അരുണ്‍ ചന്തുവിൻ്റെ സംവിധാനത്തിൽ ഒരുങ്ങുന്ന ഡിസ്ടോപ്പിയന്‍ ഏലിയന്‍ ചിത്രമായ 'ഗഗനചാരി'യുടെ റിലീസ് ഡേറ്റ് അണിയറ പ്രവർത്തകർ പുറത്തുവിട്ടു. ജൂണ്‍ 21ന് ചിത്രം തിയേറ്ററുകളിലെത്തും. സിനിമാപ്രേമികള്‍ ഏറെ പ്രതീക്ഷയോടെ കാത്തിരിക്കുന്ന ചിത്രങ്ങളില്‍ ഒന്നാണ് ഗഗനചാരി. അടുത്തിടെ ക്ഷണിക്കപ്പെട്ട അതിഥികൾക്കുമുന്നിൽ ചിത്രത്തിൻ്റെ പ്രിവ്യൂ ഷോ നടത്തുകയുണ്ടായി. മികച്ച അഭിപ്രായമാണ് ചിത്രം കണ്ടവർക്കെല്ലാം.
ആഗോള തലത്തിൽ വിവിധ ഫെസ്റ്റുകളിൽ ശ്രദ്ധേയ അംഗീകാരങ്ങൾ ചിത്രം സ്വന്തമാക്കിയിരുന്നു. കേരളത്തിലെ ചില സ്വകാര്യ ഇവൻ്റുകളിലും ചിത്രം പ്രദർശിപ്പിക്കപ്പെട്ടു. കൂടാതെ മികച്ച ചിത്രം, മികച്ച വിഷ്വൽ ഇഫക്‌ട്‌സ് എന്നീ വിഭാഗങ്ങളിൽ ന്യൂയോർക്ക് ഫിലിം അവാർഡ്‌സ്, ലോസ് ആഞ്ചലസ് ഫിലിം അവാർഡ്‌സ്, തെക്കൻ ഇറ്റലിയിൽ നടന്ന പ്രമാണ ഏഷ്യൻ ഫിലിം ഫെസ്റ്റിവൽ തുടങ്ങിയവയിലൊക്കെ പ്രദർശിപ്പിക്കപ്പെട്ടു.
അമേരിക്ക, യൂറോപ്പ്, സിംഗപ്പൂർ അടക്കം വിവിധ ഫെസ്റ്റുകളിലും ഗഗനചാരി മികച്ച നിരൂപക പിന്തുണയോടെ പ്രദർശിപ്പിക്കപ്പെട്ടു. 'സായാഹ്നവാർത്തകൾ', 'സാജൻ ബേക്കറി' എന്നീ ചിത്രങ്ങൾക്കുശേഷം അരുൺ ചന്തു സംവിധാനം ചെയ്‌ത ചിത്രമാണ് 'ഗഗനചാരി'. അജിത് വിനായക ഫിലിംസിൻ്റെ ബാനറിൽ അജിത് വിനായകയാണ് ചിത്രം നിർമ്മിക്കുന്നത്. ശിവ സായിയും അരുൺ ചന്തുവും ചേർന്നാണ് ചിത്രത്തിൻ്റെ തിരക്കഥ തയ്യാറാക്കിയിരിക്കുന്നത്.
ഗോകുൽ സുരേഷ്, അജു വർഗീസ്, കെ.ബി ഗണേഷ് കുമാർ, അനാർക്കലി മരക്കാർ, ജോൺ കൈപ്പള്ളിൽ തുടങ്ങിയവരാണ് ചിത്രത്തിൽ പ്രധാന വേഷത്തിൽ എത്തുന്നത്. ഛായാഗ്രഹണം സുർജിത്ത് എസ് പൈ.'സണ്ണി', 'ഫോർ ഇയേർസ്' എന്നീ ചിത്രങ്ങൾക്ക് ശേഷം ശങ്കർ ശർമ സംഗീതം പകരുന്ന ചിത്രം കൂടിയാണിത്.
'കള' എന്ന ടൊവിനോ ചിത്രത്തിൽ ചടുലമായ ആക്ഷൻ കൊറിയോഗ്രാഫി ഒരുക്കിയ സ്റ്റണ്ട് മാസ്റ്റർ ഫിനിക്‌സ് പ്രഭുവാണ് ചിത്രത്തിനുവേണ്ടി സംഘട്ടനങ്ങൾ ഒരുക്കിയിരിക്കുന്നത്. വി.എഫ്.എക്‌സിന് പ്രാധാന്യമുള്ള ഈ ചിത്രത്തിൻ്റെ ഗ്രാഫിക്‌സ് മെറാക്കി സ്റ്റുഡിയോസാണ് നിർവഹിച്ചിരിക്കുന്നത്.
പ്രൊഡക്ഷൻ കൺട്രോളർ- സജീവ് ചന്തിരൂർ, ഗാനരചന - മനു മഞ്ജിത്ത്, കോസ്റ്റ്യൂം ഡിസൈനർ - ബുസി ബേബി ജോൺ, കലാസംവിധാനം- എം ബാവ, മേക്കപ്പ്- റോണക്‌സ് സേവ്യർ, ചീഫ് അസോസിയേറ്റ് ഡയറക്‌ടർ- വിഷ്‌ണു അരവിന്ദ്, അസോസിയേറ്റ് ഡയറക്‌ടർ- അഖിൽ സി തിലകൻ, അസിസ്റ്റൻ്റ് ഡയറക്‌ടർമാർ- അജിത് സച്ചു, കിരൺ ഉമ്മൻ രാജ്, ലിതിൻ കെ ടി, അരുൺ ലാൽ, സുജയ് സുദർശൻ, സ്റ്റിൽസ്- രാഹുൽ ബാലു വർഗീസ്, പ്രവീൺ രാജ്, പോസ്റ്റ് പ്രൊഡക്ഷൻ- നൈറ്റ് വിഷൻ പിക്‌ചേഴ്‌സ്, ക്രിയേറ്റീവ്സ്- അരുൺ ചന്തു, മ്യൂറൽ ആർട്ട്- ആത്മ, വിതരണം : അജിത് വിനായക റിലീസ്, പിആർഒ ആതിര ദിൽജിത്ത്.
Also Read: "ഇനി ഉത്തരത്തിനു" ശേഷം എവി മൂവീസ് പ്രൊഡക്ഷൻ്റെ രണ്ടാം ചിത്രം; പൂജ തലശ്ശേരിയിൽ നടന്നു
