ബംഗളൂരു: വയനാട് മാനന്തവാടിയില്‍ കാട്ടാനയുടെ ആക്രമണത്തില്‍ മരിച്ച അജീഷിന്‍റെ കുടുംബത്തിന് കര്‍ണാടക ധനസഹായം പ്രഖ്യാപിച്ചു. 15 ലക്ഷം രൂപയാണ് അജീഷിന്‍റെ കുടുംബത്തിന് കർണാടക പ്രഖ്യാപിച്ച ധനസഹായം. കര്‍ണാടക വനംമന്ത്രി ഈശ്വര്‍ ഖന്ദ്രയാണ് ഇക്കാര്യം വാര്‍ത്താകുറിപ്പിലൂടെ അറിയിച്ചത്.
കർണാടക തുരത്തിയ മോഴയാനയായ ബേലൂർ മഖ്‌നയുടെ ആക്രമണത്തിലാണ് അജീഷ് കൊല്ലപ്പെട്ടത്. അതിനാൽ കർണാടകയിൽ കാട്ടാന ആക്രമണത്തിൽ മരിക്കുന്നവരുടെ കുടുംബത്തിന് നൽകുന്ന അതേ തുകയാണ് അജീഷിന്‍റെ കുടുംബത്തിനും നൽകുന്നത്. അജീഷിനെ കർണാടകക്കാരനായി കണക്കാക്കിയാണ് ധനസഹായമെന്ന് മുഖ്യമന്ത്രി സിദ്ധരാമയ്യ അറിയിച്ചതായി ഈശ്വർ ഖന്ദ്ര പറഞ്ഞു.
രാഹുൽ ഗാന്ധിയുടെ ഇടപെടലിന് പിന്നാലെയാണ് കർണാടക സഹായം പ്രഖ്യാപിച്ചത്. വായനാട്ടിലെത്തിയ രാഹുൽ ഗാന്ധി അജീഷിന്‍റെ കുടുംബത്തെ സന്ദർശിച്ചിരുന്നു. പിന്നാലെ കർണാടക മുഖ്യമന്ത്രി സിദ്ധരാമയ്യയുമായി രാഹുൽ നടത്തിയ ഫോൺ സംഭാഷണത്തിനൊടുവിലാണ് വനം മന്ത്രി ധനസഹായം പ്രഖ്യാപിച്ചത്.
കര്‍ണാടക റേഡിയോ കോളര്‍ ഘടിപ്പിച്ച് വിട്ട ആനയാണ് ബേലൂർ മഖ്‌ന. മാനന്തവാടിയിലെ ജനവാസ മേഖലയില്‍ എത്തി ആക്രമണം നടത്തിയതിന് പിന്നാലെ കേരള വനം വകുപ്പും കര്‍ണാടക വനം വകുപ്പും പരസ്‌പരം ആരോപണ പ്രത്യാരോപണങ്ങള്‍ നടത്തിയിരുന്നു.
ബേലൂർ മഖ്‌നയുടെ സഞ്ചാരം കൃത്യസമയത്ത് വനം വകുപ്പിനെ അറിയിച്ചില്ലെന്നായിരുന്നു കേരളം ഉയര്‍ത്തിയ ആരോപണം. എന്നാല്‍ റേഡിയോ കോളറില്‍ നിന്ന് സിഗ്നല്‍ ലഭിക്കാതിരുന്നതിനാലാണ് വിവരം കൈമാറാന്‍ താമസം നേരിട്ടതെന്ന് കര്‍ണാടക വനം വകുപ്പ് വിശദീകരിച്ചിരുന്നു.
Also Read: ബേലൂർ മഖ്‌നയ്ക്കും 'സെക്യൂരിറ്റി' ; കാട്ടാനയ്ക്ക്‌ സുരക്ഷയൊരുക്കി മോഴയാന
കഴിഞ്ഞ 10നാണ് ട്രാക്‌ടര്‍ ഡ്രൈവറായ പടമല സ്വദേശി അജീഷിനെ ബേലൂർ മഖ്‌ന ചവിട്ടി കൊലപ്പെടുത്തിയത്. മതിൽ പൊളിച്ചെത്തിയ ആന അജീഷിനെ ആക്രമിക്കുകയായിരുന്നു.
