ഭൂനികുതിയും വാഹന നികുതിയും കുത്തനെ കൂട്ടി, പുതിയ നിരക്ക് വിശദമായി അറിയാം!

50 ശതമാനമാണ് ഭൂനികുതി വര്‍ധിപ്പിച്ചു. 15 വർഷം കഴിഞ്ഞ സ്വകാര്യ വാഹനങ്ങളുടെ നികുതി 50 ശതമാനം വർധിപ്പിച്ചു.

തിരുവനന്തപുരം: സര്‍ക്കാരിന് വരുമാനം കണ്ടെത്തുന്നതിനു വേണ്ടി സംസ്ഥാനത്ത് ഭൂനികുതി കുത്തനെ വര്‍ധിപ്പിച്ചു. ബജറ്റ് അവതരണ വേളയിലാണ് ഇക്കാര്യം ധനമന്ത്രി അറിയിച്ചത്. 50 ശതമാനമാണ് ഭൂനികുതി വര്‍ധിപ്പിച്ചത്. ഇതുപ്രകാരം, അടിസ്ഥാന ഭൂനികുതി ഏറ്റവും കുറഞ്ഞ സ്ലാബ് നിരക്കായ ആർ ഒന്നിന് പ്രതിവർഷം 5/- (അഞ്ച്) രൂപ എന്നത് 7.5/- (ഏഴര) രൂപയും, ഏറ്റവും ഉയർന്ന സ്ലാബ് നിരക്കായ ആർ ഒന്നിന് പ്രതിവർഷം 30/-(മുപ്പത്) രൂപ എന്നത് 45/- (നാൽപ്പത്തിയഞ്ച്) രൂപയും ആയിരിക്കും.

ഇനി സ്ഥലം വാങ്ങുന്നതിനും രജിസ്റ്റര്‍ ചെയ്യാനും ഭൂമിയുമായി ബന്ധപ്പെട്ടുള്ള മറ്റ് ഇടപാടുകള്‍ക്കും നികുതിയില്‍ 50 ശതമാനം വര്‍ധനവ് ഉണ്ടാകും. ഭൂരഹിതര്‍ ഇല്ലാത്ത ഒരു സംസ്ഥാനമായി കേരളത്തെ മാറ്റിയെടുക്കുകയാണ് ലക്ഷ്യമെന്നും അദ്ദേഹം വ്യക്തമാക്കി.

പഴയ ഭൂനികുതിയും പുതിയ ഭൂനികുതിയും (ETV Bharat)

15 വർഷം കഴിഞ്ഞ സ്വകാര്യ വാഹനങ്ങളുടെ നികുതി കൂട്ടി

15 വർഷം കഴിഞ്ഞ സ്വകാര്യ വാഹനങ്ങളുടെ നികുതി 50 ശതമാനം വർധിപ്പിക്കുന്നതായും ധനമന്ത്രി പ്രഖ്യാപിച്ചു. കാലപ്പഴക്കം ചെന്ന വാഹനങ്ങൾ മൂലം ഉണ്ടാകുന്ന അന്തരീക്ഷ മലിനീകരണം പരമാവധി കുറയ്ക്കുന്നതിന് നിരവധി പദ്ധതികൾ കേന്ദ്ര-സംസ്ഥാന സർക്കാരുകൾ സ്വീകരിച്ചു വരുന്നുണ്ട്. ഇതിന്റെ ഭാഗമായി 15 വർഷം കഴിഞ്ഞ സർക്കാർ വാഹനങ്ങൾ പൊളിക്കുന്നതിന് സർക്കാർ സ്ക്രാപ്പിംഗ് പോളിസി പ്രഖ്യാപിച്ചിട്ടുണ്ടെങ്കിലും 15 വർഷം കഴിഞ്ഞ സ്വകാര്യ വാഹനങ്ങൾക്ക് നിബന്ധന ബാധകമാക്കിയിട്ടില്ല.

ആയതിനാൽ പഴക്കം ചെന്ന സ്വകാര്യ വാഹനങ്ങളുടെ തുടരുപയോഗം നിരുൽസാഹപ്പെടുത്തുന്നതിൻ്റെ ഭാഗമായി 15 വർഷം കഴിഞ്ഞ മോട്ടോർസൈക്കിളുകളുടെയും, സ്വകാര്യ ആവശ്യത്തിന് ഉപയോഗിക്കുന്ന മുച്ചക്രവാഹന ങ്ങളുടെയും മോട്ടോർ കാറുകളുടെയും നികുതിയിൽ 50 ശതമാനം വർദ്ധനവ് വരുത്തുന്നു. സ്വകാര്യ വാഹനങ്ങളുടെ നികുതിയിനത്തിൽ സർക്കാരിനു 110 കോടി രൂപയാണ് നിലവിൽ വാർഷിക വരുമാനം. ഈ വർദ്ധനവ് വഴി ഒരു വർഷം 55 കോടി രൂപ സർക്കാരിനു അധിക വരുമാനം ഉണ്ടാകുമെന്നും മന്ത്രി പറഞ്ഞു.

ഇലക്‌ട്രിക് വാഹനങ്ങളുടെ നികുതി കൂട്ടി

ഇലക്‌ട്രിക് വാഹനങ്ങളുടെ നികുതിയും വർധിപ്പിച്ചു. ഇതിലൂടെ 50 ശതമാനം അധിക വരുമാനം പ്രതീക്ഷിക്കുന്നുവെന്നും ധനമന്ത്രി പറഞ്ഞു. 15 ലക്ഷത്തിന് മുകളിൽ വിലയുള്ള ഇലക്ട്രിക് വാഹനങ്ങൾക്ക് വാഹന വിലയുടെ 8% നികുതിയും 20 ലക്ഷത്തിന് മുകളിൽ വിലയുള്ള ഇലക്ട്രിക് വാഹനങ്ങൾക്ക് വാഹന വിലയുടെ 10% നികുതിയും,

ബാറ്ററി വാടകയ്ക്ക് ലഭ്യമാകുന്ന (Battery Renting Facility) ഇലക്ട്രിക് വാഹനങ്ങൾക്ക് വാഹന വിലയുടെ 10% നികുതിയും ഈടാക്കുന്നതാണ്. ഈ നികുതി വർധനവിലൂടെ 30 കോടി രൂപ അധിക വരുമാനം സര്‍ക്കാര്‍ പ്രതീക്ഷിക്കുന്നു.

സാമ്പത്തിക പ്രതിസന്ധി മറികടക്കുന്നതിന്‍റെ ഭാഗമായാണ് നികുതി കൂട്ടിയത്. നികുതി വെട്ടിക്കുന്ന ചരക്കുകൾ കൊണ്ടുപോകുന്ന വാഹനങ്ങൾ കണ്ടുകെട്ടാൻ നിയമം ഉൾപ്പെടുത്തും. കോടതി ഫീസ് വർധിപ്പിച്ചു. 150 കോടി അധിക വരുമാനമാണ് ഇതിലൂടെ ലക്ഷ്യമിടുന്നതെന്നും ധനമന്ത്രി വ്യക്തമാക്കി.