ന്യൂഡല്‍ഹി: പ്രത്യക്ഷമായും പരോക്ഷമായും പൊതുജനങ്ങള്‍ക്ക് വന്‍തോതില്‍ ധനസഹായം നല്‍കാമെന്ന വിധത്തിലുള്ള വാഗ്‌ദാനങ്ങള്‍ ഒരു രാഷ്‌ട്രീയ കക്ഷി തങ്ങളുടെ തെരഞ്ഞെടുപ്പ് പ്രകടന പത്രികയില്‍ വാഗ്‌ദാനം ചെയ്യുന്നത് തികച്ചും അഴിമതിയാണെന്ന് സുപ്രീം കോടതി. വിഷയത്തില്‍ സമര്‍പ്പിച്ച ഹര്‍ജി സ്വീകരിക്കാന്‍ കോടതി വിസമ്മതിച്ചു.
സമര്‍പ്പിക്കപ്പെട്ട രേഖകളും പരാതിക്കാരനായ ശശാങ്ക ജെ ശ്രീധറിന്‍റെ അഭിഭാഷകന്‍റെ വാദമുഖങ്ങളും തങ്ങള്‍ വിശദമായി പരിശോധിച്ചതായി ജസ്‌റ്റിസുമാരായ സൂര്യകാന്തും കെ വി വിശ്വനാഥും ഉള്‍പ്പെട്ട ഡിവിഷന്‍ ബെഞ്ച് പറഞ്ഞു. ഈ മാസം പതിനേഴിനാണ് ഈ വിധിയുണ്ടായത്. ഇപ്പോഴാണ് പരമോന്നത കോടതിയുടെ വെബ്സൈറ്റില്‍ ഉത്തരവ് അപ്‌ലോഡ് ചെയ്‌തത്.
കേസിൽ ഇത്തരമൊരു ചോദ്യം വിശദമായി പരിഗണിക്കാൻ താൽപ്പര്യമില്ലെന്ന് ചൂണ്ടിക്കാട്ടി സുപ്രീം കോടതി പറഞ്ഞതിങ്ങനെ: “ഏതായാലും ഈ കേസുകളുടെ വസ്‌തുതകളിലും സാഹചര്യങ്ങളിലും, ഞങ്ങൾ അത്തരമൊരു ചോദ്യത്തിലേക്ക് വിശദമായി പോകേണ്ടതില്ല. അതനുസരിച്ച്, അപ്പീലുകൾ നിരസിച്ചു." എങ്കിലും, ഉചിതമായ കേസുകളില്‍ തീരുമാനമെടുക്കാവുന്നതാണെന്നും നിയമവൃത്തങ്ങളോട് ബെഞ്ച് വ്യക്തമാക്കി.
കർണാടക ഹൈക്കോടതി പുറപ്പെടുവിച്ച ഉത്തരവിനെതിരെയാണ് ഹർജിക്കാരൻ സുപ്രീം കോടതിയെ സമീപിച്ചത്. ഈ വർഷം ഏപ്രിലിൽ, ജനപ്രാതിനിധ്യ നിയമത്തിലെ 123-ാം വകുപ്പിന്‍റെ ആവശ്യങ്ങൾക്ക്, അവർ നടപ്പാക്കാൻ ഉദ്ദേശിക്കുന്ന നയം സംബന്ധിച്ച ഒരു പാർട്ടിയുടെ പ്രഖ്യാപനം അഴിമതിയല്ലെന്ന് ഹൈക്കോടതി വ്യക്തമാക്കിയിരുന്നു.
2023ലെ കർണാടക നിയമസഭ തെരഞ്ഞെടുപ്പിൽ ഇന്ത്യൻ നാഷണൽ കോൺഗ്രസിൽ നിന്ന് (INC) വിജയിച്ച സ്ഥാനാർഥിയായിരുന്ന സമീർ അഹമ്മദ് ഖാനെ സ്ഥാനാർഥിയായി തെരഞ്ഞെടുത്തതിനെ ചോദ്യം ചെയ്‌തുകൊണ്ട് ചാമരാജ്‌പേട്ട് നിയമസഭ മണ്ഡലത്തിലെ വോട്ടറായ ഹര്‍ജിക്കാരൻ ഒരു തെരഞ്ഞെടുപ്പ് ഹർജി സമർപ്പിച്ചു. ജസ്‌റ്റിസ് എം ഐ അരുൺ അധ്യക്ഷനായ സിംഗിൾ ബെഞ്ചാണ് ഹർജി തള്ളിയത്. അഞ്ച് ഉറപ്പുകൾ നൽകിയാണ് സമീർ അഹമ്മദ് ഖാൻ വോട്ടർമാരെ വശീകരിച്ചതെന്ന് ഹർജിക്കാരൻ വ്യക്തമാക്കി. അതിലൂടെ അവർ വോട്ടർമാരെ വശീകരിച്ചു. അതിനാൽ, സമീർ അഹമ്മദിന്‍റെ തെരഞ്ഞെടുപ്പ് റദ്ദാക്കണമെന്നും ഹർജിക്കാരൻ അഭ്യർത്ഥിച്ചു.
