ഇന്ത്യന്‍ കമ്പനികളിലേക്ക് പ്രതിഭകള്‍ക്ക് സ്വാഗതം; ജൂണില്‍ റിക്രൂട്ട്‌മെന്‍റ് നടക്കുമെന്ന് റിപ്പോര്‍ട്ട്

ഇന്ത്യന്‍ കമ്പനികളിലേക്ക് കൂടുതല്‍ തൊഴിലാളികളെ നിയമിക്കാന്‍ നീക്കം. മാന്‍പവര്‍ ഗ്രൂപ്പ് എംപ്ലോയ്‌മെൻ്റ് ഔട്ട്‌ലുക്ക് സർവേയ്‌ക്ക് പിന്നാലെയാണ് നടപടി. തൊഴിലാളികള്‍ക്ക് ലഭിക്കുന്ന ശമ്പളത്തിലും വര്‍ധനവുണ്ടാകും.

ന്യൂഡല്‍ഹി: ഇന്ത്യയിലെ മികച്ച കമ്പനികള്‍ അടുത്ത ജൂണില്‍ കൂടുതല്‍ തൊഴിലാളികളെ റിക്രൂട്ട് ചെയ്യും. രാജ്യത്തെ 36 ശതമാനം കമ്പനികളും അടുത്ത മൂന്ന് മാസത്തിനുള്ളില്‍ കൂടുതല്‍ ജീവനക്കാരെ കമ്പനികളിലേക്ക് റിക്രൂട്ട് ചെയ്യാനുള്ള പദ്ധതികള്‍ ആവിഷ്‌കരിച്ചു. വരുന്ന ഏപ്രില്‍- ജൂണ്‍ കാലയളവില്‍ രാജ്യത്തെ 50 ശതമാനം തൊഴിലുടമകളുടെയും ശമ്പളത്തില്‍ വര്‍ധനവുണ്ടാകും.

ഇന്ത്യയില്‍ പ്രതിഭാശാലികളായ ജീവനക്കാരുടെ അഭാവം തൊഴിലുടമകളെ കൂടുതല്‍ പ്രതിസന്ധിയിലാക്കിയതായി നേരത്തെ മാൻപവർ ഗ്രൂപ്പ് എംപ്ലോയ്‌മെൻ്റ് ഔട്ട്‌ലുക്ക് സർവേയില്‍ കണ്ടെത്തിയിരുന്നു. ഇതിന് പിന്നാലെയാണ് ജീവനക്കാരുടെ ശമ്പളത്തില്‍ വര്‍ധനവിനും അതോടൊപ്പം കൂടുതല്‍ തൊഴിലവസരങ്ങള്‍ ഒരുക്കുന്നതിനും ഇന്ത്യയില്‍ നീക്കങ്ങള്‍ നടക്കുന്നത്. 80 ശതമാനം പ്രതിഭകളുടെ കുറവാണ് രാജ്യത്തുള്ളത്. എന്നാല്‍ തൊഴിലവസരങ്ങളുടെ കാര്യത്തില്‍ ഇന്ത്യയിലാണ് ഏറ്റവും കൂടുതല്‍ അവസരങ്ങള്‍ ഉള്ളതെന്നാണ് മാൻപവർ ഗ്രൂപ്പ് എംപ്ലോയ്‌മെൻ്റ് ഔട്ട്‌ലുക്ക് സർവേയിലെ കണ്ടെത്തല്‍.

2023 ഏപ്രില്‍ -ജൂണ്‍ കാലയളവില്‍ ഇന്ത്യയിലെ തൊഴിലവസരങ്ങള്‍ 6 ശതമാനം വര്‍ധിച്ചിരുന്നു. എന്നാലിത് മുന്‍ വര്‍ഷത്തെ അപേക്ഷിച്ച് ഒരു ശതമാനം കുറവാണ്. ഇന്ത്യയിലാണ് ഏറ്റവും ഉയര്‍ന്ന തൊഴിലവസര സാധ്യയുള്ളത്. 36 ശതമാനം തൊഴിലവസരമാണ് ഇന്ത്യയിലുള്ളത്. അതേസമയം യുഎസില്‍ 34 ശതമാനവും ചൈനയില്‍ 32 ശതമാനവുമാണുള്ളതെന്നാണ് സര്‍വേയിലെ കണക്കുകള്‍ വ്യക്തമാക്കുന്നത്. ഏറ്റവും കുറവ് തൊഴിലവസരമുള്ളയിടം റൊമാനിയയാണ്.

'ഇത് തീര്‍ച്ചയായും ഇന്ത്യയ്‌ക്ക് അഭിമാന നിമിഷമാണ്. സര്‍ക്കാര്‍ സംരംഭങ്ങളുടെ പിന്തുണയോടെ ഹെല്‍ത്ത് കെയര്‍, ലൈഫ് സയന്‍സസ്, റിന്യൂവബിള്‍ എനര്‍ജി വ്യവസായങ്ങള്‍ എന്നിവയില്‍ അതിവേഗ വളര്‍ച്ചയാണുണ്ടാകുന്നതെന്നും മാന്‍പവര്‍ ഗ്രൂപ്പ്‌സ് ഇന്ത്യ ആന്‍ഡ് മിഡില്‍ ഈസ്റ്റ് മാനേജിങ് ഡയറക്‌ടര്‍ സന്ദീപ് ഗുലാട്ടി പറഞ്ഞു.

മേഖല അടിസ്ഥാനത്തിൽ, ഹെൽത്ത്‌ കെയർ ആൻഡ് ലൈഫ് സയൻസസ് ശക്തമായ നിയമന ഉദ്ദേശത്തോടെ (44 ശതമാനം) വിപണിയിൽ ആധിപത്യം പുലർത്തുന്നു, തുടർന്ന് കമ്മ്യൂണിക്കേഷൻ സർവീസസ് (43 ശതമാനം), ഇൻഫർമേഷൻ ടെക്‌നോളജി (41 ശതമാനം). എനർജി ആൻഡ് യൂട്ടിലിറ്റികളിൽ (20 ശതമാനം) ഏറ്റവും ദുർബലമായ കാഴ്‌ചപ്പാട് സൂചിപ്പിച്ചിരിക്കുന്നു.

"മെഡിക്കല്‍ രംഗത്തും ഇന്ത്യ ഒരു ജനപ്രിയ കേന്ദ്രമായി മാറുകയാണ്. യുഎസിന് പുറത്ത് ആഗോളതലത്തിൽ ഏറ്റവും കൂടുതൽ എഫ്‌ഡിഎ അംഗീകൃത ഉത്‌പാദന സൗകര്യങ്ങളുണ്ടെന്ന് ഞങ്ങൾ അഭിമാനിക്കുന്നു. വിദ്യാഭ്യാസത്തിനുള്ള അടിസ്ഥാന സൗകര്യങ്ങള്‍ കൂടുതല്‍ ശക്തിപ്പെടുത്തുന്നതോടെ ഇന്ത്യയിലെ പ്രതിഭകളുടെ എണ്ണം വര്‍ധിക്കും. അത്തരത്തില്‍ മുന്നോട്ട് നീങ്ങിയാല്‍ എല്ലാതലത്തിലും ഇന്ത്യയ്‌ക്ക് വേഗത്തില്‍ വളരാനാകുമെന്നും ഗുലാട്ടി പറഞ്ഞു.