ന്യൂഡൽഹി: കേന്ദ്ര തെരഞ്ഞെടുപ്പ് കമ്മിഷണര്‍ അരുണ്‍ ഗോയലിന്‍റെ രാജിയിൽ ആശങ്ക പ്രകടിപ്പിച്ച് സിപിഐഎം. തെരഞ്ഞെടുപ്പ് കമ്മിഷനിൽ പെട്ടന്നുണ്ടായ സംഭവവികാസത്തിൽ വ്യക്തമായ പ്രസ്‌താവന നൽകണമെന്ന് കേന്ദ്ര സർക്കാരിനോട് ആവശ്യപ്പെട്ട്‌ സിപിഐഎം പോളിറ്റ് ബ്യൂറോ പ്രസ്‌താവനയില്‍ ആവശ്യപ്പെട്ടു (Alarmed By Resignation Of EC Arun Goel, Creates Atmosphere Of Uncertainty Says CPIM).
ശനിയാഴ്‌ചയാണ് ഗോയൽ തെരഞ്ഞെടുപ്പ് കമ്മിഷണർ സ്ഥാനം രാജിവെച്ചത്. 2027 ഡിസംബർ 5 വരെയായിരുന്നു അദ്ദേഹത്തിന്‍റെ കാലാവധി. അടുത്ത വർഷം ഫെബ്രുവരിയിൽ നിലവിലെ രാജീവ് കുമാർ വിരമിച്ചതിന് ശേഷം അദ്ദേഹം മുഖ്യ തെരഞ്ഞെടുപ്പ് കമ്മിഷണറായി മാറുമായിരുന്നു. ഗോയലിന്‍റെ രാജി പ്രസിഡന്‍റ്‌ ദ്രൗപതി മുർമു സ്വീകരിച്ചതായി നിയമ മന്ത്രാലയ വിജ്ഞാപനത്തിൽ പറഞ്ഞു. എന്നാൽ എന്തുകൊണ്ടാണ് അദ്ദേഹം രാജിവച്ചതെന്ന് വ്യക്തമല്ല.
18-ാം ലോക്‌സഭ തെരഞ്ഞെടുപ്പ് പടിവാതിൽക്കൽ എത്തി നിൽക്കേ തെരഞ്ഞടുപ്പ് കമ്മിഷണറുടെ രാജി അനിശ്ചിതത്വത്തിൻ്റെ അന്തരീക്ഷം സൃഷ്‌ടിക്കുന്നുവെന്ന് പാർട്ടി പറഞ്ഞു. ഇലക്ഷൻ കമ്മിഷണർമാരുടെ നിയമനം സംബന്ധിച്ച പുതിയ നിയമം വന്നതോടെ തെരഞ്ഞെടുപ്പ് കമ്മിഷൻ്റെ ഘടന പൂർണമായും സർക്കാരിന്‍റെ നിയന്ത്രണത്തിലാണെന്ന് സിപിഐഎം ആരോപിച്ചു.
ചീഫ് ഇലക്ഷൻ കമ്മിഷണറും മറ്റ് ഇലക്ഷൻ കമ്മിഷണർമാരുടെയും നിയമനത്തിന്‍റെ ബിൽ 2023 ഡിസംബറിൽ പാർലമെന്‍റ്‌ പാസാക്കിയിരുന്നു. നിയമമന്ത്രിയും സെക്രട്ടറി റാങ്കിൽ കുറയാത്ത മറ്റ് രണ്ട് വ്യക്തികളും അധ്യക്ഷനായ ഒരു സെർച്ച് കമ്മിറ്റി രൂപീകരിക്കുന്നതിനുള്ള വ്യവസ്ഥകൾ പോലെ സിഇസി അല്ലെങ്കിൽ ഇസിമാരായി നിയമിക്കുന്നതിന് സെലക്ഷൻ കമ്മിറ്റിയുടെ പരിഗണനയ്ക്കായി അഞ്ച് പേരടങ്ങുന്ന ഒരു പാനൽ തയ്യാറാക്കണം.
സിഇസിയുടെയും മറ്റ് ഇസികളുടെയും നിയമനത്തിനായി രാഷ്ട്രപതിക്ക് ശുപാർശകൾ നൽകുന്നതിന് പ്രധാനമന്ത്രിയും പ്രതിപക്ഷ നേതാവും കേന്ദ്രമന്ത്രിയും അധ്യക്ഷനായ ഒരു സെലക്ഷൻ കമ്മിറ്റിക്കും ബില്ലിൽ വ്യവസ്ഥകളുണ്ട്. ഈ സാഹചര്യം ഭരണഘടനാ സ്ഥാപനത്തിൻ്റെ വിശ്വാസ്യതയും സ്വതന്ത്രവും നീതിയുക്തവുമായ തെരഞ്ഞെടുപ്പുകൾ നടത്താനുള്ള ഉത്തരവാദിത്തവും പാലിക്കപ്പെടുമോ എന്ന ആശങ്ക സൃഷ്‌ടിക്കുന്നുണ്ടെന്നും സിപിഎം ആരോപിച്ചു.
