ഹൈദരാബാദ്: വിവിധ വ്യോമസേന ശാഖകളില്‍ നിന്ന് പരിശീലനം പൂര്‍ത്തിയാക്കിയ സൈനികരുടെ സംയുക്ത ബിരുദ ദാന പരേഡ് ഹൈദരാബാദിലെ ഡുണ്ടിഗലില്‍ നടന്നു. വ്യോമസേനാ മേധാവി എയര്‍ ചീഫ് മാര്‍ഷല്‍ അമര്‍ പ്രീത് സിങ് ചടങ്ങില്‍ അധ്യക്ഷനായി. വര്‍ഷങ്ങള്‍ നീണ്ട അര്‍പ്പണവും കഠിന പ്രയ്‌ത്നവുമാണ് പരിശീലനകാലത്ത് ഇവര്‍ പുലര്‍ത്തിയതെന്ന് അദ്ദേഹം ചൂണ്ടിക്കാട്ടി. പൂര്‍ത്തിയായിട്ടുള്ളത് പ്രാഥമിക പരിശീലനം മാത്രമാണെന്നും അദ്ദേഹം കൂട്ടിച്ചേര്‍ത്തു. ഇതൊരു തുടക്കം മാത്രമാണ്. പുതിയ പഠനത്തിന്‍റെ തുടക്കം. ധാരാളം അനുഭവങ്ങള്‍ തേടാനുള്ള ഒരു ജീവിതത്തിന്‍റെ തുടക്കം മാത്രമാണ് ഇതെന്നും അദ്ദേഹം കൂട്ടിച്ചേര്‍ത്തു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം
കേഡറ്റുകളുടെ കഴിവും ശേഷിയും വര്‍ദ്ധിപ്പിക്കാന്‍ വെല്ലുവിളികള്‍ നിറഞ്ഞതാണ് വ്യോമസേനാംഗങ്ങളുടെ ജീവിതമെന്നും അദ്ദേഹം ചൂണ്ടിക്കാട്ടി. നിങ്ങള്‍ നിരന്തരം നിങ്ങളുടെ ചക്രവാളങ്ങള്‍ വികസിപ്പിക്കേണ്ടതുണ്ട്. പരിധികള്‍ വര്‍ദ്ധിപ്പിക്കണം. പുത്തന്‍ നൈപുണികളും ശേഷിയും കണ്ടെത്തണം. കോടിക്കണക്കിന് രൂപ വിലവരുന്ന വിമാനങ്ങളും സംവിധാനങ്ങളും നിങ്ങള്‍ പ്രവര്‍ത്തിപ്പിക്കുകയും സംരക്ഷിക്കുകയും വേണം.
സാങ്കേതികമായ ഉത്തരവാദിത്തങ്ങള്‍ മാത്രമല്ല അവര്‍ക്കുള്ളത്. വ്യോമസേനാ പോരാളികളായും അവര്‍ മാറണം. മാനസികവും ശാരീരികവുമായ കരുത്തിന്‍റെ പ്രാധാന്യവും അദ്ദേഹം ചൂണ്ടിക്കാട്ടി. കായികവിനോദസങ്ങളിലും മറ്റ് വിനോദങ്ങളിലും ഏര്‍പ്പെടേണ്ടതിന്‍റെ ആവശ്യകതയും അദ്ദേഹം ചൂണ്ടിക്കാട്ടി. വായനയോടുള്ള പ്രേമവും വളര്‍ത്തിയെടുക്കണമെന്നും അദ്ദേഹം കൂട്ടിച്ചേര്‍ത്തു.
രാജ്യത്തെ സേവിക്കാനും അതിന്‍റെ അഖണ്ഡതയെ സംരക്ഷിക്കാനുമുള്ള അര്‍പ്പണമാണ് നിങ്ങള്‍ കൈക്കൊണ്ട പ്രതിജ്ഞയെന്നും അദ്ദേഹം ഊന്നിപ്പറഞ്ഞു. ഇന്ന് നിങ്ങളെടുത്ത ഭരണഘടനയോടുള്ള പ്രതിബദ്ധത എന്ന പ്രതിജ്ഞ ജീവിതകാലം മുഴുവന്‍ സൂക്ഷിക്കാനുള്ളതാണ്. സത്യസന്ധമായും ആദരവോടെയും നിങ്ങളുടെ ജോലി ചെയ്യുക. അങ്ങേയറ്റം അര്‍പ്പണ ബോധവും അഖണ്ഡതയും തൊഴിലില്‍ ഉടനീളം പുലര്‍ത്തണമെന്നും അദ്ദേഹം പറഞ്ഞു.
ഇപ്പോള്‍ മുതല്‍ നിങ്ങളുടെ ജീവിതം നിങ്ങള്‍ക്ക് വേണ്ടിയല്ല. മറ്റുള്ളവര്‍ക്ക് വേണ്ടിയുള്ളതാണ്. രാജ്യ താത്പര്യത്തിനും നമുക്ക് ചുറ്റുമുള്ള മറ്റ് സ്‌ത്രീപുരുഷന്‍മാരുടെ താത്പര്യത്തിനും വേണ്ടിയുള്ളതാണെന്നും എയര്‍ ചീഫ് മാര്‍ഷല്‍ പറഞ്ഞു.
സാര്‍ത്ഥകമായ ഒരു തൊഴില്‍ ജീവിതമുണ്ടാകട്ടെയെന്നും അദ്ദേഹം പുത്തന്‍ സേനാംഗങ്ങള്‍ക്ക് ആശംസിച്ചു. ഇന്ത്യന്‍ വ്യോമസേനയുടെ പാരമ്പര്യങ്ങളും മൂല്യങ്ങളും ഉയര്‍ത്തിപ്പിടിക്കാനും അദ്ദേഹം പുതിയ അംഗങ്ങളെ ഉദ്ബോധിപ്പിച്ചു. രാജ്യത്തെ മുഴവന്‍ വ്യോമസേനാംഗങ്ങള്‍ക്ക് വേണ്ടിയും അദ്ദേഹം പുതിയ അംഗങ്ങള്‍ക്ക് ആശംസകള്‍ നേര്‍ന്നു. നീലാകാശവും സന്തോഷകരമായ ജീവിതവും കൊണ്ട് ഈശ്വരന്‍ നമ്മെ എല്ലാം അനുഗ്രഹിക്കട്ടെയെന്നും അദ്ദേഹം ആശംസിച്ചു.
Also Read: മുൻ കേന്ദ്രമന്ത്രി ഇവികെഎസ് ഇളങ്കോവന്‍ അന്തരിച്ചു
