കോഴിക്കോട്: മലയാള നാടക വേദിയുടെ ഏറ്റവും പുതിയ ട്രെന്‍ഡ് അറിയാനാകുന്ന വേദിയാണ് ഓരോ വര്‍ഷത്തേയും സംസ്ഥാന സ്‌കൂള്‍ കലോത്സവങ്ങള്‍. കേരള സ്‌കൂൾ കലോത്സവത്തിലെ നാടക വേദിയില്‍ നടന മികവിനായുള്ള പോരാട്ടം ഇത്തവണ കോഴിക്കോടിന്‍റെ ടീമുകള്‍ തമ്മിലായാല്‍ അദ്ഭുതപ്പെടാനില്ല. എന്നും കലോത്സവ വേദികളില്‍ മുഴങ്ങിക്കേള്‍ക്കുന്ന സ്‌കൂള്‍ നാടകങ്ങളുടെ രണ്ട് മുന്‍നിര സംവിധായകര്‍ അണിയിച്ചൊരുക്കുന്ന രണ്ട് എണ്ണം പറഞ്ഞ നാടകങ്ങളാണ് ഇത്തവണയും കോഴിക്കോട്ട് നിന്ന് കലോത്സവ വേദിയിലെത്തുന്നത്.
തിരുവങ്ങൂർ ഹയർ സെക്കൻഡറി സ്‌കൂളിന്‍റെ 'C/o പൊട്ടക്കുളം' എന്ന നാടകം ജില്ലയിൽ നിന്ന് ഒന്നാം സ്ഥാനത്ത് എത്തിയാണ് തലസ്ഥാനത്തേക്ക് എത്തുന്നത്. മേമുണ്ട ഹൈസ്ക്കൂളിന്‍റെ 'ശ്വാസം' അപ്പീൽ വഴിയും സംസ്ഥാന കലോത്സവത്തിന് എത്തുന്നു. എന്ന് പറയുമ്പോൾ സ്‌കൂൾ നാടക സംവിധായകർ തമ്മിലുള്ള ഒരു പോരാട്ടത്തിന് കൂടി തിരുവനന്തപുരം വേദിയാകും. ഇനി തലസ്ഥാനത്തെ അരങ്ങില്‍ മത്സരം ശിവദാസ് പൊയിൽക്കാവിലിന്‍റെയും ജിനോ ജോസഫിന്‍റെയും സംഘങ്ങള്‍ തമ്മിലാണ്.
C/o പൊട്ടക്കുളം: റവന്യൂ ജില്ലാ സ്‌കൂൾ കലോത്സവത്തിൽ ഹൈസ്‌കൂൾ വിഭാഗം നാടക മത്സരത്തിൽ ഒന്നാം സ്ഥാനവും മികച്ച നടിക്കുള്ള അംഗീകാരവും നേടിയ നാടകമാണ് C/o പൊട്ടക്കുളം. തിരുവങ്ങൂർ ഹയർ സെക്കൻഡറി സ്‌കൂൾ കളർ ബോക്‌സ്‌ തിയേറ്ററാണ് നാടകം അവതരിപ്പിച്ചത്. കഴിഞ്ഞ വർഷം ഇവര്‍ അവതരിപ്പിച്ച 'ഓസ്‌കാർ പുരുഷു' എന്ന നാടകമായിരുന്നു സംസ്ഥാനത്ത് മികച്ചത്. രഞ്ജിനി എന്ന കഥാപാത്രത്തെ അവതരിപ്പിച്ച ദലയായിരുന്നു കോഴിക്കോട് റവന്യൂ ജില്ലാ കലോത്സവത്തിലെ മികച്ച നടി.
ഓസ്‌കാർ പുരുഷുവിൽ പുരുഷുപ്പൂച്ചയെ അവതരിപ്പിച്ച ദല കഴിഞ്ഞവർഷം സംസ്ഥാനത്തെ മികച്ച നടിയായിരുന്നു. സംവിധായകൻ ശിവദാസ് പൊയില്‍ക്കാവിന്‍റെ മകളും ഒമ്പതാം തരം വിദ്യാർഥിനിയുമാണ് ദല. അമ്മ രഞ്ജന പയ്യോളി തുറയൂർ ബിടിഎം സ്‌കൂൾ അധ്യാപികയാണ്‌. അന്ധവിശ്വാസങ്ങൾക്കും അനാചാരങ്ങൾക്കുമെതിരെ കണക്കറ്റ പരിഹാസ ശരങ്ങളാണ് കുട്ടികൾ അരങ്ങിൽ എയ്‌ത് വിടുന്നത്.
കുട്ടികളുടെ ആക്ഷേപഹാസ്യ നാടകമാണിത്. മനുഷ്യ ലോകത്തിലെ മണ്ടത്തരങ്ങൾ പൂശാലയ്ക്കൽ തറവാട്ടിലെ വിവാഹവുമായി ബന്ധപ്പെട്ട് വളർത്തിയെടുത്ത കഥയാണിത്. സ്‌കൂളിലെ തന്നെ അധ്യാപകനായ ശിവദാസ് പൊയിൽക്കാവാണ് രചനയും സംവിധാനവും. സനിലേഷ് ശിവനാണ് സഹസംവിധാനം. നിധീഷ് പൂക്കാടാണ് സെറ്റ് ഒരുക്കിയത്.
ശിവദാസ് പൊയിൽക്കാവ്: 2008 മുതൽ സംസ്ഥാന സ്‌കൂൾ കലോത്സവത്തിൽ നിരന്തരമായി നാടകത്തിൽ സമ്മാനം നേടുന്ന തിരുവങ്ങൂർ ഹയർ സെക്കൻഡറി സ്‌കൂളിലെ അധ്യാപകൻ കൂടിയാണ് ശിവദാസ് പൊയിൽക്കാവ്. ശിവദാസ് തന്നെയാണ് എല്ലാ നാടകങ്ങളും സ്‌കൂളിലെ തിയേറ്റർ ക്ലബ്ബായ കളർ ബോക്‌സിനുവേണ്ടി ഒരുക്കിയിട്ടുള്ളത്. 2008ൽ “ ഊശാന്താടി രാജാവ് “, 2010ൽ “ആത്തോ പൊറത്തോ”, 2011ൽ “പച്ച പ്ലാവില”, 2012ൽ കാന്താരിപ്പൊന്ന്, 2014ൽ കാക്ക, 2015ൽ കറിവേപ്പില, 2018ൽ എലിപ്പെട്ടി 2024ൽ ഓസ്‌കാർ പുരുഷു തുടങ്ങിയവയാണ് കളർ ബോക്‌സിനുവേണ്ടി ശിവദാസ് ഒരുക്കിയ നാടകങ്ങൾ. 2019ലൊഴികെ പുതിയ നാടകങ്ങളുമായി എത്തിയ എല്ലാ വർഷവും തിരുവങ്ങൂർ ഹയർ സെക്കൻഡറി സ്‌കൂൾ കോഴിക്കോട് ജില്ലയെ പ്രതിനിധീകരിച്ച് സംസ്ഥാനത്ത് മത്സരിക്കുന്നു. സംസ്ഥാന തലത്തിൽ മികച്ച നടന്മാർക്കും നടികൾക്കും ഉള്ള അംഗീകാരങ്ങൾ കളർ ബോക്‌സിനെ തേടിയെത്തിയിട്ടുണ്ട്.
2010, 2011 വർഷങ്ങളിൽ യഥാക്രമം ആത്തോ പൊറത്തോ, പച്ചപ്ലാവില എന്നീ നാടകങ്ങളിലെ അഭിനയത്തിന് വിഷ്‌ണുവിന് മികച്ച നടനുള്ള സംസ്ഥാന അംഗീകാരം ലഭിച്ചു. 2012ൽ കാന്താരി പൊന്നിലെ അതുൽ ശ്രീവ, 2015ൽ കറിവേപ്പിലയിലെ ജുഗൽ ബിന്നി എന്നിവർ മികച്ച നടന്മാരായി. 2014ൽ കാക്കയിലെ അഭിനയത്തിന് അനുരാഗിന് നടനുള്ള മാതൃഭൂമിയുടെ പുരസ്‌കാരം ലഭിച്ചു. 2024ൽ ഓസ്‌കാർ പുരുഷുവിലെ അഭിനയത്തിന് ദല.ആർഎസ് മികച്ച നടിയായി.
കീർത്തന എസ് ലാൽ ജൂറിയുടെ പ്രത്യേക പരാമർശം നേടി. 2014ൽ മിണ്ടാപ്രാണി 2015ൽ പല്ലിയും പൂവും എന്നീ നാടകങ്ങൾ ഹയർ സെക്കൻഡറി വിഭാഗത്തിന് വേണ്ടി എഴുതി സംവിധാനം ചെയ്‌തു. മേമുണ്ട ഹയർ സെക്കന്‍ഡറി സ്‌കൂളിന് വേണ്ടിയാണ് ഒരുക്കിയത്. ശിവദാസ് എഴുതിയ മുഴുവൻ നാടകങ്ങളും മൂന്ന് നാടക സമാഹാരങ്ങളിൽ പ്രസിദ്ധീകരിക്കപ്പെട്ടു. മാതൃഭൂമി ബുക്‌സ്‌, ഡിസി ബുക്‌സ്‌, കറണ്ട് ബുക്‌സ്‌ തൃശൂർ എന്നീ പ്രസാധകരാണ് ഇവയെല്ലാം പ്രസിദ്ധീകരിച്ചത്. ആത്തോ പൊറത്തോ നാടക സമാഹാരത്തിന് 2013ൽ ബാലസാഹിത്യത്തിനുള്ള സംസ്ഥാന സർക്കാരിന്‍റെ ജോസഫ് മുണ്ടശ്ശേരി അവാർഡ് ലഭിച്ചു. ചേമഞ്ചേരി നാരായണൻ നായർ പ്രഥമ പുരസ്‌കാരം, നന്മയുടെ കെടി മുഹമ്മദ് സംസ്ഥാന നാടക രചനാ പുരസ്‌കാരം, തിരക്കഥയ്ക്കും നാടക രചനയ്ക്കും സംസ്ഥാന വിദ്യാരംഭം അവാർഡ് തുടങ്ങി നിരവധി പുരസ്‌കാരങ്ങൾ നേടിയിട്ടുണ്ട്. മമ്മൂട്ടി നായകനായ പുഴു എന്ന സിനിമയിലെ നാടകമായ തക്ഷകൻ എഴുതി സംവിധാനം ചെയ്‌തത് ശിവദാസാണ്. നാടക ചലച്ചിത്ര നടൻ അപ്പുണ്ണി ശശിയാണ് നാടകം അവതരിപ്പിച്ചത്. ഇപ്പോൾ തിരക്കഥാകൃത്ത് സനിലേഷ് ശിവനോടൊപ്പം തിരക്കഥാ രചനയിൽ സജീവമാണ്.
ശ്വാസം: കുട്ടികളുടെ നാടകവും നാടക ആസ്വാദകരും തമ്മിലുള്ള അകലം നന്നായി കുറഞ്ഞു വരുന്നുണ്ടെന്ന് ബോധ്യപ്പെടുത്തുകയാണ്
മേമുണ്ട ഹൈസ്‌കൂൾ അവതരിപ്പിച്ച ശ്വാസം എന്ന നാടകം. നാടക പ്രേമികളെ പകൽ കാഴ്‌ചയിലും ഏറെ ആനന്ദിപ്പിക്കുന്ന നാടകം. എല്ലാ കുട്ടികളും ശരീര ഭാഷ കൊണ്ടും അഭിനയചാരുത കൊണ്ടും സ്വാഭാവിക ചലനങ്ങൾ കൊണ്ടും അരങ്ങിനെ വിസ്‌മയിപ്പിച്ചു. തകരയിലെ ചെല്ലപ്പനാശാരിയുടെ ചൂടുള്ള കഥകൾ പുനർജനിച്ചപ്പോൾ അരങ്ങിൽ കാലവും കഥയും സമന്വയിച്ചു. ഫിദൽ ഗൗതമാണ് ചെല്ലപ്പനാശാരിയായി നാടകത്തില്‍ തകര്‍ത്താടിയത്.
അഭ്യാസങ്ങളില്ലാത്ത നടനചാരുത കൊണ്ട് അത്ഭുതപ്പെടുത്തിയ ഫിദൽ ഗൗതം അതിലൂടെ മികച്ച നടനുമായി. വർത്തമാന കാല ജീവിത അവസ്ഥകളെ കുട്ടികളുടെ ഭാവനാ ലോകത്ത് നിന്ന് തന്നെ നോക്കി കാണുന്ന നാടകപാഠം കൈയൊതുക്കം കൊണ്ട് നാടകകൃത്ത് സുന്ദരമാക്കി. സംവിധായകൻ ജിനോ ജോസഫിന്‍റെ നാടക യാത്രയിലെ മറ്റൊരു പൊന്‍തൂവല്‍. മലയാള നാടക വേദിക്ക് കരുത്ത് പകർന്ന ഒരു നാടക കാഴ്‌ച കൂടി അനുഭവിച്ച് ഗ്രൗണ്ടിൽ നിന്നും ഇറങ്ങി നടക്കുമ്പോൾ 'ശ്വാസം' ജീവശ്വാസമായി. ഇനി അവർ തലസ്ഥാനത്ത് ഒന്ന് കൂടി ശ്വാസം പകരും.
ജിനോ ജോസഫ്: ജീവിതം ഒരു നാടകമാണ്, എന്നാൽ ജിനോ ജോസഫിന് നാടകമാണ് ജീവിതം. കണ്ണൂർ ജില്ലയിലെ ഇരിട്ടി സ്വദേശിയായ ജിനോ പത്രപ്രവർത്തകനും നാടകകൃത്തും യുവ നാടക പ്രേമികൾ ആരാധിക്കുന്ന വാചാലനായ കഥാകാരനുമാണ്. പരമ്പരാഗത നാടകത്തിലേക്ക് നിയോറിയലിസം കൊണ്ടുവന്ന സംവിധായകൻ.
കണ്ണൂർ സർവകലാശാലയിൽ നിന്ന് മാസ്‌കമ്മ്യൂണിക്കേഷൻ ആൻഡ് ജേർണലിസത്തിൽ ബിരുദാനന്തര ബിരുദം നേടിയ അദ്ദേഹം അമച്വർ, കുട്ടികളുടെ നാടക സ്പെക്ട്രത്തിൽ 30തോളം പ്രൊഡക്ഷനുകളിൽ പ്രവർത്തിച്ചിട്ടുണ്ട്. ചുരുങ്ങിയ സമയത്തിനുള്ളിൽ നാടക സംവിധാന മേഖലയില്‍ തൻ്റെ കഴിവ് തെളിയിക്കുന്നതിൽ അദ്ദേഹം വിജയിച്ചു. നാടകകലയുടെ സുവർണ്ണ നാളുകൾ ഇല്ലാതായി എന്ന് വിലപിക്കുന്നവർക്ക് ഉചിതമായ മറുപടിയായി നാടകാസ്വാദകർ അദ്ദേഹത്തിൻ്റെ സൃഷ്‌ടികളെ ഉയർത്തിക്കാട്ടുന്നു.
സാമൂഹിക-രാഷ്ട്രീയ സാഹചര്യങ്ങളെക്കുറിച്ച് പ്രേക്ഷകരുമായി ഇടയ്ക്കിടെ തൻ്റെ ചിന്തകൾ സംവദിക്കുന്ന ജിനോ ജോസഫ് നാടക ആക്ഷേപഹാസ്യത്തിൻ്റെ മേക്കിങ്ങിൽ മിടുക്കനാണ്. നാടകങ്ങളിലൂടെ അദ്ദേഹം നൽകുന്ന സന്ദേശങ്ങൾ ചിന്തോദ്ദീപകമാണ്, അവാർഡുകളും അംഗീകാരങ്ങളും അദ്ദേഹത്തെ തേടിയെത്താൻ മറ്റൊരു കാരണവുമില്ല. 2015ലെ നാടകത്തിനുള്ള കേരള സാഹിത്യ അക്കാദമി അവാർഡ് നേടി.
2013ൽ മികച്ച നാടകാവതരണത്തിനും മികച്ച രചന, മികച്ച രണ്ടാമത്തെ നടൻ എന്നീ പുരസ്‌കാരങ്ങളും ലഭിച്ചു. 2014ൽ തൃശൂർ കേരളസംഗീത നാടക അക്കാദമി സംഘടിപ്പിച്ച സംസ്ഥാന അമേച്വർ നാടക മത്സരത്തിൽ 'കാണി' എന്ന നാടകത്തിന് മികച്ച രണ്ടാമത്തെ നാടകാവതരണത്തിനും രചനയ്ക്കും നടനുമുള്ള പുരസ്‌കാരങ്ങൾ ലഭിച്ചു.
മികച്ച രചനക്കും സംവിധാനത്തിനുമുള്ള മഹേന്ദ്ര എക്‌സലൻസ് ഇൻ തിയേറ്റർ പുരസ്‌കാരം നേടി. മാത്രമല്ല ജീനോ ജോസഫിന് 2011, 2012 വര്‍ഷങ്ങളിലെ നാടകങ്ങള്‍ക്ക് ഒന്നാം സ്ഥാനം ലഭിച്ചിരുന്നു. പൊറോട്ട, സുല്ല്, മാങ്ങാണ്ടി എന്നിവയ്‌ക്കും ഹയര്‍ സെക്കന്‍ഡറി വിഭാഗത്തില്‍ സുമേഷ്‌, വാള്‍ പോസ്റ്റ് എന്നിവയ്‌ക്കും ഒന്നാം സമ്മാനം ലഭിച്ചിട്ടുണ്ട്.
മത്തി, നൊണ, പൊറോട്ട, ബീഡി, ചിരി.. തുടങ്ങിയ നാടകങ്ങൾ കുട്ടികളിലൂടെ അവതരിപ്പിച്ച് നിരവധി തവണ സംസ്ഥാന കലോത്സവത്തിലും ഒന്നാം സ്ഥാനത്തെത്തി. നാടക വേദിയില്‍ തീപാറുന്ന പോരാട്ടമാകും കോഴിക്കോട്ടെ രണ്ട് ടീമുകളും കാഴ്‌ചവയ്‌ക്കുക. അനന്തപുരി കാത്തിരിക്കുകയാണ് നാടകവേദിയിലെ പുത്തന്‍ താരോദയങ്ങള്‍ കാണാന്‍.
