മാറിയ ലോകക്രമവും സാങ്കേതിക വിദ്യയുടെ കുതിച്ചു ചാട്ടവും മാധ്യമ രംഗത്ത് വളരെയധികം പ്രതിഫലിച്ച വര്‍ഷമാണ് 2024. ആര്‍ട്ടിഫിഷ്യല്‍ ഇന്‍റലിജന്‍സിന്‍റെ കടന്നുവരവ് മാധ്യമങ്ങളുടെ പ്രവര്‍ത്തന രീതിയിലും അവതരണ രീതിയിലുമെല്ലാം മാറ്റം വരുത്തിയിരുന്നു. സാങ്കേതിക വിദ്യയുടെ ഈ കുതിപ്പ് ലോക വാര്‍ത്തകള്‍ പ്രേക്ഷകരിലേക്ക് അവതരിപ്പിക്കപ്പെടുന്നതിലും മാറ്റങ്ങളുണ്ടാക്കി. കൂടുതല്‍ വ്യക്തതയിലും എളുപ്പത്തിലും കാര്യങ്ങള്‍ ജനങ്ങള്‍ക്ക് മുന്നില്‍ അവതരിപ്പിക്കപ്പെട്ടു.
അതേസമയം അവതരിപ്പിക്കപ്പെട്ട വാര്‍ത്തകളിലെ ശരികേടുകളും പക്ഷപാതങ്ങളും സംവാദത്തിന് വിധേയമാണ്. പുതിയ പാര്‍ലമെന്‍റ് മന്ദിരത്തിന്‍റെ ഉദ്ഘാടനം, അയോധ്യ പ്രാണ പ്രതിഷ്‌ഠ, ലോക്‌സഭാ തെരഞ്ഞെടുപ്പ്, ഇസ്രയേല്‍ പലസ്‌തീന്‍ യുദ്ധം തുടങ്ങി ഒട്ടനവധി വാര്‍ത്താ പ്രാധാന്യമുള്ള സംഭവങ്ങളുടെ ഒരു വര്‍ഷം കൂടിയായിരുന്നു 2024.
2024ല്‍ വാര്‍ത്തകളില്‍ ഇടംപിടിച്ച ഇന്ത്യയിലെ പ്രമുഖർ
ജസ്റ്റിസ് ഡി വൈ ചന്ദ്രചൂഡ്: രാഷ്‌ട്രീയക്കാരും സിനിമ താരങ്ങളും ക്രിക്കറ്റ് താരങ്ങളും അടക്കിവാഴുന്ന മാധ്യമ സ്‌ക്രീനുകളില്‍ ന്യായാധിപന്‍മാര്‍ അതേ തലത്തിലേക്ക് ഉയരുന്നത് അപൂര്‍വമായാണ്. അത്തരത്തിലൊരു ന്യായാധിപനായിരുന്നു അടുത്തിടെ വിരമിച്ച ജസ്റ്റിസ് ധനഞ്ജയ യശ്വന്ത് ചന്ദ്രചൂഡ്.
യുവ അഭിഭാഷകർ റോക്ക്സ്റ്റാർ സിജെഐ എന്നാണ് ഡിവൈ ചന്ദ്രചൂഡിനെ വിശേഷിപ്പിച്ചിരുന്നത്. ചന്ദ്രചൂഡ് കാലത്തെ കോടതി നടപടിക്രമങ്ങളും ഉത്തരവുകളും വിധിന്യായങ്ങളും നിരന്തരം വാര്‍ത്തയായി. ഇലക്‌ടറല്‍ ബോണ്ട് പോലെ വലിയ സ്വീകാര്യത നേടിയ വിധികളും ഗ്യാന്‍വാപി പോലെ വിവാദങ്ങളുണ്ടാക്കിയ വിധികളും ഡിവൈ ചന്ദ്രചൂഡിന്‍റെ ഔദ്യോഗിക പദവിയുടെ അവസാന കാലഘട്ടങ്ങളിലുണ്ടായി. ഇന്ത്യയിലും വിദേശത്തും നടത്തിയ പ്രസംഗങ്ങളുടെ പേരിലും ഡിവൈ ചന്ദ്രചൂഡ് മാധ്യമശ്രദ്ധ നേടിയിട്ടുണ്ട്.
അഖിലേഷ് യാദവ്: ബഹുജൻ സമാജിന്‍റെ (കമ്മ്യൂണിറ്റി) നേതാവായാണ് അഖിലേഷ് യാദവിന്‍റെ ഉദയം. ഇന്ത്യയിലെ ഏറ്റവും ജനസാന്ദ്രതയുള്ള സംസ്ഥാനമായ ഉത്തർപ്രദേശിലെ ഏറ്റവും വലിയ കക്ഷിയായി ഉയർന്നുവരുന്ന സമാജ്‌വാദി പാർട്ടിയെ നയിക്കുന്നത് അഖിലേഷ് യാദവാണ്. 2024 ലോക്‌സഭാ തെരഞ്ഞെടുപ്പില്‍ അഖിലേഷിന്‍റെ എസ്‌പി വലിയ മുന്നേറ്റമാണ് ഉണ്ടാക്കിയത്.
2024 തെരഞ്ഞെടുപ്പില്‍ ബിജെപിയുടെ തുറുപ്പ് ചീട്ടായിരുന്നു അയോധ്യ രാമക്ഷേത്രം. അയോധ്യയിലെ പ്രാണപ്രതിഷ്‌ഠ രാജ്യത്തുടനീളം ബിജെപി പ്രചാരണ ആയുധമാക്കിയിരുന്നു. എന്നാല്‍ അയോധ്യ ക്ഷേത്രം ഉള്‍പ്പെടുന്ന ഫൈസാബാദ് ലോക്‌സഭാ മണ്ഡലത്തില്‍ ബിജെപിക്ക് കനത്ത പ്രഹരമേല്‍പ്പിച്ച് സമാജ്‌വാദി പാര്‍ട്ടിയുടെ അവധേഷ് പ്രസാദ് ആണ് വിജയിച്ചത്.
ചന്ദ്രബാബു നായിഡു: ആന്ധ്രാപ്രദേശ് നിയമസഭ തെരഞ്ഞെടുപ്പിൽ തെലുങ്ക് ദേശം പാർട്ടിയെ (ടിഡിപി) വൻ വിജയത്തിലേക്ക് എത്തിച്ച എൻ. ചന്ദ്രബാബു നായിഡു, ഏകദേശം മൂന്ന് പതിറ്റാണ്ടുകളുടെ ഇടവേളയ്ക്ക് ശേഷമാണ് ദേശീയ ശ്രദ്ധയില്‍ തിരിച്ചെത്തുന്നത്. കേന്ദ്ര മന്ത്രിസഭയില്‍ കിങ് മേക്കറുടെ റോളിലേക്ക് വരെ ചന്ദ്രബാബു നായിഡു ഉയരുന്നത് രാജ്യം കണ്ടു.
നിതീഷ് കുമാര്‍: 2024 ലോക്‌സഭാ തെരഞ്ഞെടുപ്പിന് ശേഷം ഭരണഗതി നിയന്ത്രിക്കുന്നതില്‍ പ്രധാനികളില്‍ ഒരാളായിരുന്നു നിതീഷ് കുമാർ. പ്രതിപക്ഷ കക്ഷികളുടെ കൂട്ടായ്‌മയായ ഇന്ത്യ സഖ്യത്തിന്‍റെ രൂപീകരണത്തിന് ചുക്കാന്‍ പിടിച്ച നിതീഷ് കുമാർ തെരഞ്ഞെടുപ്പിന് തൊട്ട് മുമ്പ് ഇന്ത്യ സഖ്യം വിട്ട് എന്‍ഡിഎക്ക് ഒപ്പം കൂടുകയായിരുന്നു. തുടര്‍ന്ന് തെരഞ്ഞെടുപ്പില്‍ നേട്ടമുണ്ടാക്കിയ നിതീഷിന്‍റെ ജെഡിയു പാര്‍ട്ടി സര്‍ക്കാര്‍ രൂപീകരണത്തില്‍ നിര്‍ണായകമായി.
രാഹുൽ ഗാന്ധി: ദേശീയ രാഷ്‌ട്രീയത്തില്‍ രാഹുല്‍ ഗാന്ധി തിളങ്ങിയ വര്‍ഷം കൂടിയായിരുന്നു 2024. 2022ന്‍റെ അവസാനത്തില്‍ ആരംഭിച്ച ഭാരത് ജോഡോ യാത്രയും 2023ലെ രണ്ടാം ജോഡോ യാത്രയുമെല്ലാം രാഹുല്‍ ഗാന്ധിയുടെ രഷ്‌ട്രീയ പ്രതിച്ഛായ വര്‍ധിപ്പിച്ചിരുന്നു. 'മോദി' പരാമര്‍ശത്തിലെ കോടതി വിധിയെ തുടര്‍ന്ന് എംപി സ്ഥാനത്ത് നിന്ന് അയോഗ്യനാക്കപ്പെട്ടതും സുപ്രീംകോടതി ഇടപെടലില്‍ നടപടി സ്റ്റേ ചെയ്‌തതുമെല്ലാം രാജ്യ വ്യാപകമായി ചര്‍ച്ച ചെയ്യപ്പെട്ടിരുന്നു. ഇതിന് ശേഷം 2024 ലോക്‌സഭ തെരഞ്ഞെടുപ്പില്‍ റായ്‌ബറേലിയില്‍ വന്‍ വിജയമാണ് രാഹുല്‍ ഗാന്ധി നേടിയത്.
മമത ബാനർജി: കൊൽക്കത്തയിലെ ആര്‍ജി കര്‍ ആശുപത്രിയിലെ ട്രെയിനി ഡോക്‌ടര്‍ ബലാത്സംഗക്കൊലയ്ക്ക് ഇരയായ കേസ് രാജ്യത്ത് വലിയ പ്രക്ഷോഭങ്ങള്‍ക്ക് ഇടയാക്കിയിരുന്നു. സംഭവത്തിലെ പൊലീസ് നടപടികളില്‍ മമതയ്ക്ക് നേരെ വന്‍ വിമര്‍ശനങ്ങളുയര്‍ന്നു.
യോഗി ആദിത്യനാഥ്: മഹാരാഷ്‌ട്ര, യുപി ഉപതെരഞ്ഞെടുപ്പുമായി ബന്ധപ്പെട്ട് യോഗി ആദിത്യനാഥിന്‍റെ "ബാടേംഗേ തോ കാടേംഗേ' എന്ന മുദ്രാവാക്യം ചർച്ചയായിരുന്നു. മുദ്രാവാക്യത്തിനെതിരെ വലിയ പ്രതിഷേധമാണ് ഉയര്‍ന്നത്. വര്‍ഗീയ വിവേചനം ഉണ്ടാക്കുന്നതാണ് യോഗിയുടെ മുദ്രാവാക്യമെന്ന് പ്രതിപക്ഷം ചൂണ്ടിക്കാട്ടിയിരുന്നു.
ചംപെയ്‌ സോറൻ: 'കോണ്‍ഗ്രസ് ടു ബിജെപി' പലായനത്തില്‍ 2024ല്‍ ഏറ്റവും കൂടുതല്‍ ചര്‍ച്ച ചെയ്യപ്പെട്ട പേരാണ് ജാര്‍ഖണ്ഡ് മുക്തി മോര്‍ച്ച നേതാവും ജാര്‍ഖണ്ഡിലെ മുഖ്യമന്ത്രിയുമായിരുന്ന ചംപെയ്‌ സോറന്‍റേത്. 2023ല്‍ നാടകീയ സംഭവങ്ങള്‍ക്ക് ജാര്‍ഖണ്ഡ് സാക്ഷ്യം വഹിച്ചിരുന്നു. ഈ വര്‍ഷം ജനുവരി 31ന് ആണ് ഭൂമി കുംഭകോണ കേസുമായി ബന്ധപ്പെട്ട് ജാര്‍ഖണ്ഡ് മുഖ്യമന്ത്രി ഹേമന്ത് സോറനെ ഇഡി അറസ്റ്റ് ചെയ്യുന്നത്.
അറസ്‌റ്റിലാകുന്നതിന് മുമ്പ് ഹേമന്ത് സോറന് മുഖ്യമന്ത്രി സ്ഥാനം രാജിവെച്ചു. പകരം ജെഎംഎമ്മിന്‍റെ മുതിര്‍ന്ന നേതാവും ഹേമന്ത് സോറന്‍റെ വിശ്വസ്‌തനുമായ ചംപെയ്‌ സോറനാണ് മുഖ്യമന്ത്രിയായി സ്ഥാനമേറ്റത്. 149 ദിവസത്തെ കസ്‌റ്റഡിക്ക് ശേഷം ജൂൺ 29 ന് ഹേമന്ത് സോറന് ജാമ്യത്തിൽ പുറത്തിറങ്ങി. ഹേമന്ത് സോറന് ജയില്‍ മോചിതനായതോടെ ചംപെയ്‌ സോറന് സ്ഥാനം ഒഴിയേണ്ടി വന്നു. ഇതിന് പിന്നാലെയാണ് ചംപെയ്‌ സോറന് ബിജെപിയിലേക്ക് ചേക്കേറിയത്. ഇതിന് പിന്നാലെ നടന്ന ജാര്‍ഖണ്ഡ് അസംബ്ലി തെരഞ്ഞെടുപ്പില്‍ ഹേമന്ത് സോറന്‍റെ നേതൃത്വത്തില്‍ ജെഎംഎം വന്‍ നേട്ടമുണ്ടാക്കി അധികാരം നിലനിര്‍ത്തിയിരുന്നു.
ഹേമന്ത് സോറൻ: ഭൂമി കുംഭകോണ കേസിൽ ഇഡി അറസ്റ്റ് ചെയ്‌തതിനെ തുടർന്ന് ജാര്‍ഖണ്ഡ് മുഖ്യമന്ത്രി ഹേമന്ദ് സോറൻ തുടര്‍ച്ചയായി വാര്‍ത്തകളില്‍ ഇടം നേടിയിരുന്നു. ഹേമന്ത് സോറന്‍റെ ജയില്‍ മോചനവും തുടര്‍ന്നുള്ള സത്യ പ്രതിജ്ഞയുമെല്ലാം ദേശീയ തലത്തില്‍ ചര്‍ച്ചയായിരുന്നു.
ഏറ്റവുമൊടുവില്‍ 81 നിയമസഭാ സീറ്റുകളുള്ള ജാർഖണ്ഡിൽ 56 സീറ്റുകള്‍ നേടിയാണ് ഇന്ത്യ മുന്നണി വിജയിച്ചത്. ഹേമന്ത് സോറന്‍റെ ജെഎംഎം പാര്‍ട്ടി 34 സീറ്റുകളിൽ വിജയിച്ചുകയറി.
അരവിന്ദ് കെജ്‌രിവാൾ: 2024 മാർച്ചിലാണ് ഡല്‍ഹി മുഖ്യമന്ത്രി അരവിന്ദ് കെജ്‌രിവാൾ അറസ്റ്റിലാകുന്നത്. ഡല്‍ഹി മദ്യനയ അഴിമതിക്കേസിലായിരുന്നു അറസ്റ്റ്. തുടര്‍ന്ന് നാടകീയ സംഭവങ്ങള്‍ക്കാണ് ഡല്‍ഹി സാക്ഷ്യം വഹിച്ചത്. രാജിവക്കാന്‍ തയാറാവാതിരുന്ന അരവിന്ദ് കെജ്‌രിവാള്‍ ജയിലിലിരുന്ന് ഭരണ നിര്‍വഹണം നടത്തി.
അരവിന്ദ് കെജ്‌രിവാളിന് ജയിലിനകത്ത് ഇരുന്ന് ഭരിക്കാനാകുമോ എന്ന കാര്യത്തില്‍ പുറത്ത് ചൂടേറിയ ചര്‍ച്ചകള്‍ നടന്നു. 6 മാസത്തെ ജയിൽവാസത്തിന് ശേഷം പുറത്തിറങ്ങിയിതിന് ശേഷമാണ് കെജ്‌രിവാൾ മുഖ്യമന്ത്രി സ്ഥാനം രാജിവെച്ചത്.
മനീഷ് സിസോദിയ: മദ്യനയ അഴിമതിക്കേസില്‍ 17 മാസമാണ് ഡൽഹി മുൻ ഉപമുഖ്യമന്ത്രിയും എഎപി നേതാവുമായ മനീഷ് സിസോദിയ ജയില്‍വാസം അനുഭവിച്ചത്. 10 ലക്ഷം രൂപയുടെ വ്യക്തിഗത ബോണ്ടിലാണ് ഓഗസ്റ്റില്‍ സുപ്രീം കോടതി സിസോദിയയ്ക്ക് ജാമ്യം അനുവദിച്ചത്.
എം കെ സ്റ്റാലിൻ: കേന്ദ്ര സര്‍ക്കാരിനെതിരെ ശക്തമായി വിമര്‍ശനങ്ങള്‍ ഉയര്‍ത്തി തമിഴ്‌നാട് മുഖ്യമന്ത്രി എംകെ സ്റ്റാലിനും ദേശീയ തലത്തില്‍ മാധ്യമ ശ്രദ്ധ നേടിയിരുന്നു.
ബോളിവുഡ് തിളക്കം
കങ്കണ റണാവത്ത്: ഹിന്ദി സിനിമാ നടിയും മാണ്ഡി ലോക്‌സഭാ എംപിയുമായ കങ്കണ റണാവത്ത് ഒന്നോ രണ്ടോ തവണയല്ല വിവാദങ്ങളില്‍പ്പെട്ടത്. അപകീര്‍ത്തി കേസ് ഉള്‍പ്പടെ 8 കേസുകള്‍ കങ്കണയ്ക്കെതിരെ ഉണ്ടെന്നാണ് തെരഞ്ഞെടുപ്പ് സമയത്ത് പുറത്തുവന്ന കണക്ക്.
ഒരു ടെലിവിഷൻ ചാനലിന് നൽകിയ അഭിമുഖത്തിൽ, ജവഹർലാൽ നെഹ്‌റുവല്ല, നേതാജി സുഭാഷ് ചന്ദ്രബോസാണ് ഇന്ത്യയുടെ ആദ്യത്തെ പ്രധാനമന്ത്രിയെന്ന് കങ്കണ പറഞ്ഞത് വലിയ വിവാദമായിരുന്നു. കേന്ദ്ര കാര്‍ഷിക നിയമങ്ങള്‍ക്കെതിരെ രാജ്യത്തെ കര്‍ഷകര്‍ നടത്തിയ സമരത്തെ കങ്കണ അവഹേളിച്ച് സംസാരിച്ചതും വലിയ പ്രക്ഷോഭങ്ങള്‍ക്ക് ഇടയാക്കിയിരുന്നു.
വിഷയത്തില്‍ ബിജെപി തന്നെ കങ്കണയെ തള്ളുകയും താക്കീത് നല്‍കുകയും ചെയ്‌തിരുന്നു. 2014 ന് ശേഷമാണ് ഇന്ത്യക്ക് യഥാർത്ഥത്തില്‍ സ്വാതന്ത്ര്യം ലഭിച്ചത് എന്ന കങ്കണയുടെ പരാമർശത്തിൽ എംപി - എംഎൽഎ കോടതി നോട്ടിസ് അയച്ചിരുന്നു. ഡൽഹിയിലേക്കുള്ള യാത്രയില്‍ ചണ്ഡീഗഡ് വിമാനത്താവളത്തിൽ വച്ച് വനിതാ സുരക്ഷാ ഉദ്യോഗസ്ഥ (സിഐഎസ്എഫ്) കങ്കണയെ തല്ലിയതും വലിയ വിവാദത്തിന് വഴിവെച്ചിരുന്നു.
സൽമാൻ ഖാനും ലോറൻസ് ബിഷ്‌ണോയിയും: 1998 ലാണ് സൽമാൻ ഖാനും ലോറൻസ് ബിഷ്‌ണോയിയും തമ്മിലുള്ള പ്രശ്‌നം ആരംഭിക്കുന്നത്. സല്‍മാന്‍ ഖാന് കൃഷ്ണ മൃഗത്തെ വേട്ടയാടിയ കേസാണ് ലോറന്‍സ് ബിഷ്‌ണോയി സൽമാൻ ഖാന് നേരെ തിരിയാന്‍ കാരണമായത്.
2024ൽ ലോറൻസ് ബിഷ്‌ണോയിയിൽ നിന്ന് സൽമാൻ ഖാന് നിരവധി ഭീഷണികൾ വന്നിരുന്നു. സല്‍മാന്‍ ഖാന്‍റെ ബാന്ദ്രയിലെ വസതിക്ക് നേരെ വെടിവെപ്പുണ്ടായതിലും ബിഷ്‌ണോയി സംഘമായിരുന്നു. ബിഷ്‌ണോയ് സമൂഹം പവിത്രമായി കണക്കാക്കുന്ന മൃഗമാണ് കൃഷ്ണ മൃഗം.
സ്പോർട്‌സ്
രോഹിത് ശർമ്മ: 50 ടി20കൾ ജയിക്കുന്ന ആദ്യ ക്യാപ്റ്റനായി രോഹിത് ശർമ്മ മാറി. രോഹിത്തിന് കീഴിൽ ഒരു കളി പോലും തോൽക്കാതെ, ടി20 ലോകകപ്പ് നേടുന്ന ആദ്യ ടീമെന്ന നേട്ടവും ഇന്ത്യ സ്വന്തമാക്കി. രോഹിത് ശർമ ടീമിനെ രണ്ടാം ടി20 ലോകകപ്പ് കിരീടത്തിലേക്കും എത്തിച്ചു. 10 വർഷത്തിന് ശേഷം ഇന്ത്യ നേടുന്ന ആദ്യ ഐസിസി കിരീടമായിരുന്നു ഇത്.
മനു ഭാക്കർ: ദി വീക്ക് മാഗസിന്‍റെ 2024-ലെ 'വുമൺ ഓഫ് ദ ഇയർ' ആയിരുന്നു മനു ഭാക്കര്‍. ഒരു ഒളിമ്പിക്ക് ഗെയിമില്‍ രണ്ട് ഒളിമ്പിക് മെഡലുകൾ നേടിയ ആദ്യ ഇന്ത്യൻ വനിത എന്ന ചരിത്രം കുറിച്ച ഷൂട്ടറാണ് മനു ഭാക്കര്‍.
1) 10 മീറ്റർ പിസ്റ്റൾ ഇനത്തിൽ വെങ്കലം: 2024 പാരീസ് ഒളിമ്പിക്സിൽ ഭാക്കറിന്‍റെ ആദ്യ മെഡൽ
2) 10 മീറ്റർ പിസ്റ്റൾ മിക്‌സഡ് ടീം ഇനത്തിൽ വെങ്കലം: 2024 ലെ പാരീസ് ഒളിമ്പിക്സിൽ ഭാക്കറിന്‍റെ രണ്ടാം മെഡൽ
നീരജ് ചോപ്ര: പാരീസ് ഒളിമ്പിക്‌സില്‍ ഇത്തവണ വെള്ളിത്തിളക്കാമാണ് നീരജ് ചോപ്ര നേടിയത്. ടോക്കിയോ ഒളിമ്പിക്‌സില്‍ 87.58 മീറ്റർ ചാവലിന്‍ എറിഞ്ഞാണ് നീരജ് സ്വർണ മെഡൽ നേടിയിരുന്നത്.
സൂര്യകുമാർ യാദവ്: ഇന്ത്യൻ ക്രിക്കറ്റ് താരം സൂര്യകുമാർ യാദവ് തുടർച്ചയായ രണ്ടാം ഐസിസി പുരുഷ T20I ക്രിക്കറ്റർ ഓഫ് ദ ഇയർ അവാർഡ് കരസ്ഥമാക്കി.
മാൻ സിങ്: ഏഷ്യൻ മാരത്തൺ ചാമ്പ്യൻഷിപ്പിൽ സ്വർണം നേടുന്ന രണ്ടാമത്തെ ഇന്ത്യൻ താരമായി മാൻ സിങ്. ഉത്തരാഖണ്ഡിലെ പിത്തോരാഗഡ് ജില്ലയിലെ ഒരു ചെറിയ ഗ്രാമത്തിൽ നിന്നുള്ള മാൻ സിങ് ഓട്ടത്തില്‍ അത്ഭുതങ്ങളാണ് സൃഷ്‌ടിച്ചത്.
ജയ് ഷാ: ഇന്ത്യൻ ക്രിക്കറ്റ് കൺട്രോൾ ബോർഡ് (ബിസിസിഐ) സെക്രട്ടറി ജയ് ഷാ അന്താരാഷ്‌ട്ര ക്രിക്കറ്റ് കൗൺസിലിന്‍റെ (ഐസിസി) ചെയർമാനായി ചുമതലയേറ്റു. ന്യൂസിലൻഡിന്‍റെ ഗ്രെഗ് ബാർക്ലേയ്ക്ക് പകരക്കാരനായി എത്തിയ 36 കാരനായ ജയ് ഷാ ഐസിസിയുടെ ഏറ്റവും പ്രായം കുറഞ്ഞ ചെയർമാനായി.
ഉദ്യോഗസ്ഥർ
പൂജാ ഖേദ്‌കർ: മഹാരാഷ്‌ട്രയിലെ പൂനെ നഗരത്തിൽ ഐഎഎസ് ട്രെയിനി ആയിരുക്കുന്ന സമയത്താണ് പൂജാ ഖേദ്‌കര്‍ വാര്‍ത്തകളില്‍ ഇടം പിടിക്കുന്നത്. ഭൂമി തര്‍ക്കത്തിനിടെ പൂജയുടെ പിതാവ് കര്‍ഷകന് നേരെ തോക്ക് ചൂണ്ടി ഭീഷണിപ്പെടുത്തിയ സംഭവവും വലിയ വാര്‍ത്തയായിരുന്നു. തുടര്‍ന്ന്, വ്യാജ വികലാംഗ സർട്ടിഫിക്കറ്റ്, ഒബിസി നോൺ ക്രീമി ലെയർ ക്വാട്ട തട്ടിപ്പ് തുടങ്ങിയ ക്രമക്കേടുകള്‍ കണ്ടെത്തിയതിനെ തുടര്‍ന്ന് ഇവരെ സര്‍വീസില്‍ നിന്ന് പിരിച്ചുവിടുകയായിരുന്നു.
