ന്യൂഡല്‍ഹി : ബിഹാറിലും ഒഡിഷയിലും പ്രധാന ശ്രദ്ധ കേന്ദ്രീകരിച്ച് ഇന്ത്യയിലുടനീളം ടൂറിസം പ്രോത്സാഹിപ്പിക്കുമെന്ന്‌ ധനമന്ത്രി നിർമല സീതാരാമൻ. ടൂറിസം എല്ലായ്‌പ്പോഴും നാഗരികതയുടെ ഭാഗമാണ് അതിനാല്‍ ഇന്ത്യയെ ആഗോള ലക്ഷ്യസ്ഥാനമാക്കി ഉയർത്താനുള്ള ശ്രമങ്ങളാണ്‌ നടക്കുന്നത്‌. കൂടാതെ ഇത്‌ തൊഴിലവസരങ്ങൾ സൃഷ്‌ടിക്കുകയും മറ്റ് മേഖലകളിൽ അവസരങ്ങൾ തുറക്കുകയും ചെയ്യും.
ഗയയിലെ വിഷ്‌ണുപഥ് ക്ഷേത്രവും ബോധഗയയിലെ മഹാബോധി ക്ഷേത്രവും ആത്മീയ പ്രാധാന്യമുള്ളവയാണ്. വിജയിച്ച കാശി വിശ്വനാഥ് ഇടനാഴിയുടെ മാതൃകയിൽ അവിടെ ഇടനാഴികൾ വികസിപ്പിക്കുകയും അവയെ ലോകോത്തര വിനോദസഞ്ചാര കേന്ദ്രമാക്കുകയും ചെയ്യും. പ്രകൃതി സൗന്ദര്യം, ക്ഷേത്രങ്ങൾ, കരകൗശല വസ്‌തുക്കൾ, വന്യജീവി സങ്കേതങ്ങൾ, പ്രാകൃതമായ ബീച്ചുകൾ എന്നിവയുള്ള ഒഡിഷയിലെ ടൂറിസത്തെ പിന്തുണയ്ക്കും.
ബിഹാറിലെ രാജ്‌ഗിറിനും നളന്ദയ്ക്കും സമഗ്രമായ വികസന പദ്ധതി നടപ്പാക്കും. ഹിന്ദുക്കൾക്കും ബുദ്ധമതക്കാർക്കും ജൈനർക്കും വേണ്ടിയുള്ള പ്രാധാന്യം കണക്കിലെടുത്താണ്‌ രാജ്‌ഗിർ ഒരു പ്രധാന ടൂറിസം സൈറ്റായി വികസിപ്പിക്കുന്നത്‌. നളന്ദയെ പഠനകേന്ദ്രമായി വികസിപ്പിക്കുന്നതിനൊപ്പം ടൂറിസം ഹബ്ബായും വികസിപ്പിക്കും.
സർക്യൂട്ട് അധിഷ്‌ഠിത ടൂറിസത്തിൽ നിന്ന് ഡെസ്റ്റിനേഷൻ അധിഷ്‌ഠിത ടൂറിസത്തിലേക്കുള്ള സമീപനത്തിൽ മാറ്റം വരുത്തുമെന്ന് മന്ത്രാലയം അടുത്തിടെ പ്രഖ്യാപിച്ചിരുന്നു. അതിൽ ടൂറിസം സൗകര്യങ്ങൾ, അടിസ്ഥാന സൗകര്യങ്ങൾ, കണക്റ്റിവിറ്റി, മറ്റ് അനുബന്ധ വശങ്ങൾ എന്നിങ്ങനെ ഒരു ലക്ഷ്യസ്ഥാനത്തിന്‍റെ മൊത്തത്തിലുള്ള വികസനം ഏറ്റെടുക്കും.
ബജറ്റ് പ്രഖ്യാപനത്തിൽ ബിഹാറിനാണ് കൂടുതല്‍ സഹായം ലഭിച്ചത്. ബിഹാറിന് പുറമെ, ഒഡിഷയ്ക്ക് ടൂറിസം സൈറ്റുകളുടെ മൊത്തത്തിലുള്ള വികസനത്തിനും ധനസഹായം ലഭിക്കും, രണ്ട് പതിറ്റാണ്ടിലേറെ ബിജെഡി ഭരണത്തിന് ശേഷം അടുത്തിടെ ബിജെപി വിജയിച്ച സംസ്ഥാനമാണിത്.
