എറണാകുളം: ഹിറ്റില്‍ നിന്ന് സൂപ്പര്‍ഹിറ്റിലേക്ക് പ്രേമലു കുതിക്കുമ്പോള്‍ തങ്ങളുടെ പുതിയ ചിത്രം അനൗണ്‍സ് ചെയ്‌തുകൊണ്ട് ഭാവനാ സ്‌റ്റുഡിയോസ്. 'കരാട്ടെ ചന്ദ്രന്‍' എന്നു പേരിട്ടിരിക്കുന്ന ചിത്രം സംവിധാനം ചെയ്യുന്നത് മഹേഷിന്റെ പ്രതികാരം മുതല്‍ ദിലീഷ് പോത്തന്‍റെ കോ-ഡയറക്‌ടർ ആയിരുന്ന റോയ് ആണ്. എസ് ഹരീഷും വിനോയ് തോമസും ചേര്‍ന്ന് തിരക്കഥയെഴുതുന്ന ചിത്രത്തില്‍ ടൈറ്റില്‍ വേഷത്തില്‍ എത്തുന്നത് ഫഹദ് ഫാസിലാണ് (Bhavana Studios announces new film Karate chandran).
ചിത്രത്തിന്‍റെ മറ്റ് അണിയറപ്രവര്‍ത്തകരുടെ വിവരങ്ങള്‍ ഇതുവരെ പുറത്തുവിട്ടിട്ടില്ല. ഗിരീഷ് എഡി സംവിധാനം ചെയ്‌ത പ്രേമലു ആണ് ഭാവനാ സ്‌റ്റുഡിയോസിന്‍റെ അവസാനമായി പുറത്തിറങ്ങിയ ചിത്രം. മികച്ച പ്രേക്ഷകാഭിപ്രായവുമായി ബോക്സോഫിസില്‍ മുന്നേറുന്ന ചിത്രത്തില്‍ പ്രധാനവേഷങ്ങളില്‍ എത്തിയത് നസ്ലനും മമിതയും ആണ്.
തണ്ണീർമത്തൻ ദിനങ്ങൾ, സൂപ്പർ ശരണ്യ' എന്നീ സിനിമകൾക്ക് ശേഷം ഗിരീഷ് എഡി ഒരുക്കിയ 'പ്രേമലു' ചിത്രം ഹൈദരാബാദ് പശ്ചാത്തലമാക്കി യുവതലമുറയുടെ കഥയാണ് പറയുന്നത്. ഭാവന സ്‌റ്റുഡിയോസ് 'പ്രേമലു'വിന്‍റെ നിർമാണം ഏറ്റെടുക്കാനുള്ള ഒരേയൊരു കാരണം സംവിധായകൻ ഗിരീഷ് എഡിയിലുള്ള വിശ്വാസമാണെന്ന് സംവിധായകനായ ദിലീഷ് പോത്തൻ കഴിഞ്ഞ ദിവസം പറഞ്ഞിരുന്നു.
ഗിരീഷ് എഡി എന്ന സംവിധായകന്‍റെ ഒരു ചിത്രം നിർമിക്കണമെന്ന ഉദ്ദേശത്തിലാണ് ഭാവന സ്‌റ്റുഡിയോസ് 'പ്രേമലു'വിന്‍റെ നിർമ്മാണ ചുമതല ഏറ്റെടുത്തതെന്നും പൂർണമായും സംവിധായകനിൽ വിശ്വാസമർപ്പിച്ച് കൊണ്ടാണ് ഭാവന സ്‌റ്റുഡിയോ ഈ ചിത്രത്തിന്‍റെ ഭാഗമായതെന്നും പ്രേക്ഷകർക്കിഷ്‌ടപ്പെടുന്ന തരത്തിലുള്ള സിനിമകൾ നിർമിക്കാനാണ് എക്കാലവും ഭാവന സ്‌റ്റുഡിയോസ് ശ്രമിച്ചിട്ടുള്ളതെന്നും നിർമാതാവ് ദിലീഷ് പോത്തൻ പറഞ്ഞിരുന്നു.
എന്നും മികച്ച ചിത്രങ്ങള്‍ മാത്രം പ്രേക്ഷകര്‍ക്ക് നല്‍കിയ ഭാവനാ സ്‌റ്റുഡിയോസ് കരാട്ടെ ചന്ദ്രനിലൂടെയും ആ മേന്മ കാത്തുസൂക്ഷിക്കുമെന്നാണ് പ്രേക്ഷകരുടെ വിശ്വാസം.
ALSO READ:'തെലങ്കാന ബൊമ്മലു' പാടി കെജി മാർക്കോസ് ; ശ്രദ്ധനേടി 'പ്രേമലു' പ്രൊമോ ഗാനം
തെലങ്കാന ബൊമ്മലു: ഭാവന സ്‌റ്റുഡിയോസിന്‍റെ ബാനറില്‍ ഗിരീഷ് എഡി സംവിധാനം ചെയ്‌ത 'പ്രേമലു' ചിത്രത്തിലെ പ്രൊമോ ഗാനം പുറത്തിറക്കി അണിയറ പ്രവർത്തകർ. 'തെലങ്കാന ബൊമ്മലു' എന്ന ഗാനമാണ് കഴിഞ്ഞ ദിവസം പുറത്തിറങ്ങിയത് (Premalu Promo Song Telangana Bommalu). കെജി മാര്‍ക്കോസ് ആലപിച്ചിരിക്കുന്ന ഗാനത്തിന് മികച്ച പ്രേക്ഷക പ്രതികരണമാണ് നേടുന്നത്. സുഹൈല്‍ കോയയുടെ വരികൾക്ക് വിഷ്‌ണു വിജയ് ആണ് സംഗീതം പകർന്നിരിക്കുന്നത്.
