ന്യൂഡൽഹി : നരേന്ദ്ര മോദി പ്രധാനമന്ത്രിയായി മൂന്നാം തവണയും സത്യപ്രതിജ്ഞ ചെയ്‌തതിലുളള സന്തോഷം ഇൻസ്റ്റഗ്രാമിലൂടെ പങ്കുവച്ച് നടന്‍ ആർ മാധവൻ. മോദി മൂന്നാം തവണവും രാജ്യത്തെ ഏറ്റവും ഉയര്‍ന്ന പദവിയില്‍ എത്തിച്ചേര്‍ന്നതില്‍ അഭിനന്ദനങ്ങള്‍ അറിയിക്കുന്നു എന്ന് പറഞ്ഞാണ് ഇൻസ്റ്റഗ്രാം പോസ്‌റ്റ് ആരംഭിക്കുന്നത്. അത്ഭുതാവഹവും അസാധാരണവുമായ സംഭവമായാണ് ഇതിനെ നടന്‍ വിശേഷിപ്പിക്കുന്നത്.
വളർച്ചയുടെയും പുരോഗതിയുടെയും സമൃദ്ധിയുടെയും ഒരു കാലഘട്ടത്തിലേക്ക് മോദി ജനങ്ങളെ നയിക്കുമെന്ന പ്രതീക്ഷയും മാധവന്‍ പോസ്‌റ്റിലൂടെ പങ്കുവച്ചു. വസുധൈവ കുടുംബകത്തില്‍ അധിഷ്‌ഠിതമായ സ്‌നേഹത്തിന്‍റെയും സഹാനുഭൂതിയുടെയും പേരില്‍ മഹത്തായ രാഷ്‌ട്രമാക്കി ലോകത്തിന് മുന്നില്‍ ഇന്ത്യയെ അവതരിപ്പിക്കുമെന്ന് അറിയാമെന്നും അദ്ദേഹം എഴുതി.
മറ്റ് നിരവധി സെലിബ്രിറ്റികളും അവരുടെ സോഷ്യൽ മീഡിയ പ്ലാറ്റ്‌ഫോമുകളിലൂടെ പ്രധാന മന്ത്രിക്ക് ആശംസകള്‍ അറിയിച്ചു. സുനിൽ ഷെട്ടി, കരൺ ജോഹർ, സോനു സൂദ് എന്നിവര്‍ മോദിയുടെ നേതൃഗുണങ്ങള്‍ എടുത്ത് പറഞ്ഞ് അഭിനന്ദനങ്ങൾ അറിയിച്ചു. ഇന്ത്യയിലെ ജനങ്ങളുടെ ശാക്തീകരണത്തെയും സുരക്ഷിതത്വം ഉറപ്പാക്കുന്നതിനെക്കുറിച്ചും പറഞ്ഞുകൊണ്ട് നടൻ അനുപം ഖേറും പ്രധാന മന്ത്രിക്ക് ആശംസകൾ അറിയിച്ചു.
സത്യപ്രതിജ്ഞ ചടങ്ങിൽ രാജ്യത്തെ രാഷ്‌ട്രീയം, സിനിമ, വ്യവസായ മേഖലകളിലെ പ്രമുഖര്‍ പങ്കെടുത്തു. ബോളിവുഡ് താരങ്ങളായ കങ്കണ റണാവത്ത്, അക്ഷയ് കുമാർ, ഷാരൂഖ് ഖാൻ എന്നിവരും വ്യവസായിയായ മുകേഷ് അംബാനിയും മകൻ ആനന്ദ് അംബാനിയുമാണ് പ്രമുഖരില്‍ ചിലര്‍.
Also Read: മോദി മൂന്നാം വട്ടവും പ്രധാനമന്ത്രി; ഇവര്‍ മന്ത്രിമാര്‍
