ന്യൂഡൽഹി: നീറ്റ്-യുജി 2024 ലെ ക്രമക്കേടുകൾ സമഗ്രമായി കൈകാര്യം ചെയ്യാൻ കേന്ദ്ര സർക്കാരിനോടും നാഷണൽ ടെസ്റ്റിംഗ് ഏജൻസിയോടും (NTA) ആവശ്യപ്പെട്ട്‌ സുപ്രീം കോടതി. പരീക്ഷയ്ക്കായി തയ്യാറെടുക്കുന്ന വിദ്യാര്‍ഥികളെ അവഗണിക്കാൻ കഴിയില്ലെന്നതിനാലാണ്‌ സുപ്രീം കോടതി നടപടി. പരീക്ഷ നടത്തിപ്പിൽ പിഴവുണ്ടെങ്കിൽ ഏജൻസി അത് അംഗീകരിക്കണമെന്നും തിരുത്തണമെന്നും കോടതി പറഞ്ഞു.
'ആരുടെ ഭാഗത്തുനിന്നും 0.001% അശ്രദ്ധ ഉണ്ടായാൽ പോലും അത് സമഗ്രമായി കൈകാര്യം ചെയ്യണം'. നീറ്റ് പരീക്ഷയ്‌ക്കെതിരായ ഹർജികൾ എതിർ വ്യവഹാരങ്ങളായി കണക്കാക്കരുതെന്ന് ജസ്റ്റിസുമാരായ വിക്രം നാഥും എസ് വി എൻ ഭട്ടിയും അടങ്ങുന്ന ബെഞ്ച് പറഞ്ഞു. 'സംവിധാനത്തിൽ തട്ടിപ്പ് നടത്തിയ ഒരാൾ ഡോക്‌ടറാകുന്നത് സങ്കൽപ്പിക്കുക. അവൻ സമൂഹത്തിന് കൂടുതൽ വിനാശകാരിയാണ്, പ്രത്യേകിച്ച് ഈ പരീക്ഷയ്ക്ക് തയ്യാറെടുക്കുന്ന കുട്ടികൾ ജോലി ചെയ്യുന്നുണ്ടെന്ന് നമുക്കെല്ലാവർക്കും അറിയാം' ജസ്റ്റിസ് ഭട്ടി കൂട്ടിച്ചേർത്തു.
കോടതിയുടെ നിരീക്ഷണത്തോട് കേന്ദ്രത്തെ പ്രതിനിധീകരിച്ച അഭിഭാഷകൻ കനു അഗർവാൾ യോജിച്ചു. നീറ്റ്-യുജി 2024 ലെ പേപ്പർ ചോർച്ചയും ക്രമക്കേടുകളും സംബന്ധിച്ച ഒരു ഹർജി പരിഗണിക്കവെയാണ് സുപ്രീം കോടതി ഈ നിരീക്ഷണങ്ങൾ നടത്തിയത്. സുപ്രീം കോടതി കേന്ദ്രത്തിനും എൻടിഎയ്ക്കും നോട്ടീസ് അയച്ചു. വിഷയത്തിൽ അടുത്ത വാദം ജൂലൈ 8 ന് ഷെഡ്യൂൾ ചെയ്‌തു.
നീറ്റ്-യുജി 2024 ലെ 1563 വിദ്യാര്‍ഥികൾക്ക് സമയനഷ്‌ടത്തിന് അനുവദിച്ച കോമ്പൻസേറ്ററി അല്ലെങ്കിൽ ഗ്രേസ് മാർക്ക് പിൻവലിക്കാനും ജൂൺ 23 ന് അവർക്ക് ഓപ്ഷണൽ റീ-ടെസ്റ്റ് നടത്താനും ജൂൺ 30 ന് ഫലം പ്രഖ്യാപിക്കാനും കഴിഞ്ഞ ആഴ്‌ച സുപ്രീം കോടതി കേന്ദ്രത്തിന് അനുമതി നൽകി.
'2024 ജൂൺ 10, 11, 12 തീയതികളിൽ നടന്ന ചർച്ചകൾക്ക് ശേഷം 2024 ജൂൺ 12 ന് കമ്മിറ്റി നൽകിയ ശുപാർശ ന്യായമാണെന്ന് കോടതി കണ്ടെത്തി. അതനുസരിച്ച്, പ്രതിഭാഗം എൻടിഎയ്ക്ക് വീണ്ടും ടെസ്റ്റ് നടത്തുന്നതിന് മുന്നോട്ട് പോകാമെന്ന്‌, ബെഞ്ച് ഉത്തരവിൽ പറഞ്ഞു'.
