നിങ്ങള്‍ക്ക് നഴ്‌സിങ് ബിരുദമുണ്ടോ? ഒരു വര്‍ഷത്തെയെങ്കിലും പ്രവൃത്തി പരിചയമുണ്ടോ? എങ്കില്‍ സൗദി അറേബ്യയിലെ ആരോഗ്യ മന്ത്രാലയത്തില്‍ ഒരു ജോലി നിങ്ങളെക്കാത്തിരിപ്പുണ്ട്. തൊഴിലവസരം കാത്തിരിക്കുന്ന നഴ്‌സിങ് ബിരുദധാരികള്‍ക്ക് ഈ സുവര്‍ണാവസരം പ്രയോജനപ്പെടുത്താം.
നോര്‍ക്ക റൂട്ട്സ് ആണ് കേരളത്തിലെ നഴ്‌സുമാര്‍ക്ക് സൗദി അറേബ്യന്‍ ആരോഗ്യ വകുപ്പിൽ തൊഴിലവസരങ്ങളിലേക്ക് റിക്രൂട്ട്മെന്‍റ് ഡ്രൈവ് സംഘടിപ്പിക്കുന്നത്. ജൂലൈ 22 മുതല്‍ 26 വരെ കൊച്ചിയിലാണ് റിക്രൂട്ട്മെന്‍റ് നടക്കുക. ഈ റിക്രൂട്ട്മെന്‍റില്‍ നിങ്ങള്‍ക്കും പങ്കെടുക്കാം.
അപേക്ഷിക്കേണ്ട വിധം: നഴ്‌സിങില്‍ ബിരുദമോ/പോസ്റ്റ് ബിഎസ്‌സി വിദ്യാഭ്യാസ യോഗ്യതയും കുറഞ്ഞത് ഒരു വർഷത്തെ പ്രവൃത്തിപരിചയവും ഉളളവര്‍ക്ക് അപേക്ഷിക്കാം. വിശദമായ ബയോഡാറ്റയും വിദ്യാഭ്യാസം, പ്രവര്‍ത്തിപരിചയം, പാസ്‌പോര്‍ട്ട് എന്നിവയുടെ പകര്‍പ്പുകളും സഹിതം rmt3.norka@kerala.gov.in എന്ന ഇ-മെയില്‍ ഐഡിയിലേയ്ക്ക് ഉടന്‍ ഫോര്‍വേര്‍ഡ് ചെയ്യാം.
ജൂലൈ 19 രാവിലെ 10 മണിവരെ അപേക്ഷകള്‍ സ്വീകരിക്കും. അപേക്ഷകര്‍ മുന്‍പ് SAMR പോർട്ടലിൽ രജിസ്റ്റര്‍ ചെയ്‌തവരാകരുത്. കുറഞ്ഞത് ആറു മാസമെങ്കിലും സാധുതയുള്ള പാസ്‌പോര്‍ട്ടുള്ളവരാകണം അപേക്ഷകര്‍. അഭിമുഖസമയത്ത് പാസ്‌പോര്‍ട്ട് ഹാജരാക്കേണ്ടതാണ്.
ഒഴിവുകളും സ്‌പെഷ്യലൈസേഷനും: ഒഴിവുകള്‍ എത്രയെന്ന് നോര്‍ക്ക വ്യക്തമാക്കിയിട്ടില്ല. കാർഡിയാക് കത്തീറ്ററൈസേഷൻ, കാർഡിയാക് ഐസിയു (മുതിർന്നവർക്കുള്ളത്), ഡയാലിസിസ്, എമർജൻസി പീഡിയാട്രിക്, എമർജൻസി റൂം (ER), ജനറൽ നഴ്‌സിങ്, ഐസിയു അഡൾട്ട്, മെഡിസിൻ & സർജറി, (പ്രസവചികിത്സ)/ഗൈനക്കോളജി (OB/GYN), ഓങ്കോളജി, ഓപ്പറേഷൻ തിയറ്റർ (OT/OR), പീഡിയാട്രിക് ഇന്‍റന്‍സീവ് കെയർ യൂണിറ്റ് (PICU) എന്നീ സ്പെഷ്യാലിറ്റികളിലേക്കാണ് അവസരം.
ബന്ധപ്പെടാവുന്ന നമ്പറുകള്‍: കൂടുതല്‍ വിവരങ്ങള്‍ക്ക് 0471-2770536, 539, 540, 577 എന്നീ നമ്പറുകളിലോ (ഓഫിസ് സമയത്ത്, പ്രവൃത്തിദിനങ്ങളില്‍) 24 മണിക്കൂറും പ്രവര്‍ത്തിക്കുന്ന നോര്‍ക്ക ഗ്ലോബല്‍ കോണ്‍ടാക്‌ട് സെന്‍ററിന്‍റെ ടോള്‍ ഫ്രീ നമ്പറുകളായ 1800 425 3939 (ഇന്ത്യയില്‍ നിന്നും) +91-8802 012 345 (വിദേശത്തുനിന്നും, മിസ്‌ഡ് കോള്‍ സര്‍വീസ്) ബന്ധപ്പെടാവുന്നതാണ്.
