫാന്‍റസി ചിത്രത്തിൽ ചിരഞ്ജീവി വേഷമിടുന്നത് എന്നതും ആ സിനിമയുടെ പ്രധാന ആകർഷണമാണ്. ചിരഞ്ജീവി നായകനായ 'ജഗദേക വീരുഡു അതിലോക സുന്ദരി' (Jagadeka Veerudu Athiloka Sundari) പോലെ മറ്റൊരു ഫാന്‍റസി എന്‍റർടെയ്‌നർ തന്നെയാകും വിശ്വംഭര എന്ന പ്രതീക്ഷയിലാണ് ആരാധകർ.
ഛോട്ടാ കെ നായിഡുവാണ് ഈ ചിത്രത്തിന്‍റെ ഛായാഗ്രാഹകൻ. ചിത്രസംയോജനം കോത്തഗിരി വെങ്കിടേശ്വര റാവുവും സന്തോഷ് കാമിറെഡിയും ചേർന്ന് നിർവഹിക്കുന്നു. ശിവശക്തി ദത്ത, ചന്ദ്രബോസ് എന്നിവരുടെ വരികൾക്ക് സംഗീതം ഒരുക്കുന്നത് എം എം കീരവാണിയാണ്.
പ്രൊഡക്ഷൻ ഡിസൈനർ : എ എസ് പ്രകാശ്, ലൈൻ പ്രൊഡ്യൂസർ : റാമിറെഡ്ഡി ശ്രീധർ റെഡി, സംഭാഷണം : സായി മാധവ് ബുറ, വസ്‌ത്രാലങ്കാരം: സുമിത കൊനിഡേല, തിരക്കഥ അസോസിയേറ്റ്‌സ് : ശ്രീനിവാസ് ഗവിറെഡി, ഗന്ത ശ്രീധർ, നിമ്മഗദ്ദ ശ്രീകാന്ത്, മയൂഖ് ആദിത്യ, പിആർഒ : ശബരി എന്നിവരാണ് 'വിശ്വംഭര' സിനിമയുടെ മറ്റ് അണിയറ പ്രവർത്തകർ.
ALSO READ: ചിരഞ്ജീവിയുടെ ഫാന്‍റസി ചിത്രം 'വിശ്വംഭര'യിൽ നായികയായി തൃഷ
