എറണാകുളം: ഹേമ കമ്മിറ്റി റിപ്പോര്‍ട്ടിന് പിന്നാലെ താരസംഘടനയായ അമ്മയിലെ എക്‌സിക്യുട്ടീവ് അംഗങ്ങളെ പിരിച്ചുവിട്ട സാഹചര്യത്തില്‍ താത്‌കാലിക ഭരണ ചുമതല വഹിക്കുന്ന താരങ്ങൾ നാളെ (സെപ്‌റ്റംബര്‍ 18) കൊച്ചിയില്‍ യോഗം ചേരും. ജനറല്‍ ബോഡി യോഗത്തിന്‍റെയും പുതിയ ഭാരവാഹി തെരഞ്ഞെടുപ്പിന്‍റെയും തിയ്യതി നിശ്ചയിക്കാനാണ് യോഗം ചേരുന്നത്. അടുത്ത മാസം 15നുള്ളിൽ ജനറല്‍ ബോഡി യോഗം ചേര്‍ന്ന് പുതിയ ഭാരവാഹികളെ തെരഞ്ഞെടുക്കകയാണ് ലക്ഷ്യം. ബുധനാഴ്ച്ച നടന്ന ഓണ്‍ലൈന്‍ യോഗത്തിലാണ് തീരുമാനം. അമ്മ ആസ്ഥാനത്ത് നേരിട്ടെത്തി യോഗം ചേരാനാണ് താരങ്ങള്‍ തീരുമാനിച്ചത്.
ഭരണ സമിതി പിരിച്ചുവിട്ട ശേഷം അമ്മ ആസ്ഥാനം ആളൊഴിഞ്ഞിരിക്കുകയായിരുന്നു. താരങ്ങൾ ആരും ഇവിടേക്ക് വരാറില്ലായിരുന്നു. ഇതോടെയാണ് മോഹന്‍ലാല്‍ ഉള്‍പ്പടെയുള്ള താത്‌കാലിക ഭരണസമിതി അംഗങ്ങള്‍ വീണ്ടും കലൂരിലെ അമ്മ ആസ്ഥാനത്ത് എത്തി യോഗം ചേരുന്നത്. ഒക്‌ടോബര്‍ മാസം ആദ്യം ജനറല്‍ ബോഡി യോഗം വിളിച്ചു ചേര്‍ത്ത് പുതിയ ഭാരവാഹികളെ തെരഞ്ഞെടുക്കാനാണ് ധാരണയായത്.
വ്യാഴാഴ്‌ച ചേരുന്ന യോഗത്തില്‍ ജനറല്‍ ബോഡി യോഗത്തിന്‍റെയും ഭാരവാഹി തെരഞ്ഞെടുപ്പിന്‍റെയും തിയ്യതി തീരുമാനിക്കും. അമ്മ സംഘടനയുടെ നിയമാവലി അനുസരിച്ച് ജനറല്‍ ബോഡിയോഗം ചേരുന്നതിനു മൂന്നാഴ്‌ച മുമ്പ് അംഗങ്ങള്‍ക്ക് നോട്ടിസ് നല്‍കണം. ഇതേ തുടർന്നാണ് താത്‌കാലിക ഭരണസമിതി ജനറൽ ബോഡിയോഗത്തിന്‍റെയും ഭാരവാഹി തെരഞ്ഞെടുപ്പിന്‍റെയും തിയ്യതി തീരുമാനിക്കുന്നത്.
മത്സരിക്കുന്നവർക്ക് നാമനിര്‍ദേശ പത്രിക നല്‍കാന്‍ അവസരം നൽകും. അതേ സമയം ക്രിമിനല്‍ കേസുകളില്‍ പ്രതികളായവര്‍ക്ക് മത്സരിക്കാനാകില്ല. ഹേമ കമ്മിറ്റി റിപ്പോര്‍ട്ട് പുറത്തുവന്നതിന് പിന്നാലെയാണ് ആരോപണ വിധേയരായ ഭാരവാഹികൾ ഉൾപ്പെടുന്ന താരസംഘടന തന്നെ പിരിച്ചു വിടേണ്ടി വന്നത്.
ജനറല്‍ സെക്രട്ടറിയായിരുന്ന സിദ്ദിഖ്, മുകേഷ്, ഇടവേള ബാബു, ജയസൂര്യ, മണിയന്‍ പിള്ള രാജു എന്നിവരുള്‍പ്പെടെയുള്ള അംഗങ്ങള്‍ക്കെതിരെയും ലൈംഗികാതിക്രമക്കേസുകള്‍ രജിസ്‌റ്റര്‍ ചെയ്‌തിരുന്നു. ഇതോടെയാണ് ഭരണസമിതി അംഗങ്ങള്‍ എല്ലാവരും രാജിവച്ച് ഒഴിഞ്ഞത്. ജനറല്‍ ബോഡിയോഗം ചേര്‍ന്ന് പുതിയ ഭാരവാഹികളെ തെരഞ്ഞെടുക്കുമെന്ന് പ്രസിഡന്‍റ് ആയിരുന്ന മോഹന്‍ലാല്‍ വാർത്ത കുറിപ്പിൽ വ്യക്തമാക്കിയിരുന്നു.
ഇടിവി ഭാരത് കേരളം ഇനി വാട്‌സ്‌ആപ്പിലും
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
അതേസമയം അമ്മയ്‌ക്ക് ബദലായി താരങ്ങളുടെ ട്രേഡ് യൂണിയൻ രൂപീകരിക്കാനുള ശ്രമങ്ങൾ അണിയറയിൽ നടക്കുന്നുണ്ട്. ഇതോടെപ്പം സ്വതന്ത്രവും പുരോഗമനപരവുമായ സിനിമ കൂട്ടായ്‌മയെന്ന ആശയവുമായി സംവിധായകൻ ആശിഖ് അബുവും സുഹൃത്തുക്കളും രംഗത്തുണ്ട്. പുതിയ സംഘടനകൾ രംഗത്ത് വരികയും അമ്മ സംഘടന തന്നെ അപ്രസക്തമാവുമോയെന്ന ആശങ്കയും ഔദ്യോഗിക പക്ഷത്തിനൊപ്പം നിൽക്കുന്നവർക്കുണ്ട്. ഉടൻ യോഗം ചേർന്ന് ജനറൽ ബോഡി തിയ്യതി തീരുമാനിക്കുന്നതും ഈയൊരു സാഹചര്യത്തിൽ കൂടിയാണ്.
Also Read:അമ്മ പിളര്‍പ്പിലേയ്‌ക്ക്; ഫെഫ്‌കയെ സമീപിച്ച് താരങ്ങള്‍, ട്രേഡ് യൂണിയന്‍ രൂപീകരിക്കാന്‍ നീക്കം
