ന്യൂഡൽഹി : ഡല്‍ഹി മുഖ്യമന്ത്രി അരവിന്ദ് കെജ്‌രിവാളിന്‍റെ പേഴ്‌സണൽ സെക്രട്ടറിയായിരുന്ന ബിഭാവ് കുമാര്‍ മോശമായി പെരുമാറിയെന്ന് എഎപി രാജ്യസഭ എംപി സ്വാതി മലിവാള്‍. എന്നാല്‍ ഔദ്യോഗികമായി പരാതി ലഭിച്ചിട്ടില്ലെന്നും പിസിആർ കോൾ വഴിയാണ്‌ ആരോപണമെന്നും ഡല്‍ഹി പൊലീസ് അറിയിച്ചു. ആം ആദ്‌മി പാർട്ടിയുടെ കോർപ്പറേഷൻ കൗൺസിലർമാരുടെ യോഗം കെജ്‌രിവാളിന്‍റെ വസതിയിൽ ചേരുന്നതിന്‌ മുമ്പായിരുന്നു പരാതി.
പിസിആർ കോൾ ലഭിച്ചതിനെ തുടർന്ന് ഡൽഹി പൊലീസ് അന്വേഷണം നടത്തിവരികയാണ്. വിഷയത്തിൽ പൊലീസിന്‍റെ ഭാഗത്തുനിന്ന് പ്രതികരണമൊന്നും ഉണ്ടായിട്ടില്ല. മുഖ്യപ്രതിപക്ഷ പാർട്ടിയായ ബിജെപി സോഷ്യൽ മീഡിയ പ്ലാറ്റ്‌ഫോമായ എക്‌സിൽ ഇത് സംബന്ധിച്ച് നിരവധി പോസ്റ്റുകൾ പങ്കുവച്ചിട്ടുണ്ട്.
അതേസമയം, വിളിച്ചയാളെ സംബന്ധിച്ച് ഡൽഹി പൊലീസും ആം ആദ്‌മി പാർട്ടിയും ഔദ്യോഗിക പ്രസ്‌താവന പുറപ്പെടുവിച്ചിട്ടില്ല. ഡൽഹി വനിത കമ്മിഷൻ മുൻ അധ്യക്ഷയും നിലവിലെ രാജ്യസഭ എംപിയുമാണ് സ്വാതി മലിവാൾ. ഡൽഹി മുഖ്യമന്ത്രി അരവിന്ദ് കെജ്‌രിവാളിന്‍റെ മുൻ പ്രൈവറ്റ് സെക്രട്ടറിയാണ് ബിഭാവ് കുമാർ.
മോശം പെരുമാറ്റവും വഴക്കും ആരോപിച്ച് ബിഭാവ് കുമാറിനെതിരെ സ്വാതി മലിവാൾ പിസിആർ കോൾ ചെയ്തെന്നാണ്‌ ആരോപണം. എന്നാൽ, ഇത് പൊലീസ് സ്ഥിരീകരിക്കാൻ ഇതുവരെ തയ്യാറായിട്ടില്ല. ഏപ്രിൽ മാസത്തിൽ ബിഭാവ് കുമാറിനെ ഡൽഹി സർക്കാരിന്‍റെ വിജിലൻസ് വകുപ്പ് പ്രൈവറ്റ് സെക്രട്ടറി (പിഎ) സ്ഥാനത്ത് നിന്ന് പിരിച്ചുവിട്ടു.
വിജിലൻസ് വകുപ്പ് സ്‌പെഷ്യൽ സെക്രട്ടറി വൈവിവിജെ 2007 ലെ തീർപ്പുകൽപ്പിക്കാത്ത ഒരു കേസ് ചൂണ്ടിക്കാട്ടി രാജശേഖർ അദ്ദേഹത്തെ പിരിച്ചുവിടാൻ ഉത്തരവിടുകയായിരുന്നു. മുഖ്യമന്ത്രിയുമായി വളരെ അടുപ്പമുള്ളവരിൽ ഒരാളാണ് ബിഭാവ്. ഡൽഹിയിലെ എക്‌സൈസ് നയ അഴിമതിയെക്കുറിച്ച് എൻഫോഴ്‌സ്‌മെന്‍റ്‌ ഡയറക്‌ടറേറ്റ് സംഘം നിരവധി തവണ ഇയാളെ ചോദ്യം ചെയ്‌തിട്ടുണ്ട്.
ALSO READ: മോദി ഗ്യാരണ്ടിക്ക് കെജ്‌രിവാളിന്‍റെ ബദല്‍; സൗജന്യ വൈദ്യുതി ഉള്‍പ്പടെ 10 വാഗ്‌ദാനങ്ങള്‍
