ഇൻഡോര്‍: പിതാവിനെതിരെ പീഡന പരാതി ഉന്നയിച്ച 19-കാരിയെ മകന്‍ തീയിട്ടുകൊന്നു. മധ്യപ്രദേശിലെ ഖണ്ഡ്‌വ ജില്ലയിലാണ് സംഭവം. ഇൻഡോറിലെ മഹാരാജ യശ്വന്തറാവു സർക്കാർ ആശുപത്രിയിൽ വ്യാഴാഴ്ച രാത്രി വൈകിയാണ് യുവതി മരിച്ചതെന്ന് ഖണ്ഡ്‌വ പൊലീസ് സൂപ്രണ്ട് മനോജ് കുമാർ റായ് പറഞ്ഞു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
ഒക്‌ടോബർ 12-നാണ് അർജുൻ ബാലായി (22) എന്നയാള്‍ യുവതിയെ പെട്രോൾ ഒഴിച്ച് തീകൊളുത്തിയതെന്നും അദ്ദേഹം വ്യക്തമാക്കി. അർജുൻ ബാലായിയുടെ പിതാവ് മംഗിലാൽ ബലായിക്കെതിരെ യുവതി പീഡന പരാതി നല്‍കിയിരുന്നു. ഇത് പിന്‍വലിക്കണമെന്ന് ആവശ്യപ്പെട്ട് അര്‍ജുന്‍ നിരന്തരം സമ്മര്‍ദം ചെലുത്തിയെങ്കിലും യുവതി തയ്യാറായില്ല.
ഇതില്‍ പ്രകോപിതനായാണ് യുവതിയെ അര്‍ജുന്‍ ആക്രമിച്ചത്. ഇതിന് പിന്നാലെ കൊലപാതക ശ്രമത്തിന് അർജുനെ അറസ്റ്റ് ചെയ്യുകയും തുടർന്ന് ജുഡീഷ്യൽ കസ്റ്റഡിയിൽ വിടുകയും ചെയ്‌തുവെന്നും പൊലീസ് വ്യക്തമാക്കി.
അതേസമയം ഒക്‌ടോബർ ഏഴിനാണ് മംഗിലാൽ യുവതിയെ പീഡിപ്പിച്ചതെന്നും പൊലീസ് അറിയിച്ചു. പീഡനക്കുറ്റം ചുമത്തി അറസ്റ്റിലായ ഇയാള്‍ക്ക് ഒരു ദിവസത്തിന് ശേഷം കോടതി ജാമ്യം അനുവദിച്ചുവെന്നും പൊലീസ് കൂട്ടിച്ചേര്‍ത്തു.
