ന്യൂഡൽഹി : മൂന്നാം തവണയും പ്രധാനമന്ത്രിയായി നരേന്ദ്ര മോദി സത്യപ്രതിജ്ഞ ചെയ്‌ത് ഇന്ന് അധികാരമേൽക്കുകയാണ്. നമ്മുടെ രാജ്യത്ത് സ്ഥിരമായ വോട്ട് വിഹിതം നിലനിർത്തിക്കൊണ്ട് തുടർച്ചയായി മൂന്ന് തെരഞ്ഞെടുപ്പുകളിൽ വിജയിച്ച ഏക നേതാവ് അദ്ദേഹമാണെന്ന് ഇന്ത്യയിലെ തെരഞ്ഞെടുപ്പ് കണക്കുകൾ പരിശോധിച്ചാൽ വ്യക്തമാകും. രണ്ട് തവണയിലധികം തെരഞ്ഞെടുക്കപ്പെട്ട മുൻ അമേരിക്കൻ പ്രസിഡന്‍റ് ഫ്രാങ്ക്ലിൻ ഡി റൂസ്‌വെൽറ്റ്, മുൻ ജർമ്മൻ ചാൻസലർ ആഞ്ചേല മെർക്കൽ തുടങ്ങിയ ലോകനേതാക്കളുടെ നിരയിലേക്ക് ഇനി മോദിയും ചേരുന്നു.
ഇതുവരെ, തുടർച്ചയായി മൂന്ന് തെരഞ്ഞെടുപ്പുകളിൽ വിജയിച്ച ഏക ഇന്ത്യൻ പ്രധാനമന്ത്രി ജവഹർലാൽ നെഹ്‌റു ആണ്. അദ്ദേഹത്തിനൊപ്പം എത്തിയ രണ്ടാമത്തെ നേതാവായി മോദി മാറിയിരിക്കുന്നു. ജവഹർലാൽ നെഹ്‌റു 1952-ലെ തെരഞ്ഞെടുപ്പിൽ 45 ശതമാനം വോട്ട് നേടി. അത് 1957-ൽ 47.8 ശതമാനമായി ഉയർന്നു. എന്നാൽ 1963-ലെ തെരഞ്ഞെടുപ്പിൽ വോട്ട് വിഹിതം 44.7 ശതമാനമായി കുറഞ്ഞു. ഇത് അദ്ദേഹത്തിന്‍റെ ആദ്യ തെരഞ്ഞെടുപ്പ് വിജയത്തേക്കാൾ നേരിയ കുറവാണ്.
പ്രധാനമന്ത്രി മോദിയെ സംബന്ധിച്ചിടത്തോളം വോട്ട് വിഹിതം സ്ഥിരതയുള്ളതാണ്. 2014ൽ ബിജെപി 31.3 ശതമാനം വോട്ട് വിഹിതം നേടിയപ്പോൾ 2019ൽ അത് 37.7 ശതമാനമായി ഉയർന്ന് 2024ലെ തെരഞ്ഞെടുപ്പിൽ 36.6 ശതമാനമായി കുറഞ്ഞു. 2014ലെയും 2019ലെയും ലോക്‌സഭ തെരഞ്ഞെടുപ്പുകളിൽ ദേശീയ ജനാധിപത്യ സഖ്യത്തിന്‍റെ ഭാഗമായാണ് ബിജെപി ഒറ്റയ്ക്ക് കേവല ഭൂരിപക്ഷം നേടിയത്.
2019ലെ പ്രധാനമന്ത്രി മോദിയുടെ വിജയത്തെ പലപ്പോഴും രാജീവ് ഗാന്ധിയുടെ 1984ലെ വിജയവുമായി താരതമ്യം ചെയ്യാറുണ്ട്. അന്നത്തെ പ്രധാനമന്ത്രി ഇന്ദിര ഗാന്ധിയുടെ കൊലപാതകത്തെ തുടർന്നുണ്ടായ സഹതാപ തരംഗത്തിന്‍റെ ആവേശത്തിൽ, രാജീവ് ഗാന്ധിയുടെ നേതൃത്വത്തിലുള്ള കോൺഗ്രസ് 49 ശതമാനം വോട്ട് വിഹിതത്തോടെ 414 സീറ്റുകൾ നേടി. 2019 ൽ വീണ്ടും ജനവിധി തേടിയ പ്രധാനമന്ത്രി മോദി 45 ശതമാനം വോട്ട് വിഹിതം നേടി, ബിജെപി നേതൃത്വത്തിലുള്ള സഖ്യം 353 സീറ്റുകൾ നേടി.
അന്താരാഷ്‌ട്ര സാഹചര്യത്തിൽ, പ്രധാനമന്ത്രി മോദിയുടെ ജനപ്രീതി, 1932 മുതൽ 1944 വരെയുള്ള നാല് പ്രസിഡന്‍റ് തെരഞ്ഞെടുപ്പുകളിൽ വിജയിച്ച മുൻ അമേരിക്കൻ പ്രസിഡന്‍റ് ഫ്രാങ്ക്ലിൻ റൂസ്‌വെൽറ്റിനോടടുത്താണ്. റൂസ്‌വെൽറ്റ് തന്‍റ ആദ്യ തെരഞ്ഞെടുപ്പിൽ 1932-ൽ 57.4 ശതമാനം വോട്ടും അവസാനമായി 1944-ൽ 53.4 ശതമാനം വോട്ടും നേടി വിജയിച്ചു.
രണ്ട് തവണയിൽ കൂടുതൽ അധികാരമേറ്റ അവസാന അമേരിക്കൻ പ്രസിഡന്‍റായിരുന്നു റൂസ്‌വെൽറ്റ്. 2005 മുതൽ 2017 വരെ തുടർച്ചയായി നാല് തെരഞ്ഞെടുപ്പുകളിൽ വിജയിച്ച മുൻ ജർമ്മൻ ചാൻസലർ ആഞ്ചേല മെർക്കലിന്‍റെ വിജയവുമായി പ്രധാനമന്ത്രി മോദിയുടെ മൂന്നാമൂഴത്തെ താരതമ്യം ചെയ്യാം. 2009ലും 2017ലും അവരുടെ വോട്ട് വിഹിതം കുറഞ്ഞു. ആധുനിക സിംഗപ്പൂരിന്‍റെ സ്ഥാപകനായ ലീ ക്വാൻ യൂ ആറ് വിജയങ്ങൾ നേടി. 1968 നും 1988 നും ഇടയിൽ തുടർച്ചയായ തെരഞ്ഞെടുപ്പുകളില്‍ അദ്ദേഹം വെന്നിക്കൊടി നാട്ടി. എന്നാല്‍ രണ്ടാമത്തെയും നാലാമത്തെയും അഞ്ചാമത്തെയും ടേമുകളിൽ അദ്ദേഹത്തിന്‍റെ വോട്ട് വിഹിതം കുറഞ്ഞു.
1968ലെ തെരഞ്ഞെടുപ്പിൽ 86.7 ശതമാനം വോട്ട് നേടിയാണ് ലീ ക്വാൻ യൂ വിജയിച്ചത്. പ്രധാനമന്ത്രി മോദി ഇപ്പോൾ പാർലമെന്‍റിൽ 293 സീറ്റുകളുള്ള എൻഡിഎ സഖ്യത്തെ നയിക്കുന്നു. 2047-ഓടെ ഇന്ത്യയെ വികസിത രാഷ്‌ട്രമാക്കി മാറ്റുമെന്നുള്ള വാഗ്‌ദാനമാണ് മോദിയും സംഘവും മുന്നോട്ടുവയ്‌ക്കുന്നത്.
"എൻഡിഎ സർക്കാർ 1, 2, ഇപ്പോൾ 3... ഇതാണ് തുടർച്ച. ഞങ്ങൾ ഞങ്ങളുടെ പ്രമേയങ്ങളും സദ്ഭരണത്തോടുള്ള പ്രതിബദ്ധതയും സാധാരണ ജനങ്ങളുടെ സ്വപ്‌നങ്ങൾ സാക്ഷാത്കരിക്കാനുള്ള ശ്രമവും ഉറപ്പാക്കാൻ കൂടുതൽ കാഴ്‌ചപ്പാടോടെയും സമഗ്രമായും രാജ്യത്തെ മുന്നോട്ട് കൊണ്ടുപോകും," പുതിയ സർക്കാർ രൂപീകരിക്കാനുള്ള അവകാശവാദം ഉന്നയിച്ച ശേഷം അദ്ദേഹം രാഷ്ട്രപതി ഭവനിൽ മാധ്യമങ്ങളോട് പറഞ്ഞു.
'ഈ 10 വർഷത്തെ ഭരണകാലത്ത് ഇന്ത്യ ലോകത്തിന് ഒരു വിശ്വബന്ധു ആയി ഉയർന്നു. അതിന്‍റെ പരമാവധി നേട്ടം ഇപ്പോൾ ആരംഭിക്കുകയാണ്. അടുത്ത അഞ്ച് വർഷം ആഗോള പരിതസ്ഥിതിയിലും ഇന്ത്യക്ക് വളരെ ഉപയോഗപ്രദമാകുമെന്ന് എനിക്ക് ഉറപ്പുണ്ട്. ലോകം ഒരുപാട് പ്രതിസന്ധികളിലൂടെ കടന്നുപോകുന്നു. 10 വർഷം പ്രധാനമന്ത്രിയുടെ ജോലി ചെയ്‌ത അനുഭവം തനിക്കുണ്ടെന്നും ഈ അനുഭവം നന്നായി ഉപയോഗിക്കുമെ'ന്നും അദ്ദേഹം കൂട്ടിച്ചേർത്തു. ഞായറാഴ്‌ച വൈകിട്ട് 7.15ന് രാഷ്ട്രപതി ഭവനിൽ നടക്കുന്ന ചടങ്ങിൽ മന്ത്രിമാരോടൊപ്പം പ്രധാനമന്ത്രി മോദി സത്യപ്രതിജ്ഞ ചെയ്യും.
